Faatomuaga

O Le Faataoto i le Avepasi

“O galuega taulamua mo le ola tutoatasi e tai pei lava o se pasi lea e manaomia ai se avepasi ua i ai se laisene.

“E fausia le pasi e le aufaigaluega o Auaunaga o le Ola Tutoatasi. E tilivaina atu i le nofoaga autu o punaoa mo le ola tutoatasi, ma o le komiti o le ola tutoatasi a le siteki e faaleleia. O tagata tomai faapitoa mo le ola tutoatasi ma vaega e faagaoioia latou te fesoasoani i tagata e o i luga o le pasi (ae e tatau ona o lava latou ia i luga o le pasi). O le peresitene o le siteki ma epikopo o avepasi ia.

“E tatau ona faia e i latou uma la latou vaega e fesoasoani ai i tagata ia ausia le ola tutoatasi; peitai, afai e le kiina e le peresitene o le siteki ma epikopo a latou ki e ola ai le afi ma ave ai le pasi, e leai ma se tasi e alu i se mea.”

Ronald Aban, o le pule o Auaunaga mo le Ola Tutoatasi i Tacloban, Filipaina

O loo tele se manaoga i totonu o i tatou. O le toatele o tagata o le ekalesia e le o ola tutoatasi ma e leai se tomai e “saunia [ai] mea faaleagaga ma faaletino e manaomia o le olaga mo le tagata lava ia ma le aiga.”¹ O le aumaia o tagata ia ola tutoatasi o le galuega lea o le faaolataga. Na aoao mai Peresitene Thomas S. Monson: “O le [ola tutoatasi] o se mea taua mo lo tatou lelei faaleagaga faapea foi ma le faaletino. … ‘Ia tatou faalagolago le tagata ia te ia lava ma ia tutoatasi. E leai lava se isi mataupu e mafai ona maua ai le faaolataga.’” ²

O i latou o e manaomia ona ola tutoatasi atili e ono aofia ai i latou o e mauaina le fesoasoani o le taulaga anapogi, faifeautalai ua foi mai misiona, tagata na liliu mai talu ai nei, tagata ua le o toe toaaga mai, ma taitai perisitua e manaomia se galuega sili atu ona lelei. E ala atu i Lana Ekalesia, ua saunia nei e le Alii ni meafaigaluega fou malolosi, punaoa, ma faagasologa o loo faamatala i lenei taiala e fesoasoani ai i tagata o le ekalesia i lo latou auala i le ola tutoatasi.³

I le avea ai ma se taitai perisitua, o oe o se tasi o i latou lea na fetalai mai i ai le Alii, “Ua Ou tuu ia te outou … ki … mo le galuega a le auaunaga ma le faaatoatoaina o la‘u au paia” (MF&F 124:143), ma, “O ia e tuu atu i ai ia ki e leai se faigata e i ai i le mauaina o le malamalama o mea moni e faatatau i le olataga o le fanauga a tagata” (MF&F 128:11). Faitau le “O Le Faataoto i le Avepasi” i le itu taumatau. Faamolemole mafaufau loloto ma le faaeteete i lau matafaioi i le uunaia i luma o lenei taumafaiga taua.

Ua fatuina lenei taiala mo taitai e fesoasoani ia te oe a o e faaaogaina ou ki, faatulaga nei meafaigaluega fou, ma fesoasoani i tagata e fesoasoani ia i latou lava i le agai atu i le ola tutoatasi. Ao e faia faapea, o le a taitaia oe e le Agaga Paia ma o le a faia oe e le Alii ma Ana meafaigaluega i le siitiaina o e matitiva ma e le tagolima ma faanatinati Lana galuega o le faaolataga.

Lolomiina e Le Ekalesia a Iesu Keriso o le Au Paia o Aso e Gata Ai
Aai o Sate Leki, Iuta

Faamaonia le faa-Peretania: 6/15
Faamaonia le faaliliuga: 6/15
Faaliliuga o le Leader Guide
Samoan
12373 890