Amioga a Faifeautalai

3.0

Faatomuaga

E faamatalaina i le vaega lenei tulaga faatonuina o amioga faa-Keriso mo faifeautalai e manaomia ona e faataitaia ma atiae i le taimi o lau misiona a o e agai atu e avea oe o se soo tuuto sili atu o Iesu Keriso. E pei ona fautua mai e le perofeta o Moronae, “Manatua le afioga a le Atua ua fetalai mai o a latou galuega tou te iloa ai i latou; aua afai ua lelei a latou galuega, ua lelei foi i latou” (Moronae 7:5).

3.1

Amioga Faa-Keriso

Tatalo ma galue e atiae uiga Faa-Keriso e pei ona faamatala mai i tusitusiga paia ma i le Talai Lau Talalelei, e aofia ai le faafetai, agalelei, alofa, loto maulalo, onosai, lagona alofa, ma le usiusitai. I le ma le fesoasoani a le Faaola ma au lava taumafaiga faamaoni ma le maelega, e mafai ona e atiae uiga FaaKeriso (tagai Mosaea 3:19).

Ia agalelei, lelei ma faagaeetia. Ia mafaufau lelei i tulaga o tagata taitasi, ma fesili ifo ia te oe lava ni fesili e pei o nei:

Pe ua tuai ea pe vave tele ona faafesootai lenei tagata? Pe o le a faalavelave ea lenei mea i le taimi o le aiga po o taimi patino?
E iai se auala e mafai ona ou fesoasoani ai i lenei tulaga?
Pe le o lenei uiga po o faamatalaga e faamaasiasi, faafefe, pe faaita ai se isi?
O le a le mea e talafeagai mo lenei aganuu?

O oe o se tagata asiasi mai i le eria o loo e auauna atu ai ma e tatau ona tausia tagata ma nofoaga i le faaaloalo ma le agaga faafetai. Faaaloalo i aganuu, talitonuga ma faiga masani faalelotu, ma nofoaga sa i lau eria i taimi uma lava. Ia faaeteete i ou uiga ina ia le faaita ai se tasi. Manatua, o mea e te tautala atu ai ma mea e te faia atonu e lagona, matau, ma faamauina.

Mo nisi faamatalaga tagai i le vaega 7.3 “Faaaloalo mo Isi,” ma le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata ai, 38.6.14, “Faapito,” i le Gospel Library.

3.2

Agavaa mo le Malumalu

Ua valaau atu le Alii o Iesu Keriso ia te oe e “saunia outou lava, ma faapaia outou lava, ioe, ia faamama o outou loto, ma faamama o outou lima ma o outou vae i ou luma, ina ia mafai ona Ou faamamaina outou” (Mataupu Faavae ma Feagaiga 88:74). O se vaega o lenei sauniuniga e aofia ai le tausia o feagaiga o le malumalu.

3.2.1

Feagaiga o le Malumalu

O le tausiga o feagaiga o le malumalu o le usiusitai, ositaulaga, ma le faapaiaina o le a faaeaina ai oe ma fesoasoani e avea atili oe e faapei o le Faaola.

E tusa pe leai se malumalu i lau misiona, tausia se pepa faataga o le malumalu e fesoasoani e faamanatu atu ai ia te oe au feagaiga. Fesili i lau peresitene o le misiona mo se faatalanoaga o se pepa faataga o le malumalu a o lei uma le aoga o lau pepa faataga.

3.2.2

Tapuai i le malumalu

Afai e latalata ane se malumalu, e mafai e lau peresitene o le misiona ona faatagaina oe ma isi faifeautalai e auai i nisi o taimi i aso o sauniuniga.

Mo nisi faamatalaga tagai i le vaega 7.4 “Auai i le Malumalu.”

3.3

O Le Tulafono o le Legaviā

O se tasi o feagaiga sa e faia o le usiusitai i le tulafono o le legaviā. Fai mea uma e te mafai e puipuia ai oe lava, lau soa, ma isi mai faaosoosoga faalefeusuai e ono oo atu ai ina solia le feagaiga paia. O le faia o mea e solia ai le tulafono o le legaviā e ono manatu o se solitulafono i nisi o eria.

