Gawi sa Misyonaryo

3.0

Pasiuna

Kini nga seksiyon naghulagway sa mga sumbanan sa misyonaryo kabahin sa pamatasan ug Kristohanon nga mga kinaiya nga gilaoman nga imong praktison ug ugmaron atol sa imong misyon samtang mahimo ka nga mas mapahinungoron nga disipulo ni Jesukristo. Sumala sa gitambag ni propeta Moroni, nga “Nahinumdom sa pulong sa Dios nga nag-ingon nga pinaagi sa ilang mga buhat kamo masayud kanila; kay kon ang ilang mga buhat maayo, sila maayo usab” (Moroni 7:5).

3.1

Kristohanon nga Pamatasan

Mag-ampo ug maningkamot sa pag-ugmad og Kristohanon nga mga hiyas sama sa gihulagway diha sa mga kasulatan ug sa Isangyaw ang Akong Ebanghelyo, lakip sa pagkamapasalamaton, pagkamabination, pagkamahigugmaon, pagkamapainubsanon, pagkamapailobon, pagkamasinabtanon, ug pagkamasulundon. Inubanan sa tabang sa Manluluwas ug sa imong kaugalingong sinsero ug makugihon nga mga paningkamot, makaugmad ka og Kristohanong mga hiyas (tan-awa sa Mosiah 3:19).

Pagmabination, pagpositibo, ug pagmadasigon. Magmanggihunahunaon sa matag sitwasyon sa tawo, mangutana sa imong kaugalingon sama niini:

Ulahi na ba kaayo o sayo pa kaayo aron kontakon kini nga tawo? Makasamok ba kaha kini sa oras sa pamilya o sa personal nga oras?
Aduna bay paagi nga makatabang ko niining sitwasyon?
Kini ba nga aksiyon o komentaryo makapaulaw, makapasuko, o makapasilo ba sa usa ka tawo?
Unsay tukma alang niini nga kultura?

Bisita ka niini nga dapit nga imong giserbisyohan ug kinahanglang motratar sa mga tawo ug sa mga dapit uban sa pagtahod ug pagdayeg. Respetohi ang mga kustombre, mga relihiyoso nga tinuohan ug mga buhat, ug ang sagradong mga dapit diha sa imong area sa tanang panahon. Pag-amping nga ang imong mga aksiyon dili makasilo ni bisan kinsa nga tawo. Hinumdomi, nga unsay imong isulti ug unsay imong buhaton mahimong madungog, maobserbahan, ug masulat.

Alang sa dugang nga impormasyon tan-awa sa seksiyon 7.3 sa, “Pagtahod sa Uban,” ug sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.6.14, “Diskriminasyon,” diha sa Gospel Library.

3.2

Katakos sa Pagsulod sa Templo

Ang Ginoo nga si Jesukristo nagdapit kaninyo nga “mag-andam sa inyong mga kaugalingon, ug magbalaan sa inyong mga kaugalingon; oo, limpyohi ang inyong mga kasingkasing, ug hugasi ang inyong mga kamot ug ang inyong mga tiil diha sa akong atubangan, aron Ako makahimo kaninyo nga limpyo” (Doktrina ug mga Pakigsaad 88:74). Tipik niining pagpangandam naglakip sa pagtuman sa imong mga pakigsaad sa templo.

3.2.1

Mga Pakigsaad sa Templo

Ang pagtuman sa mga pakigsaad sa templo sa pagkamasulundon, pagsakripisyo, ug pagpahinungod makapalig-on kanimo ug makatabang nimo nga mahimong mas sama sa Manluluwas.

Bisan kon walay templo diha sa imong misyon, paghupot og bag-ong rekomend sa templo aron matabangan ka nga mapahinumdoman sa imong mga pakigsaad. Hangyoa ang imong presidente sa misyon alang sa interbiyo sa rekomend sa templo sa dili pa mo-expire ang imong rekomend.

