Teuteu Fakafaifekaú

Fakaangaanga ki he Moʻui Fakafaifekaú

Elder missionaries

Talamonū atu ʻi hoʻo moʻui taau mo mateuteu ke tali e ui ke ngāue maʻá e ʻEikí. Kuo teʻeki ai ha taimi fakafiefia ange hangē ko e taimi ní, ke te hoko ai ko ha faifekau. Naʻe pehē ʻe he Kau Palesitenisī ʻUluakí: “ʻOku ʻikai mo ha toe ngāue ʻe fie maʻu ange ke fakahoko ka [ko e hoko ko ha faifekaú], pe toe ʻi ai mo ha ngāue te ne ʻomi ha ongo fakafiemālie lahi ange ka koe ngāué ni. … ʻOku ʻi ai ha fatongia mahuʻinga ʻo e faifekau kotoa pē ke tokoni ‘ke fakahoko ʻa e moʻui taʻe-faʻa-mate mo e moʻui taʻengata ʻa e tangatá’ (Mōsese 1:39)” (Malangaʻaki ʻEku Ongoongoleleí [2004], v). Ko ho faingamālie ʻeni ke fakaʻaongaʻi e māhina ʻe 18–24 ka hokó ʻi he ngāue taimi kakato ki he ʻEikí.

ʻOku fie maʻu he ngāue fakafaifekaú ke sītuʻa mei he tōʻonga moʻui angamahení kae maʻu ha ngaahi poto ke tokoniʻi koe ke ke ikuna ʻi ha māmani foʻou mo ʻikai anga ki aí. ʻE lava pē ke fakafiefia pea mo toe fonu palopalema ʻa e liliú ni. ʻOku angamaheni pē ke fakatou maʻu ʻa e ngaahi ongo ko ʻení.

ʻE ala fakafehoanaki ʻa e liliu ko ʻení ki ha liliu ʻoku foua ʻe ha taha ʻokú ke papitaiso ʻi hoʻo ngāue fakafaifekaú. ʻOku fakatou mahino ki he mēmipá mo e faifekau foʻoú kuo pau ke na mavahe mei he malu ʻo ʻena tōʻonga moʻui kimuʻá ka ʻoku ʻikai ke na fakapapauʻi e meʻa ʻoku tuʻunuku maí pe ko e meʻa ke fai ʻi he moʻui foʻou kuó na fili heʻena hoko ko e ākonga ʻa Kalaisí. Ko e taimi ʻoku fehangahangai ai e kakaí mo ha ʻātakai foʻou, mahalo he ʻikai ke nau toe maʻu e ngaahi tōʻonga mo e ʻulungaanga lahi naʻa nau lava ʻo ngāue lelei aí.

Naʻe fakamatalaʻi peheni ia ʻe ha faifekau ʻe taha: “Kuo ongoʻi heʻeku fiefanongó ʻa e Laumālié mo fie muimui he Fakamoʻuí, ka naʻá ne toe manavasiʻi foki pe te ne lavaʻi pea mo tali ia. Naʻá ne ongoʻi tuenoa mo ʻikai fakapapauʻi pe ko e hā ʻoku fie maʻú. Naʻá ku fakatokangaʻi naʻe mahino kiate au hono lotó! Naʻe ongo pehē kiate au ʻi heʻeku hoko ko e faifekaú: naʻá ku fakatou vēkeveke mo manavasiʻi, pea ʻi he kamataʻangá naʻá ku ongoʻi taʻe feʻunga. Naʻe fakamanatu kiate au ʻe he Laumālié ʻa e meʻa ko iá, pea naʻe tokoni ia ke mahino kiate au ʻene ngaahi ongó mo e founga ke tokoniʻi aí.”

Hangē ko e mavahe ʻa e mēmipa foʻoú mei heʻene ngaahi tuí, kaungāmeʻá, mo e tōʻonga kimuʻá, ʻoku angamaheni ʻaki ʻe he kau faifekau foʻoú ke aʻusia ha loto mafasia pe taʻe-fakafiemālie ʻi heʻenau mavahe mei he fāmilí, kaungāmeʻá, mo ha niʻihi ʻo e ngaahi meʻa ne nau faʻa faí. ʻE lava ʻo kiʻi faingataʻa ʻi ha vahaʻataimi ʻa e mavahe mei he ʻātakai angamahení kae hū ki he moʻui fakafaifekaú—ʻa ia ʻoku kehe ai ʻa e meʻakaí, taimi-tēpilé, teungá pea naʻa mo e lea fakafonuá. ʻOku tatau ʻa e fakaangaanga ki he tōʻonga moʻui foʻou ko ʻení mo e aʻusia ʻe ha mēmipa foʻou ʻi haʻane faingataʻaʻia ke totongi vahehongofulu, moʻui ʻaki e Lea ʻo e Potó, pe tauhi ʻa e ʻaho Sāpaté ke māʻoniʻoní, neongo ʻokú ne maʻu ha loto holi moʻoni ke fai ʻa e ngaahi meʻá ni.