E ao ona e aloese mai ni mafaufauga po o faatinoga e ono vavaeeseina ai oe mai le Agaga o le Atua. E aofia ai i lenei ae le faagata ai i le mulilua, faitaaga, amioga feusuai a le itupa tutusa, faaaogaina o le laulaufaiva, faaosofaia o le lagona feusuai, tago le talafeagai, auina atu po o le maua o ni feau feaveai, ata, po o vitio e le mama ma feusuai lona natura, pule i le tino, ma le matamata po o le faaaogaina o ponokalafi (tagai i le 7.5.3). Tagai i le Mo Le Malosi o le Autalavou, “E paia lou tino,” 22–29, mo nisi faamatalaga faaopoopo.

Ua aoao mai le Alii, “ua saili Satani e faaumatia” (Mataupu Faavae ma Feagaiga 132:57) ma fai ia tatou “faanoanoa uma e pei o ia lava” (2 Nifae 2:27). O le a ia faaaoga tagata, ala o fesootaiga le talafeagai, ma isi faaosoosoga e taufaasese, mailei, faafefe, ma faamaasiasi ia te oe. Mo se faataitaiga, ia faaeteete faapitoa mai ia i latou o e faamalosi mai le totogi atu o ni tupe e taui ai le le faaalia o ni ata fetuunai pe le talafeagai ma feau feaveai na e auina atu ia te i latou.

Afai o loo e tauivi e tausia ia tulaga faatonuina po ua faamatauina oe e se tasi, tagi atu i le Alii mo se fesoasoani ma vave ona talanoa ma lou peresitene o le misiona.

3.4

Faamaoni

Ina ia ulufale atu i le malumalu e tatau ona e faamaoni i au fegalegaleaiga uma ma isi. I auaunaga faafaifeautalai, o lenei e aofia ai:

Tau atu o le mea moni, aemaise lava i lou peresitene o le misiona e tusa ai ma lau amio, molimau, galuega, ma le soifua maloloina faalelagona ma le faaletino.
O le tuuina atu o lipoti faamaoni o lau galuega ma le auala na faaaluina ai lou taimi i le faagasologa o le vaiaso i lau lipoti faalevaiaso.
O le faaaogaina o tupe a le misiona ma le tatau ma le faafoiina atu o lisiti sao.
O le faatuatuaina ma le le tuuina atu lava o se lipoti sese po o ni faamatalaga le tonu e uiga i se tasi tagata, e aofia ai ma lau soa.
Faaaloalogia o isi e ala i le le nono mai, aveina, po o le faaaogaina o ni mea a se isi tagata (e aofia ai lavalava, tusi, masini faaeletonika, ma mea teuteu tino) e aunoa ma se faatagaga.

3.5

Fegalegaleaiga ma Isi

Sa aoao mai le Faaola, “O la’u poloaiga lenei, Ia outou fealofani, pei ona ou alofa atu ia te outou” (Ioane 15:12). Filifili e mulimuli i faataitaiga a le Faaola ma amio ai i uiga e faaaloalo, saogalemu, ma talafeagai mo le tulaga.

3.5.1

Faatulagaga Faalauaitele mo Fesootaiga ma Tagata Matutua

Fausia le faatuatua ma le vafealoaloai lelei ma i latou o loo e auauna atu iai, e aofia ai tagata o loo e aoaoina, isi faifeautalai, ma tagata o le lotoifale. Ia aloaia lelei ma agalelei, ma mulimuli ai i nei tulaga faatonuina:

Nofo faatasi ma lau soa i taimi uma.
Aua le fautuaina tagata matutua e uiga i faafitauli patino. Faasino atu tagata i o latou epikopo pe a manaomia fautuaga. Afai e te lagona o loo manaomia e se tasi o se isi tapuaiga se fesoasoani i faafitauli patino, talanoa i lou peresitene o le misiona.
Aloese mai tulaga e ono avea ma faafitauli faigata faaletino po o le faaleagaga po o le le malamalama iai.
Aua e te faatafai pe fegalegaleai le talafeagai ma se tasi. Faatapulaa fesootaiga faaletino ma se tasi o le itupa faafeagai i le faatalofa o lima.
Ia mautinoa i taimi uma le iai o se tasi tagata o le itupa e tutusa ma oe ma lau soa pe a oulua asiasi, aoao atu, malaga faatasi, pe taumamafa faatasi ma se isi o le isi itupa. Saili se faamaoniga mai lau peresetene o le misiona mo soo se faatagana.
Ia tausia le mamalu o lau gagana ma aloese mai le faaaogaina o upu faauigalua. Faaaoga tatau ia igoa pe a faailoa atu isi tagata. Mo se faataitaiga, faaaoga le igoa “Elder” po o le “Sister” e faasino i isi faifeautalai e faailoa ai le faaaloalo mo lo latou valaauga.

3.5.2

Faatulagaga Faalauaitele mo Fesootaiga ma Tamaiti

Mo lou saogalemu, atoa ai ma le saogalemu o tamaiti, ia tagai ma le totoa i taiala o loo i lalo:

Nofo faatasi ma lau soa i taimi uma.
Aua nei tuua na o oe ma se tamaitiiti e i lalo ifo o le 18 tausaga.
Ia faaeteete e taaalo ma vaega o tamaiti, e faapei o le auai i se taaloga soka po o se isi taaloga. Aua lava nei e faia soo se mea e ono faauigaseseina ai lau amio.
Pe a mafai, ia maua mai se faatagaga a matua e te fesootai ai ma se tamaitiiti.
Aua le eneina tamaiti, sui taipa, sii pe fusi i tamaiti, pe faataga tamaiti e sii i ou vae. O nei amioga e ono foliga e le talafeagai pe faauigaseseina.
Faaaloalo e aua le talia e tausitama i fanau i soo se matua.
Aua e te auai i ni gaoioiga auauna atu i le tuua ai na o oe ma tamaiti (tagai 7.2.2).

3.6

Faafiafiaga

E mafai ona e aoao le alofa ma le atoatoa i tagata o loo e auauna iai i le faaalia o lagona fiafia i la latou aganuu, talafaasolopito, fanua, ma tu masani e ala lea i asiasiga i nofoaga o le lotoifale e maua ai le fiafia, e masani ai i asoo sauniuniga (tagai 2.5).

Fesili ia i latou tou te feiloai iai e fautua mai nofoaga talafeagai ma le saogalemu e asiasi iai. Filifili gaoioiga e siitia ae ai ma fesoasoani e maua ai le malologa lelei. O nofoaga talafeagai e asiasi iai e aofia ai (ae le gata ai) i mea o loo taua i lalo:

Nofoaga o talafaasolopito ma aganuu
Falemataaga ma fale o galuega tusiata
Nofoaga e tausi ai manu ma paka

3.6.1

Faatulagaga Faatonuina Lautele mo Faafiafiaga

Aloese mai le faatasitasi o ni vaega toatele o faifeautalai i nofoaga faitele. E masani ai, o lona uiga e le tatau ona outou faatasitasi i ni vasega e sili atu nai lo le toatele o lau itu. O le faia o lea o le a faatosina atu ai le agaga le talafeagai pe maua ai foi e tagata le lagona fefe.

Faaaoga na o taavale a le misiona mo gaoioiga ua faataga mai e lau peresitene o le misiona.

Faamalositino ma galue ina ia malosi lou tino mo le galuega faafaifeautalai. Taalo i taaloga i auala e le faamanualia ai ma maua ai le vaivai tele.