3.2.2

Pagsimba sa Templo

Kon ang usa ka templo anaa sa duol, ang imong presidente sa misyon mahimong motugot nimo ug sa ubang mga misyonaryo sa pagtambong og panagsa sa adlaw sa pagpangandam.

Alang sa dugang nga impormasyon tan-awa sa seksiyon 7.4, “Pagtambong sa Templo.”

3.3

Ang Balaod sa Kaputli

Ang usa ka pakigsaad sa templo nga imong gihimo mao ang pagtuman sa balaod sa kaputli. Buhata ang tanan nimong mahimo aron panalipdan ang imong kaugalingon, imong kompanyon, ug ang uban gikan sa sekswal nga tentasyon nga mahimong mosangpot sa paglapas niini nga balaang pakigsaad. Ang pagbuhat og mga butang nga makalapas sa balaod sa kaputli mahimong maisip nga krimen sa ubang mga dapit.

Kinahanglan imong likayan ang bisan unsang hunahuna o aksyon nga makapahimulag nimo gikan sa Espiritu sa Dios. Naglakip kini apan dili limitado ngadto sa pagpanapaw; pakighilawas nga dili pa minyo; mga kalihokan sa managsamang sekso [same-sex activity]; pakighilawas gamit ang baba [oral sex]; pagpagana sa sekswal nga mga pagbati; dili angay nga paghikap; pagpadala o pagdawat og mga mensahe, mga imahe, o mga bidyo nga imoral o sekswal ang kahimtang; pagpagana sa kinatawo alang sa sekswal nga kalipay; ug pagtan-aw o paggamit og pornograpiya (tan-awa sa 7.5.3). Tan-awa sa Alang sa Kalig-on sa mga Kabatan-onan, “Ang inyong lawas sagrado,” 22–29, alang sa dugang nga impormasyon.

Ang Ginoo nagtudlo, “si Satanas nagtinguha sa paglaglag” (Doktrina ug mga Pakigsaad 132:57) ug mohimo kanimo nga “mahimo nga mauyamot sama ngadto kaniya” (2 Nephi 2:27). Siya mogamit sa mga tawo, sa dili tukma nga mga media, ug sa ubang mga tentasyon sa paglingla, paglit-ag, paghulga, ug pagpakaulaw kanimo. Pananglitan, pagmainampingon ilabi na gayod niadtong kinsa lagmit mobungat og pinansyal nga bayad agig bugti sa dili pagbutyag sa makapakompromiso o dili angay nga mga imahe ug mga mensahe nga lagmit imong napadala ngadto kanila.

Kon nanglimbasog ka sa pagtuman niining mga sumbanan o kon adunay tawo nga naghulga nimo, pangayo og tabang sa Ginoo ug pakig-istoryahi gayod dayon ang imong presidente sa misyon.

3.4

Pagkamatinuoron

Ang katakos sa pagsulod sa templo naglakip sa pagkamatinuoron sa tanan nimong pakigsabot sa uban. Sa misyonaryo nga serbisyo, kini naglakip sa:

Pagsulti sa kamatuoran, ilabi na ngadto sa imong presidente sa misyon kalabot sa imong gawi, pagpamatuod, mga nabatasan sa trabaho, ug sa emosyonal ug sa pisikal nga kahimsog.
Paghatag og hustong mga report sa imong buhat ug kon giunsa nimo sa paggamit ang imong oras sa tibuok semana diha sa imong sinemana nga mga report.
Paggamit og pundo sa misyon sa responsabling paagi ug pagbalik sa husto nga mga resibo.
Pagkamasaligan ug dili gayod mohatag og dili tinuod nga report o dili tinuod nga impormasyon mahitungod ni bisan kinsang tawo, lakip na sa imong kompanyon.
Pagmatinahuron sa uban pinaagi sa dili pagpanghulam, pagpanguha, o pagpanggamit og mga personal nga mga butang sa usa ka tawo (lakip sa sinina, mga libro, elektronik nga mga himan, ug alahas) nga walay pagpananghid.

