Rongorongo man te Moan Beretitentii ao te Kooram n Abotoro n te Tengaun ma Uoman
Mauri Mitinare aika Kam Tangiraki:
Imwiin Mangautina, e kaoti Iesu Kristo nakoia Ana reirei ao n anga te tua nakoia bwa “a na kakiritianiia” (taraa Mataio 28:19, te bwai ae e na taraaki mai i nano a) “botanaomata ni kabaneia, ni bwabetitoiia nako nanon aran te Tama, ma te Nati, ma te Tamnei are Raoiroi: n reireiia bwa a na kabane baike I tuangngkami n tau”(Mataio 28:19–20).
Kam a tia ni weteaki man te kaotioti rinanon ana toro te Atua ake e a tia n rineia bwa kam na buokiia Abotoro n te mwakuri ae korakora n uotakin ana euangkerio Iesu Kristo nakon te aonaaba “ni kakiritianiia te botanoamata ni kabaneia.
Ngkana kam karaoa ami mwakuri ni mitinare ma nanomi ni kabane, kam na buoka kakoroan nanon tuua ake uoua aika korakora: “Tangira te Uea ae Atuam … [ao] tangira raom n ai aron tangiram i bon iroum” (Reirei ao Berita aika Tabu 59:5–6).
N riki bwa te mitinare ae nakoraoi, ko riai n riki bwa ana reirei ae kakaonimaki Iesu Kristo. Ti kaoi ngkami bwa kam na karakai ami tarena ao ami konabwai ibukin mimitongin te Atua. Iesu Kristo e na karikirakei ngkami. Tamara are i Karawa e tangiri ngkami, ao E na buoki ngkami n tangiriia ao ni kakabwaiaia Natina n taabo ake kam beku iai. E na kakorakorai ngkami ma aomata ake kam beku ibukiia, rinanon ana Mwakuri ni Kamaiu Iesu Kristo, ni koaua “n rairaki nakon te Uea” (Aramwa 23:6).
Kainibaire ibukiia mitinare aikai a kariaiakaki man te Moan Beretitentii ao te Kooram n Abotoro n te Tengaun ma Uoman. A na ibuobuoki ni kataniko n rabwatam, n tamneim, ao n am namakin ao ni buokiko n riki bwa ana reirei Iesu Kristo are ko riai ni karekea.
Ngkana iai am titiraki iaon kainibaire, tataro mwaaka ni butiia te Uea ana ibuobuoki bwa kona ota n aron kakawakina, ao imwiina ngkana ko kainnanoia, titirakina toam, am tia kairiiri ni mitinare ae kairake, ke temanna mai irouia am tia kairiiri ibukin te ibuobuoki. Kamatebwaia n tainako kainibaire aikai ma toam ao kataia n ongeaba nako iai.
Ti katekeraoiko ibukin butimwaean te wewete ni beku n te mition n ae bwanin taina, ao ti tataro bwa kona karekea te rau ni koaua ao te kimwareirei ni beku ibukin te Uea Iesu Kristo.
Te Moan Beretitentii ao te Kooram n Abotoro n te Tengaun ma Uoman
Ana Ekaretia Iesu Kristo ibukiia Aika Itiaki ni Boong aika Kaitira