Fultaem Misinari Eksperiens blong Yu

1.0

Fas Toktok

Misin blong yu i no rili stat long dei ia we oli setem yu apat, mo i no rili en long dei ia we yu stap rilis. Wan misin i no olsem we blong stap putum yunifom blong wok , o yunifom blong skul long moning, mo stap tekemaot long en blong dei we i finis. Stat long taem ia we oli bin baptaesem yu, yu bin stap long kavenan rod ia we i tekem yu i go long hapines, glad mo pis we i no save finis. Fultaem eksperiens blong yu i save stap olsem wan taem we i jenisim yu, be tu, i mas pat blong misin eksperiens blong laef blong yu.

Taem yu lukluk wetem wan lukluk we i go long taem we i no save finis, fultaem eksperiens blong yu i moa bitim blong stap tikim wan bokis long pepa—hem i minim blong gohed blong kam wan disaepol blong Jisas Kraes, ful laef blong yu.

Profet Josef Smit i bin stap tingting longtaem long ol blesing mo ol spesel janis we yumi gat taem we yumi disaed blong kam pat blong bigfala wok ia blong fasin blong sevem man. Hem i bin askem ol fasfala Sent se: “Ol brata [mo ol sista]. ?Olsem wanem? ?Bae yumi no gohed long wan bigfala wok olsem? Go fored be i no arier. !Gat strong paoa long tingting ol brata [mo sista]; mo gohed, go fored kasem viktri! Bae yumi letem hat blong yumi i mas stap glad, mo stap glad tumas” (Doktrin mo Ol Kavenan 128:22).

Yu mas laekem eksperiens blong yu olsem wan misinari long sem wei we yu lavem God mo lavem neba blong yu. Hemia i wan taem blong stap glad mo blong filim hapines mo pis ia we i stap longtaem, tru long Jisas Kraes.

1.1

Fasin blong stap obei

Ol tru disaepol blong Jisas Kraes, oli stap obei. Sevya i bin tijim: “Sapos yufala i lavem mi, bambae yufala i save obei long ol tok blong mi” (Jon 14:15). Blong stap obei long olgeta komanmen, i minim se yu yu wantem mo yu fetful blong mekem wanem we Lod i stap askem yu blong mekem from se yu yu lavem Hem, mo tu, from se yu yu stap mekem wetem “fasin blong stap glad” (Kolosi 1:11) mo wetem “tingting … i stap daon, mo [wetem] glad tumas (Ol Wok 2:46).

Jisas Kraes hem i nambawan eksampol blong fasin blong stap fetful wetem fasin we i stret gud evriwan. Hem i bin mekem nomo folem tingting blong Papa blong Hem. Folem Hem taem yu mekem bes blong yu blong stap obei long evriwan long ol komanmen blong Hem, mo blong yu stap laef folem ol misinari standet. Blong stap fetful mo stap obei, i minim tu se yu stap traem blong lanem samting, blong yu stap traem blong groap, mo kam gud moa; se yu stap traem blong stretem kwik ol mistek blong yu; mo yu stap tekem responsabiliti from ol aksen blong yu.

Ol misin lida blong yu bae oli helpem yu oltaem blong yu lanem olsem wanem blong yusum olgeta prinsipol we oli stap insaed long hanbuk ia.

Bambae yu sef moa taem yu stap folem ol komanmen mo ol misinari standet mo taem yu stap yusum gudfala tingting blong yu. Be yu mas luksave se, iven taem yu stap obei long olgeta komanmen, bae yu gotru long sam trabol, sam sik, o sam kil (luk long Jon 16:33). Sevya i bin gotru long evriwan long olgeta samting ia (luk long Alma 7:11–12; Doktrin mo Ol Kavenan 122:8), mo Hem i promesem: “Mi no save lego yufala i stap nomo olsem. Bambae mi mi save kambak bakegen long yufala” (Jon 14:18).

God i lavem yu Jusum blong stap obei long olgeta komanmen from se yu yu lavem God. Yu no traem blong mekem sam dil wetem Lod mo yu ting se Lod bae i givim samfala spesifik blesing taem bae Hem i stretem samting folem ol samting we yu yu askem. Ol samting ia we oli wantem luk se bae yu yu holemtaet mo leftemap, Fas Presidensi mo Kworom blong Olgeta Twelef Aposol nao oli apruvum, mo oli stap tu insaed long ol standet ia. Eksampol: Yu no traem blong mekem wan dil wetem Lod taem yu girap eli, no kakae o dring (livim kaekae i bitim evri taem), o taem yu skipim wan priperesen dei.

1.2

Ol Standet blong Laef

God i stap invaetem yu blong dediketem yu long Hem truaot long laef blong yu. Ol misin standet, olsem stadi blong yuwan, setem ol gol, mo stret mo gud fasin blong yusum teknoloji, bambae i blesem yu long misin blong yu, mo bambae i helpem yu long ful laef blong yu.

Letem ol komanmen insaed long ol skripja, ol prinsipol insaed long Prijim Gospel blong Mi: Wan Gaed long Misinari Seves (2019), mo ol standet blong ol misinari we oli putum insaed long buk ia, oli kam olsem ol prinsipol we oli soem rod long ful laef blong yu. Taem we yu stap folem ol komanmen mo ol standet, bambae Hem i daerektem, blesem, mo gaedem yu truaot long laef blong yu.