3.5

Pakig-inter-aksyon sa Uban

Ang Manluluwas nagtudlo, “Kini mao ang akong sugo: paghigugmaay kamo sama nga ako nahigugma kaninyo” (Juan 15:12). Pilia ang pagsunod sa ehemplo sa Manluluwas ug molihok sa mga paagi nga matinahuron, luwas, ug tukma sa sitwasyon.

3.5.1

Kinatibuk-ang mga Sumbanan alang sa Pagpakig-inter-aksyon sa mga Hamtong

Palig-una ang pagsalig ug ang makahuluganon nga mga relasyon niadtong imong giserbisyohan, lakip sa mga tawo nga imong gitudloan, ubang mga misyonaryo, ug lokal nga mga miyembro. Ipakita ang pagka-propesyonal ug pagkamabination, ug sunda kini nga mga sumbanan:

Magkuyog permi sa imong kompanyon.
Ayaw panambag sa mga hamtong mahitungod sa personal nga mga problema. Iduso ang mga miyembro ngadto sa ilang bishop kon nagkinahanglan sila og pagtambag. Kon sa imong pamati ang usa ka tawo sa laing tinuohan nagkinahanglan og tabang sa personal nga mga problema, pakig-istorya sa imong presidente sa misyon.
Likayi ang mga sitwasyon nga lagmit peligroso sa pisikal o espiritwal o nga mahimong masaypan sa pagsabot.
Ayaw pag-ibid-ibid o pakig-istorya sa dili angay nga paagi ni bisan kinsa. Limitahi ang pisikal nga pakigkontak uban sa usa ka tawo nga kaatbang og sekso kutob sa paglamano.
Siguroha kanunay nga adunay laing hamtong nga pareha nimo og sekso ang anaa uban kanimo ug sa imong kompanyon kon ikaw mobisita sa personal, motudlo sa personal, mobiyahe uban sa, o mangaon uban sa usa ka tawo nga kaatbang og sekso. Pangayo og pagtugot sa presidente sa imong misyon alang sa bisan unsa nga eksepsiyon.
Ipabilin nga ligdong ang imong pinulongan ug likayi ang paggamit og dili pormal nga mga pinulongan. Paggamit og tukma nga mga tawag kon mosangpit sa uban. Pananglitan, gamita ang tawag nga “Elder” o “Sister” kon mosangpit ngadto sa ubang misyonaryo aron sa pagpakita og pagtahod alang sa ilang calling.

3.5.2

Kinatibuk-ang mga Sumbanan alang sa Pagpakig-inter-aksyon sa mga Bata

Alang sa imong seguridad ug ingon man ang seguridad sa mga bata, hugti sa pagsunod ang mosunod nga mga lagda:

Magkuyog permi sa imong kompanyon.
Dili gayod mag-inusara kauban ni bisan kinsa nga nagpangidaron og ubos sa 18.
Pagmainampingon kabahin sa pagpakigdula uban sa grupo sa mga bata, sama sa pag-apil og soccer o ubang mga dula. Ayaw pagbuhat og bisan unsang butang diin ang imong mga aksyon lagmit masaypan sa pagsabot.
Kon mahimo, pananghid sa ginikanan sa pagpakig-inter-aksyon sa usa ka bata.
Ayaw panggitik sa mga bata, pag-ilis og mga diaper, paggunit o paggakos sa mga bata, o pagtugot sa mga bata nga magpasabak. Kini nga mga lihok mahimong dili angay o mahimong masaypan sa pagsabot.
Matinahoron nga mobalibad sa pagbantay og mga bata sa bisan unsa nga edad.
Ayaw pag-apil diha sa serbisyo nga mga kalihokan diin mahimong ikaw ra kauban sa mga bata (tan-awa sa 7.2.2).