ʻOua te ke tuku e meʻá ni ke hoko fakafokifā atu. Faʻa kātaki ʻi hoʻo maʻu ko ia e ngaahi tāpuaki ʻo e līʻoa kakato ange hoʻo moʻuí ki he Fakamoʻuí. Manatuʻi, ʻe ʻiate koe ʻa e Laumālié ʻi hoʻo fakahoko e liliu ko ʻení pea ʻe tokoni atu ʻi hoʻo fakaangaanga ki ho ngaahi fatongia fakafaifekau foʻoú.

Ko e Fakaangaanga ki he Ngaahi Aʻusia Foʻoú

Hangē ko e aʻusia ʻe ha tokolahi ha tūkunga foʻou, ʻoku faʻa foua ʻe he kau faifekaú ha tuʻunga pe tūkunga ʻe fā ʻi heʻenau liliu fakaelotó ʻi he taimi ʻoku nau hū ai ki he MTC pea mo e taimi ʻoku nau hū ai ki he malaʻe ʻo e ngāue fakafaifekaú:

1. ʻAmanaki atu

• Mahalo te ke loto vēkeveke ʻi he tukupaá (vakai, 1 Nīfai 3:7).

• Mahalo te ke ongoʻi ha tupulaki ʻi he taumuʻá mo e fakapapau ki he Tamai Hēvaní (vakai, 3 Nīfai 5:13).

2. Ko hono ʻilo ʻo e taʻe-ʻamanekiná

• Mahalo te ke kamata ke taʻe-lata mo ʻofa ki ʻapi, fāmilí, kaungāmeʻá pea aʻu ʻo ke fakafehuʻia hoʻo fili ke ngāué (vakai, ʻAlamā 26:27).

• Te ke ala fakatokangaʻi ha ngaahi fakaʻilonga fakaesino ʻo e loto mafasiá, hangē ko e ʻikai mohe maʻú, mole ʻo e uʻá, pe ʻitangofua.

• Mahalo ʻe fakaʻohovale haʻo ʻilo ʻokú ke fakaanga mo ʻikai fakamaʻumaʻu ʻi he ngaahi tuʻutuʻuní mo e meʻa ʻoku fie maʻú.

ʻOku angamaheni ha tokolahi ki he ngaahi ongo ko ʻení. Kapau ʻokú ke maʻu ha taha pe kotoa e ngaahi palopalema ko ʻení, kātaki ʻo ʻai ke ke ʻilo ko ha tuʻunga fakataimi pē ʻeni ia ʻoku foua ʻe ha kau faifekau foʻou tokolahi. Maʻu ha loto toʻa ʻi hoʻo ʻilo ʻe mole e ngaahi ongo ko ʻení pea te ke lava ʻo anga ki he ngāué.

Two sister missionaries stuying the scriptures

3. “Te u lava ʻo fai ʻeni”

• ʻE kamata ke fakalakalaka hoʻo faiakó mo hoʻo poto he lea fakafonuá.

• Te ke ako ke talangofua loto fiemālie ki he ngaahi tuʻutuʻuni mo e ngaahi fie maʻu ʻo e misioná.

• Te ke fakafōtunga e faʻa kātakí ʻi hoʻo ako ʻa e “fekau ki he fekau” (vakai, ʻĪsaia 28:10; Mōsaia 4:27).

• ʻE kamata mōlia atu e ngaahi fakaʻilonga fakaesino hoʻo loto mafasiá, kapau naʻe ʻi ai.

4. Moʻui fakafalala fakaeloto pē kiate kita

• Te ke ongoʻi nonga ʻi hoʻo fakahoko e ngaahi ngāue fakaʻahó.

• Te ke fakatokangaʻi ho ngaahi mālohinga fakatāutahá mo e fakalakalaká.

• ʻE mahino kiate koe ʻa e ʻuhinga ʻo hono fakahoko tahataha ʻo e ngaahi meʻa ki he moʻuí (vakai, T&F 98:12).

• Te ke fakatupulaki ha loto falala lahi ange kiate koe mo ha holi lahi ange ke ngāue.

