Savali mai Le Au Peresitene Sili ma le Korama a Aposetolo e Toasefululua

Mo Le Faifeautalai Pele:

Ina ua tuanai Lona Toetu, sa faaali atu ai Iesu Keriso i Ona soo ma poloaiina i latou ina ia “fai i latou ma soo o” (tagai i le Mataio 28:19, i lona vaefaamatalaga a) “nuu uma, ma papatiso atu ia te i latou i le suafa o le Tama, ma le Alo, ma le Agaga Paia: aoao atu ia te i latou ia tausi i mea uma ua ou fai atu ai ia te outou” (Mataio 28:19–20).

Ua valaaulia oe i faaaliga e ala mai auauna filifilia a le Atua e fesoasoani i Aposetolo i lenei galuega maoae o le aveina atu o le talalelei a Iesu Keriso i le lalolagi ina ia fai ma soo o nuu uma.

Pe a e auauna atu i se misiona ma lou loto atoa, o le a e fesoasoani e faataunuuina poloaiga sili e lua: “Alofa atu i le Alii lou Atua … [ma] alofa atu i lou tuaoi faapei o oe lava ia te oe” (Mataupu Faavae ma Feagaiga 59:5-6).

Ina ia avea o se faifeautalai silisili ona lelei, e ao ona avea oe ma se soo faamaoni o Iesu Keriso. Matou te valaau atu ia te oe ina ia faalauteleina au taleni ma tomai mo le viiga o le Atua. O le a faalauteleina oe e Iesu Keriso. E alofa le Tama Faalelagi ia te oe, ma o le a fesoasoani ia te oe ina ia e alofa ma fesoasoani i Ana fanau poo fea lava e te auauna atu ai. O le a ia faamanaina oe ma tagata o le a e auauna iai, e ala i le Togiola a Iesu Keriso, ina ia “liua atoatoa i le Alii” (Alema 23:6).

O nei tulaga faatonuina faafaifeautalai ua faamaonia e le Au Peresitene Sili ma le Korama a Aposetolo e Toasefululua. O le a latou fesoasoani e puipuia oe faaletino, faaleagaga, ma le faalelagona ma fesoasoani ia avea oe o se soo o Iesu Keriso e ao ona avea ai oe.

Afai e iai ni au fesili i se tulaga faatonuina, ia fesili atu ma le agaga tatalo i le Alii e fesoasoani mai ina ia e malamalama i lona taua, ma pe a manaomia, fesili i lau soa, o au faifeautalai taitai talavou, po o se tasi o ou taitai faamisiona mo se fesoasoani. Suesue e le aunoa i nei tulaga faatonuina ma lau soa ma taumafai ina ia usiusitai iai.

Matou te faamalo atu ia te oe mo le taliaina o le valaauga e auauna o se faifeautalai faamisiona, ma e matou te tatalo o le a e maua le filemu moni ma le olioli i le auauna atu i le Alii o Iesu Keriso.

Au Peresitene Sili ma le Korama a Aposetolo e Toasefululua

O Le Ekalesia a Iesu Keriso o le Au Paia o Aso e Gata Ai