3.6

Paglingaw-lingaw

Makakat-on ka sa mas hingpit nga paghigugma sa mga tawo nga imong giserbisyohan pinaagi sa pagbaton og bug-os nga kaikag diha sa ilang kultura, kasaysayan, yuta, ug mga tradisyon pinaagi sa mga pagbisita og mga lokal nga mga dapit nga makapa-interes, kasagaran atol sa adlaw sa pagpangandam (tan-awa sa 2.5).

Pangutan-a kadtong imong nahimamat sa pagrekomendar og tukma ug luwas nga mga lugar nga bisitahan. Pagpili og mga kalihokan nga makapadasig ug makatabang nimo nga mobati og kahayahay. Ang tukma nga mga dapit nga bisitahon mahimong maglakip (apan dili limitado) sa mosunod:

Makasaysayanon ug pangkultura nga mga dapit
Mga museyo ug mga galeriya
Mga zoo ug mga parke

3.6.1

Kinatibuk-ang mga Sumbanan sa Paglingaw-lingaw

Likayi ang magpundok-pundok isip dakong grupo sa mga misyonaryo diha sa mga pangpubliko nga mga lugar. Normal lang, nga kini nagpasabot nga dili kamo magrupo-grupo sa pagpundok nga mas dako pa sa inyong district. Ang pagbuhat sa ingon makadani og wala kinahanglana nga pagtagad o makahimo sa mga tawo nga mobati og kahadlok.

Mogamit lang sa mga sakyanan sa misyon alang sa mga kalihokan nga gitugotan sa inyong presidente sa misyon.

Mag-ehersisyo ug mag-aktibo aron magpabilin ang kalagsik sa imong lawas alang sa misyonaryo nga buhat. Modula og paugnat sa kusog sa mga paagi nga malikayan ang mga kaangol ug hilabihan nga kaluya.

3.6.2

Wala Itugot nga mga Kalihokan

Kanunayng mag-amping ug gamiton ang sentido komon kon moapil sa lingaw-lingaw nga mga kalihokan. Tungod kay dunay mga misyonaryo nga grabing naangol samtang nag-apil sa risgo nga mga kalihokan, kinahanglan dili ka moapil sa mga kalihokan nga may kalambigitan sa nagkadakong risgo atol sa imong misyon. Kining mga kalihokan naglakip apan dili limitado sa mosunod:

Mga sport nga dunay kontak, gymnastic, winter, ug sa tubig (lakip sa paglangoy)
Mountain climbing ug rock climbing
Magmotorsiklo ug mangabayo
Mosakay sa pribado nga mga sakayan o mga eroplano
Maggunit og mga pusil
Maggamit og mga pabuto o mga eksplosibo sa bisan unsa nga matang

Tan-awa kini nga bidyo alang sa dugang nga impormasyon mahitungod sa seguridad sa paglingaw-lingaw.

16:41

3.6.3

Media

Pagpili og aprobado ug tukma nga media aron sa pagdapit sa Espiritu ug sa pagtabang kanimo sa pagpatuman sa imong misyonaryo nga katuyoan. Kini sa kinatibuk-an nagpasabot nga:

Mogamit sa social media, mobile nga mga app, ug online nga media nga aprobado sa imong misyon sa pagtudlo sa ebanghelyo ug sa pagpakig-istorya sa imong pamilya ug mga higala (tan-awa sa 3.9).
Maglikay sa telebisyon, mga salida, mga video game, ug wala gitugot nga mga bidyo.
Magpili og mga audiobook, musika, ug basahonon nga materyal nga makapa-usbaw sa imong hugot nga pagtuo diha kang Jesukristo. Kinihanglan kini nga sagrado, nagdapit sa Espiritu, ug makapabayaw (tan-awa sa Kinatibuk-ang Tamdanan nga Basahon, 19.1).

Tan-awa sa mga sumbanan sa teknolohiya sa misyonaryo alang sa dugang nga impormasyon (tan-awa sa 7.5). Hisgoti ang mga pangutana mahitungod sa media uban sa imong mga lider sa misyon.