3.6.2

Gaoioiga e le Faatagaina

Ia maua pea le saogalemu ma faaaoga le mafaufau tatau pe a auai i gaoioiga faafiafia. Ona sa faamanualia ogaoga faifeautalai a o auai i gaoioiga e ono lavevea ai, e le tatau ona e auai i ni gaoioiga i le taimi o lau misiona e faateleina ai le avanoa e faamanualia ai. O nei gaoioiga e aofia ae le gata ai ia i latou o loo mulimuli mai:

Taaloga fepaiai ai tino, tagafiti, ma taaloga o le taumalulu, ma le vai.(e aofia ai ma le aau)
Ae i mauga ma maa
Tietie i uila afi ma solofanua
Tietie i vaa patino po o vaalele
Taulimaina o fana
Faaaogaina o afi po o mea faapapa o soo se ituaiga

Matamata i le vitio lenei mo nisi faamatalaga e faatatau i le saogalemu o mea faafiafia.

16:40

3.6.3

Ala o faasalalauga

Filifili ala o fesootaiga faatagaina ma alagatatau ina ia valaauina ai le Agaga ma fesoasoani e faataunuuina ai le faamoemoega o lau misiona. O le uiga faalauaitele o lenei faapea:

O le faaaogaina o ala o faasalalauga faaleagafesootai, masini feaveai, ma ala o faasalalauga i le initoneti ua faamaonia mo lau misiona mo le aoaoina o le talalelei ma fesootaiga ma lou aiga ma uo (tagai 3.9).
O le aloese mai televise, ata, taaloga vitio, ma vitio e le faatagaina.
O le filifilia o tusi faitau e faalogologo iai, musika, ma le fautauina o tusitusiga e faamalosia ai lou faatuatua ia Iesu Keriso. E ao ona paia ia mea, valaaulia le Agaga, ma siisii ae ai (tagai i le Tusitaulima Aoao, , 19.1).

Tagai i tulaga faatonuina o tekinolosi faafaifeautalai mo nisi faamatalaga( tagai 7.5). Talanoaina fesili e uiga i le ala o faasalalauga ma ou taitai o le misiona.

3.6.4

Mea Faimusika

Afai e faatagaina e lou peresetene o le misiona, e mafai ona aumai sau mea faimusika i le misiona. E le tatau ona taugata, faigofie ona feavea’i ma mafai ona talafeauga ma tulaga manaomia o ato malaga. E tatau ona talafeagai le ituaiga laau o faimusika mo sauniga o le Aso Sa (tagai i le Tusitaulima Aoao,, 19.3.6).

E mafai ona a’oa’oina lau mea faimusika i aso o sauniuniga ma nisi taimi e faatonuina ai e lou presetene o le misiona. A tata lau mea fai musika, mafaufau i ou tuaoi ma isi faifeautalai po’o le a so latou aafiaga ai. O le ituaiga musika e te taina e tatau ona paia, faamamaluina ma talafeagai ma le galuega faafaifeautalai.

3.7

Ata ma Vitio

E mafai ona fesoasoani ata e faasoa atu ai ou aafiaga o lau misiona ma tagata i aiga ma avea o ni faamanatu tatau o lau misiona. Pe a pueina ata pe pueina vitio, ia faaeteete ina ia le maasiasi se tasi, e aofia ai isi faifeautalai ma tagata o loo feagai ma luitau o mea tautupe, faalelagona po o le faaletino. O nisi o tagata atonu e le manao ia te oe po o isi e vaai, faasoa, pe manatuaina i mea o loo faaali mai i le ata. Fesiligia se faatagaga a o lei pueina ma faasoaina atu o ata po o vitio. I nisi o misiona, atonu e le faatagaina oe e faasoa atu i le lautele ata o se tasi o loo e aoaoina ona o tulafono o aia a tagata taitoatasi o le lotoifale.

O le pueina o nisi o ata atonu e le talafeagai faaletulafono i nisi o aganuu ma nofoaga. O nisi faataitaiga e aofia ai le pueina o ata o:

Nisi o fale o le malo ma le militeri.
Vaega o le saogalemu i le malae vaalele, ofisa e siaki ai tusifolau, laasia o tuaoi, ofisa o le konesula, ma amepasa.
Leoleo po o tagata o le militeri.
Tagata, fale, po o gaoioiga a isi faatuatuaga.
Mataupu ma’ale’ale o le aganuu, e aofia ai tagata i o latou laei faaleaganuu.
Tagata o loo tauivi ma le mativa, ma’i, po o e le atoatoa.

