En̄jake eo Am̧ kōn Full-Time Mijen eo Am̧

1.0

Kadkad In

Mijen eo am̧ rekar jab lukkuun jino ilo raan eo raar kōjenoļo̧k eok im eban jemļo̧k ilo raan eo rej kōtļo̧k eok. Mijen eo ejjab āinwōt n̄e kwoj kōņak uniboom̧ in jerbal ak jikuuļ ilo jibbon̄ wōt im bar utikki n̄e ejemļo̧k raan eo. Jān iien eo kwar peptaij, em̧ōj am̧ pād ilo iaļ in bujen eo me ej tōlļo̧k n̄an m̧ōņōņō indeeo, lan̄lōn̄ im aeņōm̧m̧an. En̄jake ko kōn full-time mijen emaron̄ erom̧ juon iien eaorōk me ej ukōt kōj ak ej aikuj erom̧ juon m̧ōttan eo eaorōk ilo mour in mijenede eo am̧.

N̄e kalimjōkļo̧k jān juon ļōmņak eo n̄an indeeo, en̄jake eo am̧ jān full-time mijen eļapļo̧k jān juon bo̧o̧k kwoj jāāk e n̄an kadedeļo̧k—ej juon men eļap unin n̄an wōnm̧aanļo̧k n̄an erom̧ juon rikaļoor an Jisōs Kraist ilo aolepān mour eo am̧.

Rikanaan Josep Smith ekar ļōmņak kōn kōjeraam̧m̧an ko im iien ko rem̧m̧an letok n̄an kōj n̄e jej kāālet n̄an erom̧ juon m̧ōttan jerbal in lo̧mo̧o̧r in eļap. Ekar kajjitōk ippān Rikwojarjar ro m̧oktata, “Ro jeiū im jatū, [im kōrā ro], ta jeban bun̄m̧aanļo̧k ilo juon jibadbad eļap ke? Bun̄m̧aanļo̧k im jab kōmtālik. Kom̧in peran, ro jeiū im jatū, [im kōrā ro]; im wōnm̧aanļo̧k, wōnm̧aanļo̧k n̄an anjo̧! Būruōmi ren lan̄lōn̄, im m̧ōņōņō otem m̧ōņōņō.” (Katak im Bujen Ko 128:22).

Lem̧ōņōņō kōn en̄jake in mijenede eo am̧ āinwōt am̧ iakwe Anij im iakwe riturūm̧. Iien in ej juon iien n̄an lan̄lōn̄ im en̄jake m̧ōņōņō eo ejjeļo̧k jem̧lo̧kin im aenōm̧m̧an kōn Jisōs Kraist.

1.1

Pokake

Rikaļoor ro rem̧ool an Jisōs Kraist rej pokake. Rilo̧mo̧o̧r ekar katakin, “Eļan̄n̄e kwōj yokwe eō, kōjparok kien ko aō” (Jon 14:15). Kōjparok kien ko ej meļeļe in bwe kwoj m̧ōņōņō im tiljek n̄an kōm̧m̧ane ta eo Irooj ej kajjitōk kōnke kwoj iakwe E im barāiwōt bwe kwoj kōm̧m̧ane ilo “lan̄lōn̄” (Kolosse 1:11) im “ṃōṇōṇō im eṃṃan burueir,” (Jerbal 2:46).

Jisōs Kraist ej waanjon̄o̧k eo an tiljek eweppān. E ekar kōm̧m̧ane wōt ankilaan Jemān. Ļoor E ilo am̧ kōm̧m̧ane ijo kwomaron̄e em̧m̧antata n̄an kōjparok aolepān kien ko An im mour kōn jon̄ak ko an mijenede. Tiljek im pokake ej barāinwōt meļeļein bwe kwoj kajjeon̄ n̄an ekkatak, eddōkļo̧k, im em̧m̧anļo̧k; m̧ōkaj im kajim̧we bōd ko; im bōk make eddo ko kōn kōm̧m̧an ko am̧.

Ritōl ro am̧ ilo mijen renaaj ikutkut aer jipan̄ eok ekkatak wāween mour kōn katak ko ilo bok in bōk meļeļe in.

Enaaj ļap am̧ pād ilo kōjparok eļan̄n̄e kwonaaj ļoor kien ko im jon̄ak ko an mijenede im kōjerbal jeļā eo ilo kwe. Ak jeļā bwe men̄e kwonaaj kōjparok aolep kien ko, kwonaaj ioon jorrāān, nan̄inmej, ak metak (lale Jon 16:33). Rilo̧mo̧o̧r ekar en̄jake aolepān men kein (lale Alma 7:11–12; Katak im Bujen Ko 122:8), im E ekar kallim̧ur, “I jāmin likūt koṃ atajinemjen; I naaj iwōj ñan koṃ” (Jon 14:18).

Anij ej iakwe eok. Kālet n̄an kōjparok kien ko kōnke kwoj iakwe Anij. Jab kajjeon̄ in kōm̧m̧an karōk ko ippān Irooj im kōtmene kōjeraam̧m̧an ko rejeņoļo̧k ilo am ukukōt ta eo emenin aikuj n̄an kwe. Men ko aikuj kōtmeni jān kwe n̄an am̧ kōm̧m̧ani rej kōmālim jān Būreejtōnji eo Kein Kajuon im Doulul eo an Jon̄oulruo Rijilōk ro. N̄an waanjon̄o̧k, jab kajjeon̄ kōm̧m̧an karōk ippān Irooj bwe en m̧ōkaj am ruj, wōnm̧aanļo̧k wōt ilo am̧ jab m̧ōn̄ā im draak (ilōn̄inļo̧k jitlo̧k eo aolep allōn̄), ak joļo̧k raan in kōppopo.

1.2

Jon̄ak ko an Mour

Anij ej kūr eok n̄an leļo̧k mour eo am̧ n̄an E ilo aolepān mour eo am̧. Jon̄ak ko an mijen ko āinwōt ekkatak an juon make, kōm̧m̧an kōttōpar, im jim̧we ilo kōjerbal teknaļōji enaaj kōjeram̧m̧an kwe ilo mijen eo am̧ im jipan̄ eok ilo aolepān mour eo am̧.

Kōtļo̧k bwe kien ko ilo jeje ko rekwojarjar, katak ko ilo Preach My Gospel: A Guide to Missionary Service (2019), im jon̄ak ko an mijenede kar kōllaajraki ilo bok in rej erom̧ pedped in katak in tōl ko an to̧o̧n wōt am̧ mour. Ilo am̧ ļoor kien ko an Anij im jon̄ak ko, E enaaj kajebwebweik, kōjeraam̧m̧an, im tōl eok ilo aolepān mour eo am̧.