3.6.4

Mga Instrumento sa Musika

Kon aprobahan sa imong presidente sa misyon, mahimo kang magdala og instrumento sa musika ngadto sa natad sa misyon. Kinahanglang dili kini mahal, sayon dad-on sa biyahe, ug sakto ra sa mga kinahanglanon sa bagahe. Ang matang sa instrumento kinahanglang angay sa mga miting sa Dominggo (tan-awa sa Kinatibuk-ang Tamdanan nga Basahon,, 19.3.6).

Mahimo kang magpraktis sa instrumento sa adlaw sa pagpangandam ug sa ubang mga higayon nga gisulti sa imong presidente sa misyon. Kon mopatukar sa instrumento, hunahunaa ang imong mga silingan ug ang ubang mga misyonaryo ug sa unsang paagi sila maapektahan. Ang matang sa musika nga imong ipatukar sa instrumento kinahanglang sagrado, ligdong, ug haom sa misyonaryo nga buhat.

3.7

Mga Litrato ug mga Bidyo

Ang mga litrato makatabang nimo sa pagpakigbahin og mga kasinatian sa imong misyon sa mga tawo sa inyoha ug mahimong makahuluganon nga mga pahinumdom sa imong misyon. Kon magkuha og mga litrato o magrekord og mga bidyo, pag-amping nga dili maulawan si bisan kinsa nga tawo, lakip sa ubang mga misyonaryo ug mga tawo kinsa nagkalisod sa ekonomikanhon, sa katilingbanon, o sa pisikal nga mga hagit. Ang ubang mga tawo mahimong dili gusto nga ikaw o ang ubang tawo nga motan-aw, mopakigbahin, o mapahinumdoman sa unsay makita diha sa litrato. Pananghid sa dili pa mokuha ug mopakigbahin og mga litrato o mga bidyo. Sa pipila ka mga misyon, mahimong dili ka tugotan nga mopakigbahin diha sa publiko og mga litrato ni bisan kinsang tawo nga inyong gitudloan tungod sa lokal nga mga balaod sa pagkapribado.

Ang pagkuhag piho nga litrato mahimong makapasilo o ilegal sa ubang mga kultura ug mga lugar. Ang pipila ka mga ehemplo naglakip sa pagkuha og mga litrato sa:

Piho nga mga gambalay sa gobyerno ug militar.
Binantayan nga mga dapit sa mga tugpahanan (airport), sa mga pagtsek sa pasaporte, sa mga border crossing, sa mga konsulado, ug mga embahada.
Pwersa sa balaod o kawani sa militar.
Mga tawo, mga gambalay, o mga kalihokan sa ubang mga tinuohan.
Mga butang nga sensitibo sa kultura, lakip sa mga tawo nga nagsul-ob og sinina nga pangtradisyon.
Mga tawo nga nanglimbasog sa kakabos, sa sakit, o sa mga kakulangan.

Isip kinatibuk-an nga lagda, ayaw kuhai og mga litrato ang mga butang, mga lugar, o mga tawo nga nalista sa ibabaw. Hisgoti ang bisan unsa sa imong mga pangutana uban sa imong mga lider sa misyon.

Ang Simbahan usab adunay piho nga mga palisiya mahitungod sa pagkuha og mga litrato sa mga meetinghouse:

Ayaw pagkuha og mga litrato o magrekord og bidyo sulod sa meetinghouse sa mga chapel.
Ayaw litratohi, ipadala, o irekord ang mga sagradong mga ordinansa, lakip sa sakramento ug mga bunyag ug mga kompirmasyon.

Tan-awa kining bidyo alang sa dugang nga impormasyon mahitungod sa mga lagda sa pagkuha og mga litrato ug mga bidyo.

5:24

3.8

Paggamit sa Teknolohiya

Ang Ginoo namahayag, “Tan-awa, Ako modali sa akong buluhaton diha sa iyang angay nga panahon” (Doktrina ug mga Pakigsaad 88:73). Ang teknolohiya mahimong usa ka himan sa pagpakigbahin sa mga pagtulun-an sa ebanghelyo ni Jesukristo ug kinahanglang gamiton sa matarong nga paagi.