O se taiala lautele, aua nei pueina ata o mea, nofoaga, po o tagata o lisi atu i luga. Talanoa ni fesili o ia te oe ma ou taitai o le misiona.

E iai foi faiga faavae patino a le Ekalesia e uiga i le pueina o ata i falelotu:

Aua le pueina ata po o vitio i falesa.
Aua le pueina ata, auina atu, pe pueina vitio o sauniga paia, e aofia ai ma le sauniga o le faamanatuga ma papatisoga ma faamauga.

Matamata i le vitio lenei mo nisi faamatalaga e faatatau i tulaga faatonuina mo le pueina o ata ma vitio.

5:24

3.8

Faaaogaina o Tekinolosi.

Ua folafola mai e le Alii, ‘Faauta, o le a Ou faanatinatiina la’u galuega i lona taimi’ (Mataupu Faavae ma Feagaiga 88:73). E avea le tekinolosi ma meafaigaluega e faasoa ai aoaoga o le talalelei a Iesu Keriso ma e ao ona faaaogaina ma le amiotonu.

Mo nisi faamatalaga tagai i le vaega 7.5 “Tekinolosi.”

3.9

Fesootaiga ma Aiga, Taitai o Misiona, ma Uo

O lou aiga, taitai o le misiona, ma uo e mafai ona avea ma lagolago sili ia te oe i lau misiona. Fesootai i le aso o sauniuniga ma lou aiga ma tagata mai isi eria, e aofia ai tagata o le Ekalesia ma i latou sa e aoaoina. Faamalosiau atu ia i latou a o e faasoa atu ou aafiaga faaleagaga ma lau molimau.

Pe a e fesootai i isi tagata (e le aofia ai lou aiga), e ao ona faatapulaa au fesootaiga i imeli, po o tusi ae le o telefoni poo vitio, sei vagana ua faatagaina mai e lau peresetene o le misiona.

Ave le faamuamua o lou taimi i le aso o sauniuniga e fesootai ai ma ou matua muamua ma lau peresetene o le misiona lona lua.

Ia outou popoto e faatulaga taimi o au fesootaiga. I le faia ai o nei faaiuga, e tatau ona e mafaufau lelei i lau soa ma manatua le faamoemoega o lau auaunaga faafaifeautalai.

E mafai ona e faitau i soo se fesootaiga ua e maua i le faagasologa o le vaiaso pe a maua sou taimi talafeagai e fai ai. E ao ona e tali atu i fesootaiga lava i le na o le aso o sauniuniga sei vagana ua iai se faalavelave faafuasei (tagai i le 3.9.7).

3.9.1

Aiga

E mafai ona e fesootai atu i lou aiga i aso o sauniuniga faalevaiaso e ala i tusi, imeli, feau feaveai, feau i le initonei, telefoni, ma talanoaga i luga o le vitio.

Faaaoga le auala o fesootaiga faatagaina e galue lelei mo oe ma lou aiga ma e le tele sona totogi ina ia e tumau ai i totonu o lau paketi faalemasina. O le a fesuisuia’i lenei mea e fuafua i tulaga, nofoaga, ma faatulagaga.

Afai e nonofo ou matua i nofoaga eseese, e mafai ona e fesootai i matua taitasi i ni taimi eseese i aso o sauniuniga.

Ua uunaia foi oe ia fesootai atu ma o latou aiga i isi aso faapitoa e pei o le Kerisimasi, Aso o Tina, Aso o Tama, aso fanau o ou matua, ma isi aso malolo ia e taua i le atunuu po o le aganuu a le faifeautalai.

E tatau ona e amatalia talanoaga uma i feau tusitusia, feau i le initoneti, valaau i telefoni, ma talanoaga faavitio. Afai e manaomia e lou aiga ona faafesootai oe, e tatau ona latou faafesootai muamua lava le peresetene o le misiona.