Ngaahi Meʻa Te Ke Lava ʻo Fai he Taimi Ní

• Kumi ha ngaahi founga ke tokoniʻi ai ha niʻihi kehe. Ko e ngāue fakafaifekaú ko ha ui ia ke ngāue. Kole ki he ʻOtuá ha ngaahi faingamālie ke tokoniʻi kinautolu ʻoku mou feohí ʻi he taimi ʻokú ke loto hohaʻa ai pe tailiilí. ʻOua te ke nofo taha ki hoʻo ngaahi ongoʻi taʻe-fiemālié kae tokoni kiate kinautolu ʻoku nau fie maʻu ha lea ʻofá, ha tōʻonga ʻofa, pe anga fakakaumeʻá. (Vakai, Malangaʻaki ʻEku Ongoongoleleí, 202–4.)

• Tokanga taha ki hono fakamālohia ho vā fetuʻutaki mo hoʻo Tamai Hēvaní. Kolea Hono Laumālié ʻo fou he lotu fakatāutahá, ako folofolá, ngaahi fasi langaki moʻuí, lau ho tāpuaki fakapēteliaké, mo ha ngaahi founga kehe ʻe ʻaonga kiate koé. Fehuʻi pē kiate koe pe ko e hā ʻokú Ne fie maʻu taha ke ke ako mei he meʻa ʻokú ke aʻusia ʻi he ngāue fakafaifekaú, pea fakalaulauloto pe te Ne tokoniʻi fēfē koe ke ke maʻu ʻa e ʻilo ko ʻení.

  Portrait of a happy, smiling, black missionary in his suit and tie and missionary name tag.

• Kole ki ha taha ʻosi ngāue fakafaifekau ke ne vahevahe atu ʻene manatu ki heʻene ʻuluaki fakaangaangá mo ʻoatu ha ngaahi fokotuʻu ki he founga ke fakafaingofuaʻi ange ai ʻa e liliú.

• Toe vakaiʻi ʻa e fakamatala “Ko e Teuteu Fakaeloto ki he Ngāue Fakafaifekaú” naʻe fai ʻe Robert K. Wagstaff (ʻi he Ensign, Mar. 2011, 22–26; maʻu atu he ʻinitanetí ʻi he LDS.org).

• Fakatupulaki ha loto houngaʻia. Fakakaukau ʻi ha ngaahi miniti siʻi he ʻaho kotoa pē ki he meʻa ʻoku totonu, lelei, mo sai fekauʻaki mo koe pea mo e uiuiʻi kuó ke maʻú. Fai ha lotu fakafetaʻi ʻi he ʻaho kotoa pē ʻi ha ngaahi meʻa pau ʻokú ke houngaʻia ai fekauʻaki mo ho uiuiʻi fakafaifekaú.

• ʻAngaʻofa kiate koe. Fai kiate koe ʻa e ngaahi lea fakafiemālie tatau te ke fakaʻaongaʻi ki ha taha kehe. ʻOku tofuhia e taha kotoa pē he loto taʻe-fiemālié mo e fehalaakí. ʻIloʻi ʻoku mahino ki he ʻEikí. Sioloto ʻokú Ne ʻafio ʻi ho tafaʻakí, ʻo fanongo mo poupou atu. Manatuʻi, ʻoku ʻikai mei he ʻEikí ʻa e ngaahi fakakaukau tuenoá, siva ʻo e ʻamanakí, pe fakamalaʻiaʻi fefeká.

• ʻOua ʻe mūnoa. He ʻikai tatau hoʻo aʻusia ʻi hoʻo hoko ko e faifekaú mo ha aʻusia ʻa ha taha kehe. He ʻikai hoko ʻa e meʻa kotoa pē ʻo hangē ko ia kuó ke palaní pe ko ia naʻá ke pehē ʻoku totonu ke hokó. Fakakaukau ʻe kehe ʻa e ngaahi meʻá mei he meʻa ne ke fakakaukau ʻe hokó. ʻE tokoni haʻo vakavakaiʻi e ngaahi meʻa ne ke ʻamanaki ki aí ke ke loto tauʻatāina mo talingofua e liliú.

Aleaʻi mo e Mātuʻá pe Kau Takí

ʻE lava ʻo tokoni haʻo talanoa mo ha niʻihi kehe fekauʻaki mo e liliu ko ʻeni ʻoku teu hokó. Tuku ha taimi ke aleaʻi ai e ngaahi meʻa ko ʻení mo e mātuʻá, kau taki lakanga fakataulaʻeikí, pe kaungāmeʻa toki ʻosi ngāue fakafaifekaú:

• Ko e ʻuhinga ʻoku mahuʻinga ai e loto hangamālié ʻi he taimi ʻo e fakaangaanga ki ha ngaahi tūkunga foʻoú.