Alang sa dugang nga impormasyon tan-awa sa seksiyon 7.5, “Teknolohiya.”

3.9

Komunikasyon sa Pamilya, sa mga Lider sa Misyon, ug sa mga Higala

Ang imong pamilya, mga lider sa misyon, ug mga higala mahimong usa ka dakong abag nganha nimo sa imong misyon. Pakig-istorya sa adlaw sa pagpangandam ngadto sa imong pamilya ug sa mga tawo sa uban nga dapit, lakip na ang mga miyembro o kadtong inyong natudloan. Lig-ona sila samtang kamo mopakigbahin og espirituhanon nga mga kasinatian ug pagpamatuod.

Kon ikaw makig-istorya sa laing mga tawo (gawas sa imong pamilya), kinahanglan nga limitahan nimo ang inyong komunikasyon pinaagi sa email o sulat ug dili pinaagi sa telepono o video chat, gawas kon giaprobahan sa presidente sa inyong misyon.

Unaha sa paggahin sa imong oras ang importanteng mga butang sa adlaw sa pagpangandam pinaagi sa pagpakig-istorya una sa imong mga ginikanan ug ikaduha sa imong presidente sa misyon.

Pagmaalamon sa pagtino sa gidugayon sa imong pakig-istorya. Sa pagbuhat niini nga mga desisyon, magmahunahunaon sa imong kompanyon ug timan-i ang katuyoan sa imong misyonaryo nga pagserbisyo.

Mahimo nimong basahon ang bisan unsang mga komunikasyon nga imong nadawat atol sa semana kon aduna kay tukma nga panahon sa pagbuhat sa ingon. Kinahanglan nimong tubagon ang mga komunikasyon diha lang sa adlaw sa pagpangandam gawas kon kini usa ka emerhensiya (tan-awa sa 3.9.7).

3.9.1

Pamilya

Mahimo kang makig-istorya sa imong pamilya sa imong sinemana nga adlaw sa pagpangandam pinaagi sa mga sulat, mga email, mga mensahe sa text , sa online nga mensahe, tawag sa telepono, ug mga bidyo chat.

Gamita ang giaprobahan nga pamaagi sa komunikasyon nga labing maayo alang nimo ug sa imong pamilya ug minos ang gasto aron masulod ra sa imong binulan nga badyet. Magkalain-lain kini depende sa mga kahimtang, lokasyon, ug nasabotang higayon [schedule].

Kon ang imong mga ginikanan nagpuyo sa managlahi nga mga lokasyon, mahimo kang mokontak sa matag ginikanan sa adlaw sa pagpangandam.

Giawhag usab ikaw sa pagkontak sa imong pamilya sa ubang espesyal nga mga okasyon, sama sa Pasko, Mother’s day, Father’s Day, sa mga adlawng natawhan sa imong mga ginikanan, ug ubang mga holiday nga importante sa imong gigikanan nga nasod o kultura.

Kinahanglan ikaw ang mopasiugda sa tanang pagpadala og mensahe sa text, online nga pagpadala og mensahe, mga pagtawag sa telepono, ug mga bidyo chat. Kon ang imong pamilya kinahanglan nga mokontak nimo, kinahanglan mokontak una sila sa presidente sa misyon.

Kon makig-istorya sa imong pamilya sa telepono o sa bidyo chat, pagmaalamon sa pagtino sa tagal sa imong mga tawag. Sa pagbuhat niini nga mga desisyon, magmahunahunaon sa imong kompanyon ug timan-i ang katuyoan sa imong misyonaryo nga pagserbisyo.

3.9.2

Presidente sa Misyon

Pagsulat ngadto sa imong presidente sa misyon kada semana atol sa adlaw sa pagpangandam. Sa kasagaran, imong isumiter ang imong sulat ngadto kaniya gamit ang Missionary Portal.

