Sauniuniga a le Faifeautalai

Fetuunai i le Olaga Faafaifeautalai

Elder missionaries

Faamalo atu i lou ola agavaa ma saunia e maua se valaauga e auauna atu i le Alii. E lei i ai lava se isi taimi ua sili atu ona faafiafiaina e avea ai ma se faifeautalai. Ua saunoa mai le Au Peresitene Sili: “E leai se isi galuega e sili atu ona faatosina nai lo le [avea ai ma se faifeautalai], e leai foi se isi galuega e sili atu ona maua ai le faamalieina nai lo lenei. … Ua tofu faifeautalai uma ma se matafaioi taua e fesoasoani ai ‘ia aumaia le tino ola pea ma le ola faavavau o le tagata’ (Mose 1:39)” (Talai La’u Talalelei [2004], v). O lou avanoa la lenei e faaalu ai le isi 18–24 masina i auaunaga mo le taimi atoa i le Alii.

E manaomia e le galuega faafaifeautalai le tuua o se olaga na masani ona ola ai ma maua ni tomai e fesoasoani ai ia te oe ia faamanuiaina i se lalolagi fou ma e le masani ai. O lenei fesuiaiga e mafai ona faafiafiaina ma faapopoleina foi. O se mea masani le lagonaina o nei lagona uma e lua.

O lenei fesuiaiga e mafai ona faatusatusa i le suiga e ono oo i ai se tagata e te papatisoina i lau misiona. E malamalama uma le tagata fou ma le faifeautalai fou e tatau ona la’ua tuua le saogalemu o ala tuai o o la olaga ae ua le mautonu po o a mea e faamoemoeina po o le auala e amio ai i le olaga fou ua la filifilia i le avea ai ma se soo o Keriso. Pe a fetaiai tagata ma se siosiomaga fou, o le tele o mausa ma amioga ia na mafai ai ona latou gaoioi lelei atonu latou te le toe mauaina.

Sa faamatala mai e se tasi o faifeautalai i le ala lenei: “Sa lagonaina e la’u tagata sailiili le Agaga ma manao ai e mulimuli i le Faaola, ae sa popole foi o ia pe o le a faamanuiaina o ia ma taliaina. Sa fai si ona le lagonaina o le toafimalie ma sa le mautinoa ai po o le a le mea ua faamoemoeina. Sa ou iloaina na ou malamalama i ona lagona! Sa faapena foi ou lagona i le avea ai ma se faifeautalai: Sa ou fiafia ma popole foi, ma i le taimi muamua sa ou lagonaina le le atoatoa. Sa faamanatu mai e le Agaga ia te au lena aafiaga, ma sa fesoasoani ai ia ou malamalama i ona lagona ma le auala e fesoasoani ai ia te ia.”

E pei lava o le tuua ai e le tagata fou o talitonuga tuai, o uo, ma mausa, lea foi e masani ona oo i ai ia faifeautalai fou i sina tikeri o le atuatuvale po o le le toafimalie pe a latou tuua aiga, uo, ma nisi o mea na masani ona latou faia. O le tuua ai o siosiomaga e masani ai ae ulufale atu i se olaga faafaifeautalai—lea e ese ai meaai, faasologa o mea e fai, lavalava, ma atonu o le gagana—e ono faigata mo se taimi. O le fetuunai i lenei ituaiga o olaga fou e talitutusa lava i se aafiaga o se tagata fou lea e muai iloaina i le taimi muamua le faigata ona totogi o le sefuluai, ola i le Upu o le Poto, po o le tausia o le paia o le aso Sapati, e ui lava e i ai sona manao faamaoni e faia nei mea.

Aua nei faatagaina lenei faagasologa e faateia oe. Ia onosai a o e mauaina faamanuiaga o le tuuto atu atoatoa o lou olaga i le Faaola. Manatua, o le a faatasi le Agaga ma oe a o e faia lenei fesuiaiga ma o le a fesoasoani ia te oe i le fetuunaia atu i ou tiutetauave o se faifeautalai fou.

Fetuunai i Aafiaga Fou

E pei o le toatele ua ulufale atu i se tulaga fou, e masani lava ona faagasolo faifeautalai i ni vaega po o ni tulaga se fa i fetuunaiga o o latou lagona pe a latou ulufale atu i le NAF ma faapena foi pe a latou ulufale atu i a latou eria o le misiona.