Pe a fesootai ma lou aiga i le telefoni po o le talanoa i le vitio, ia atamai i le faatulagaina o le umi e fai ai lau telefoni. I le faia ai o nei faaiuga, e tatau ona e mafaufau lelei i lau soa ma manatua le faamoemoega o lau auaunaga faafaifeautalai.

3.9.2

Peresetene o le Misiona

Tusi se tusi i lau peresetene o le misiona i vaiaso taitasi i aso o sauniuniga. I lona aotelega, o le a e tuuina atu lau tusi ia te ia e faaaoga ai le Saite a le Faifeautalai.

Ua na o lau peresetene o le misiona o le a tagai i lau tusi faalevaiaso. Ia maua le mafaufau tatala ma faamaoni ina ia mafai ai ona ia malamalama i ni toatuga o loo ia te oe ma tuuina atu ai ni fautuaga tatau ma tali atu ai. Faamolemole ia e iloa o le a ia faitau, ae o le a le mafai ona tali atu i tusi uma lava.

Afai ua e maua se tala taua mai lou aiga e manaomia ona faasalalau vave, tau atu i lou peresetene o le misiona ma siaki ma ia a o e lei faafesootaia lou aiga i aso e ese mai le aso o sauniuniga i ni tulaga faapitoa.

3.9.3

Feso’ota’iga ma Tagata i Lau Misiona

A’o lua feso’ota’i ma tagata mai isi eria i lau misiona, ia mautinoa o la lua feso’ota’iga e taula’i atu i le faataunuuina o le faamoemoega o lau misiona. Mulimuli i tulaga faatonuina o loo i le vaega 3.5.1, “Tulaga Lautele mo Fegalegalea’iga ma Tagata Matutua,” ma i Puipuia o le Faaaogaina o Tekinolosi, ma manatua ia faaaofia i ai lau soa a o e auai i nei fesootaiga.

3.9.4

Afifi ma Tusi

O nisi o misiona e mafai ona faaaoga le tuatusi o le ofisa o le misiona e maua ai meli ma afifi e avea ma ou tuatusi. O lenei tulaga e puipuia ai lou saogalemu ma fesoasoani e taofia ai le gaoi ma meli leiloloa ona o fesiita’iga. Faamolemole e mulimuli i taiala uma o loo e maua i tulaga faapea.

3.9.5

Aafiaga o Faifeautalai ma Tagata o Aiga

Atonu e te iloa se tagata i le aiga o ona aafiaga patino e mafai ona fesoasoani i se tasi o loo e aoaoina i le misiona. E ao ona e fesiligia se faatagaga mai le peresitene o le misiona mo lena tagata e faasoa mai lona aafiaga ma le molimau. Fautua atu i le tagata i le auala sili o fesootaiga faatekinolosi e faaaoga.

Afai o se tagata o lou aiga po o se uo mai lou nuu e manao e aoao atili e uiga i le talalelei a Iesu Keriso, atonu e faataga mai e lou peresetene o le misiona oe e te aoao atu ia i latou e faaaoga ai le tekinolosi (tagai 7.5.4).

3.9.6

Asiasiga Patino mai Aiga ma Uo.

O le tulaga masani lava, e le tatau i aiga ma uo ona asiasi ia te oe i le taimi o lau misiona. Ae peitai, i lalo o ni tulaga faapitoa, atonu e faataga e lou peresetene o le misiona se tulaga faapea. O nei asiasiga e tatau ona puupuu ma e le aafia ai ou tiute faafaifeautalai. E le tatau i se asiasiga ona faalavelave i lau soa, isi faifeautalai, po o tagata o loo e aoaoina. Ia tausiusi lelei o nei asiasiga e le tosoese ai ou mafaufau mai lau auaunaga pe faatupulaia ai se faafitauli o mea tautupe mo lou aiga.

3.9.7

Faalavelave Faafuasei

Afai e tau atu e lou aiga se faalavelave faafuasei i le fale, ia faailoa atu i ou taitai o le misiona ina ia mafai ai ona latou tuuina atu ia te oe le lagolagosua. O le a faafesootai e taitai o le misiona lou aiga pe afai o iai sou tulaga o se faalavelave faafuasei.