Ang imong presidente sa misyon lamang ang morebyo sa imong sinemana nga sulat. Pagmadayagon ug matinuoron aron nga iyang masabtan ang bisan unsa nimong mga kabalaka ug makahatag og may kalabotan nga tambag ug opinyon alang sa imong paglambo [feedback]. Palihog hibaloi nga siya mobasa apan dili makahimo sa pagtubag sa matag sulat.

Kon makadawat ka og importanteng balita gikan sa inyoha nga nagkinahanglan og dinalian nga pagtagad, pahibaloa ang imong presidente sa misyon ug pakigsusi kaniya sa dili pa mokontak sa imong pamilya sa mga adlaw nga lahi sa adlaw sa pagpangandam o sa espesyal nga mga okasyon.

3.9.3

Pakig-istorya sa mga Tawo diha sa Imong Misyon

Samtang ikaw mokontak sa mga tawo gikan sa ubang mga dapit sa imong misyon, siguroha nga ang imong komunikasyon nakatutok sa pagtuman sa imong misyonaryo nga katuyoan. Sunda ang mga sumbanan diha sa seksiyon 3.5.1, “Kinatibuk-ang mga Sumbanan alang sa Pagpakig-inter-aksyon sa mga Hamtong” ug sa Pag-amping sa Paggamit sa Teknolohiya, ug hinumdomi sa paglakip sa imong kompanyon samtang ikaw moapil niini nga mga komunikasyon.

3.9.4

Mga Package ug mga Sulat

Ang ubang mga misyon mahimong mogamit sa address sa opisina sa misyon aron madawat ang sulat ug mga package ug isip maoy imong return address. Kini nga buhat makapanalipod sa imong seguridad ug makatabang nga malikayan ang pagpangawat ug pagkawala sa sulat gumikan sa pagbalhin. Palihog sunda ang tanang lagda nga imong madawat sa maong sitwasyon.

3.9.5

Misyonaryo nga mga Kasinatian sa mga Tawo nga gikan sa Imong Dapit

Mahimong aduna kay nailhan nga tawo sa imong dapit kansang personal nga kasinatian makatabang sa tawo nga inyong gitudloan diha sa imong misyon. Kinahanglan mananghid ka sa imong presidente sa misyon alang niana nga tawo aron siya makapakigbahin sa iyang kasinatian ug pagpamatuod. Pakigtambag sa maong tawo mahitungod sa labing maayo nga teknolohiya nga gamiton sa komunikasyon.

Kon ang imong pamilya o mga higala gikan sa imong dapit gustong makat-on og dugang mahitungod sa ebanghelyo ni Jesukristo, ang imong presidente sa misyon mahimong motugot nimo sa pagtudlo kanila gamit ang teknolohiya (tan-awa sa 7.5.4).

3.9.6

Personal nga mga Pagbisita gikan sa Pamilya ug mga Higala

Sa kinatibuk-an, ang pamilya ug mga higala kinahanglan dili mobisita kanimo panahon sa imong misyon. Apan, ubos sa espesyal nga mga kahimtang, ang imong presidente sa misyon mahimong mohatag og usa ka pagtugot. Kini nga mga pagbisita kinahanglan mubo ra ug dili makabalda sa imong misyonaryo nga mga katungdanan. Ang pagbisita kinahanglan dili ikasamok sa imong kompanyon, sa uban nga mga misyonaryo, o sa mga tawo nga imong gitudloan. Pag-amping nga ang bisan unsa nga pagbisita dili makapahilayo sa imong mga hunahuna gikan sa imong pagserbisyo o makamugna og pinansyal nga problema alang sa imong pamilya.

3.9.7

Mga Emerhensiya

Kon ang imong pamilya magsulti kanimo og usa ka emerhensiya didto sa panimalay, pahibaloa ang imong mga lider sa misyon aron makahatag sila nimo og suporta. Ang mga lider sa misyon mokontak sa imong pamilya kon ikaw adunay sitwasyon sa emerhensiya.