1. Mea e ono faamoemoeina

• Atonu e te lagonaina le naunautai i le luitau (tagai 1 Nifae 3:7).

• Atonu e te lagonaina se lagona faateleina o le faamoemoega ma le tuuto atu i le Tama Faalelagi (tagai 3 Nifae 5:13).

2. Iloaina o mea e lei faamoemoeina

• Atonu e amata ona e misia le aiga, auaiga, ma uo ma e te ono fesiligia ai lau faaiuga e auauna atu (tagai Alema 26:27).

• Atonu e te maitaua ni faailoaga faaletino o le atuatuvale, e pei o le le lelei o le moe, suia o le tausami, po o le maitaitagofie.

• Atonu e faafuasei ona e iloaina ua e faitio ma le le onosai i tulafono ma mea ua faamoemoeina.

Mo le toatele, o nei lagona ua masani ai. Afai o ia te oe se faafitauli po o nei faafitauli uma, faamolemole ia iloa o se tulaga le tumau lea e oo i ai le toatele o faifeautalai fou. Ia lototele i le iloaina o nei lagona o le a mou atu ma o le a mafai ai ona e fetuutuunai.

Two sister missionaries stuying the scriptures

3. “E mafai ona ou faia lenei mea”

• E amata ona faaleleia ou tomai faafaiaoga ma le gagana.

• E te aoao ia tausisi ma le loto i ai i tulafono ma mea ua faamoemoeina o le misiona.

• E te faaalia le onosai ia te oe lava ia a o e aoaoina lea “mataupu i lea mataupu” (tagai Isaia 28:10; Mosaea 4:27).

• E amata ona faaitiitia faailoga faaletino o lou atuatuvale, pe afai e i ai.

4. Ola faalagolago faalelagona o le tagata ia te ia lava

• E te lagonaina le toafimalie a o faagasolo galuega masani faaleaso.

• E te iloaina ou malosiaga patino ma le alualu i luma.

• E te mauaina se malamalamaaga o le uiga o le ola i le olaga i le laa e tasi i le taimi (tagai MF&F 98:12).

• E te atiaeina se talitonuga o oe lava ia ma se manao faateleina e auauna atu.

O Mea e Mafai Ona E Faia i le Taimi Nei

• Saili i auala e auauna atu ai i isi. O le galuega faafaifeautalai o se valaauga e auauna atu. Valaau atu i le Atua mo ni avanoa e auauna atu ai ia i latou o siomia oe pe a e lagonaina le atuatuvale ma le popole. Taulai atu e vaai i fafo atu o ou lava ia lagona o le le toafimalie ina ia auauna atu ia i latou o loo manaomia se upu agalelei, se faatinoga o le alofa mama, po o le faauoga. (Tagai Talai La’u Talalelei, 183–84.)

• Taulai atu i le faamalosia o lau sootaga ma lou Tama Faalelagi. Saili atu i Lona Agaga e ala i le tatalo faaletagata lava ia, suesueina o tusitusiga paia, musika musuia, faitauina o le faamanuiaga faapeteriaka, ma isi auala e lelei mo oe. Fesili ia te oe lava ia po o le a le mea e aupito sili ona finagalo o Ia e te aoaoina mai lou aafiaga i le misiona, ma mafaufau loloto i ai pe o le a faapefea ona Ia fesoasoani ia te oe ia maua lenei aoaoga.

  Portrait of a happy, smiling, black missionary in his suit and tie and missionary name tag.

• Fesili atu i se faifeautalai ua foi mai e faasoa atu ni mea na te manatuaina e uiga i le uluai fetuunaiga na ia faia ma tuu atu ni fautuaga i auala e faafaigofie ai le fetuunaiga.

• Iloilo le tusiga “Preparing Emotionally for Missionary Service” saunia e Robert K. Wagstaff (i le Ensign, Mar. 2011, 22–26; o loo maua i le initoneti i le LDS.org).

• Atiae se uiga o le loto faafetai. Taulai atu mo ni nai minute i aso uma i mea e sa’o, lelei, ma aoga e uiga ia te oe lava ia ma le valaauga ua e mauaina. Tuu atu se tatalo o le loto faafetai i aso taitasi mo ni mea patino ua e faafetai ai e tusa ai ma lou valaauga o le misiona.