• Ko e meʻa te tau lava ʻo ako mei he ngaahi sīpinga fakafolofola ʻo e fie maʻu ʻe he ʻOtuá ke fai ʻe he kakaí ʻo mahulu atu mei he meʻa ʻoku nau pehē ʻoku nau malavá (vakai, ʻEkesōtosi 4:10–12; Selemaia 1:6–9; ʻAlamā 17:10–12; 26:27; ʻEta 12:23–27; Mōsese 6:31–32).

• Ko e ʻuhinga ʻoku mahuʻinga ai ke mohe pea mo ʻā taimi totonú, maʻu e meʻatokoni fakatupu moʻui leleí, fakamālohisino maʻu pē, pea mo lotu fakatāutahá (vakai, Malangaʻaki ʻEku Ongoongoleleí, viii).

• ʻUhinga ʻoku tokoni ai e poto ʻi he tūkuhua leleí mo e malava ke kataʻi pē kita ʻi he taimi ʻokú ke fai ai ha ngaahi fehalākí ke faingofua ange ʻa e fakaangaangá.

• Founga ke ke fakamanatu ai kiate koe ko e ngaahi ʻuluaki ongo taʻe-fakafiemālié he ʻikai ke fuoloa.

• Ko e meʻa ʻe lava ke fai ʻe he mātuʻá mo e kaungāmeʻá ke tokoni ʻi he kamataʻanga ʻo e fakaangaangá.

• Founga ʻe ala tokoni ai e tohi ʻo e tohinoá ʻi he taimi ʻoku foua ai ʻa e ngaahi faingataʻa vivilí.

• Founga lelei taha ke fai ʻi he taimi ʻoku ʻikai mavahe ai ʻa e ngaahi fakakaukau pe ngaahi ongo fakatupu palopalemá.

Fakamatala fakanounou

Ko e vahaʻataimi fakaangaanga ʻo e kau faifekaú ʻoku angamaheni ʻaki pē, ʻoku ʻikai ke faʻa mataʻofi ai, pea ʻoku ʻikai ko ha fakaʻilonga ia ʻoku ʻikai haʻo tui pe fakamoʻoni. Ko e tokolahi taha ʻo e kau faifekaú, ʻoku fie maʻu ha taimi ke maʻu ai ʻa e ngaahi poto ʻoku fie maʻu ke nau ikuná. Manatuʻi ʻa e faleʻi naʻe fai ki he Palōfita ko Siosefa Sāmitá ʻi he taimi mātuʻaki faingataʻa taha ʻo ʻene moʻuí: “Ke ke ʻiloʻi, ʻe hoku foha, ʻe foaki ʻe he ngaahi meʻá ni kotoa pē ʻa e poto kiate koe, pea ʻe hoko ia ʻo ʻaonga kiate koe” (T&F 122:7).

Mateuteu ke tali ʻa e ngaahi liliú ʻi hoʻo teuteu ke mavahe ʻo ngāue fakafaifekaú. ʻOku ngalingali ko e moʻui ʻi hoʻo hoko ko e faifekaú ʻe kehe ia mei ha toe meʻa kuo teʻeki ke ke aʻusia, ka, kapau te ke haʻu mo ha loto hangamālie, ʻo tui ki he ʻEikí, mo ʻamanaki ki he fie maʻu ke ke faʻa kātakiʻi koe mo e niʻihi kehé, ʻe fakapaleʻi mo tāpuakiʻi koe ʻe he ʻEikí. ʻOkú Ne talaʻofa, “Te u muʻomuʻa ʻi homou ʻaó. Te u ʻi homou nima toʻomataʻú pea ʻi homou toʻohemá, pea ʻe ʻi homou lotó ʻa hoku Laumālié, pea ʻe takatakai ʻa kimoutolu ʻe heʻeku kau ʻāngeló, ke poupouʻi hake ʻa kimoutolu” (T&F 84:88).

© 2013 ʻe he Intellectual Reserve, Inc. Maʻu ʻa e totonu fakalao kotoa pē. Paaki ʻi he USA. Fakangofua ʻi he lea faka-Pilitāniá: 3/11. Fakangofua ke liliú: 3/11. Liliu ʻo e Missionary Preparation: Adjusting to Missionary Life. Tongan PD50032393 900