• Ia e agalelei ia te oe lava. Talanoa ia te oe lava ia i upu lava e tasi e faalaeiau ma agalelei e te faaaogaina i se isi tagata. E oso le le fiafia o tagata uma pe faia ni mea sese i nisi taimi. Ia iloa e malamalama le Alii. Mafaufau ia te Ia o loo alala latalata atu ia te oe, o loo faafofoga ma ofo atu le lagolago. Manatua, o mafaufauga o le le loto fesoasoani, leai o se faamoemoe, po o tausalaga matuia e le mai le Alii.

• Faamoemoe e tupu mea e le faamoemoeina. O ou aafiaga o se faifeautalai o le a le tutusa ma isi tagata. O le a le tutusa lelei mea uma e pei ona e fuafuaina pe sa e mafaufau e tatau ona i ai. Ia faamoemoeina mea ina ia ese mai nai lo mea na e mafaufau o le a oo i ai. O le suesueina o mea e te faamoemoeina o le a fesoasoani lea ia te oe ia e maua le loto matala ma taliaina ina ia suia.

Talanoaina ma Matua po o Taitai

O le talanoaina ma isi o lenei fetuunaiga o loo loma e mafai ona aoga. Faaavanoa se taimi e talanoa ai mea nei faatasi ma matua, taitai perisitua, po o uo faifeautalai ua foi mai:

• Aisea e taua ai se uiga lelei pe a fetuunai i tulaga fou.

• O mea e mafai ona tatou aoaoina mai faataitaiga faatusitusiga paia e uiga i le poloaiina e le Atua o tagata e faia mea ia e sili atu ma mea latou te lagonaina e mafai ona latou faia (tagai Esoto 4:10–12; Ieremia 1:6–9; Alema 17:10–12; 26:27; Eteru 12:23–27; Mose 6:31–32).

• Aisea e taua ai le alu e moe ma ala i luga i le taimi sao, tausisi i meaai lelei, faamalositino soo, ma fai tatalo patino (tagai Talai La’u Talalelei, viii).

• Aisea e fesoasoani ai le faatumauina o se lagona agamalie lelei ma le mafai ona e ata ia te oe lava pe a e faia se mea sese e faafaigofie ai le fetuunaiga.

• O le auala e mafai ai ona e faamanatu ia te oe lava o uluai lagona o le le toafimalie o le a le tumau ai pea.

• O mea e mafai e matua ma uo ona fai e fesoasoani ai i le uluai fetuunaiga.

• O le auala e mafai ona fesoasoani ai le tusitusi i se api talaaga pe a oo i aafiaga luitauina.

• O le auala sili e tali atu ai pe a le o ese ia mafaufauga po o lagona atuatuvale.

Aotelega

O se vaitau o fetuunaiga mo faifeautalai o se mea ua masani ai lava, ma e tele ina le maalofia, ma e le o se faailo o le leai o sou faatuatua po o se molimau. Mo le tele o faifeautalai fou, e tele se taimi e faaalu ina ia maua ai tomai talafeagai ina ia faamanuiaina ai. Manatua le fautuaga na tuu atu i le Perofeta o Iosefa Samita i se taimi faigata tele o lona olaga: “Ia e iloa lo’u atalii e, o nei mea uma e te maua ai le poto masani, ma o le a avea mo ou lelei” (MF&F 122:7).

A o e saunia e tuua mo se misiona, ia saunia e talia ni suiga. O le olaga o se faifeautalai o le a foliga mai e ese atu nai lo soo se mea ua e oo i ai, ae afai e te susu mai ma se uiga lelei, faatinoina o le faatuatua i le Alii, ma mafaufau i le manaomia ona onosai ia te oe lava ma isi, o le a tauia oe e le Alii ma faamanuiaina oe. Ua Ia folafola mai, “O le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (MF&F 84:88).

© 2013 Puletaofia e le Intellectual Reserve, Inc. Ua taofia aia tatau uma. Lolomi i le ISA. Faamaonia le FaaPeretania: 3/11. Faamaonia le faaliliuga: 3/11. Faaliliuga o le Missionary Preparation: Adjusting to Missionary Life. Samoan. PD50032393 890