Hem I Stap Lidim Mi, i kam long Yongsung Kim, havenlight.com
6
Taem Yu Komplitim Misin blong Yu
6.0
Fas Toktok
Mekem yuwan i rere naoia blong gohed long laef blong yu olsem wan disaepol blong Jisas Kraes mo olsem wan fetful memba blong Jos Ia blong Jisas Kraes blong Ol Lata-dei Sent taem yu gobak hom, mo taem yu stap mekem misin blong laef blong yu i kamtru.
6.1
Gohed blong Stap Joen wetem Ol Nara Man
Gohed blong toktok wetem olgeta we yu bin tijim olgeta mo wok wetem olgeta taem yu bin stap long misin blong yu, mo hemia i tekem tu ol misin lida blong yu. Sapotem mo mekem olgeta oli kam strong moa tru long ol toktok mo eksampol blong yu, mo selebretem ol impoten taem insaed long laef blong olgeta.
6.2
Stap Gobak Hom Taem Yu Finisim Misin blong Yu
From se yu stap olsem wan misinari kasem taem we stek presiden blong yu i rilisim yu, nao oli wantem luk se yu yu folem evri standet blong ol misinari kasem long taem ia. Tingting blong gobak stret long hom. Hemia i impoten tumas sapos yu yu stap givim seves long wan kantri we i no blong yu, mo yu mas folem gud ol rul blong visa. Blong stap pusumbak taem blong gobak hom bae i mekem i had blong ol nara misinari blong kasem ol visa blong travel. Sapos yu mitim ol famli blong yu travel i gobak hom, askem kaonsel mo daereksen long misin presiden blong yu, bifo taem.
Bae yu no save finisim misinari seves long wan nara misin o yu no save askem blong muv i go long wan nara misin afta long rilis deit blong yu, blong yu save stap olsem wan kompanion blong wan famli blong yu.
Taem yu gobak hom, mekem rod wetem hom stek presiden blong yu blong yu rilis stret long taem we yu kasem homples.
Stret afta we yu kambak hom, yu go jekem TB (Tubekulosis), iven sapos oli bin testem hemia bifo misin blong yu, mo iven sapos yu no luk eni saen.
6.3
Stap Givim Seves mo Stap Groap Afta long Misin blong Yu
Taem yu gobak hom, gohed blong stap laef folem ol standet blong gospel. Mekemsua se:
-
Yu prea mo stadi long ol skripja evri dei.
-
Yu go mo tekpat long ol samting insaed long hom blong yu, mo insaed long yang singgel adalt wod blong yu.
-
Yu lukaotem ol janis blong givim seves insaed long tempol, sapos i gat wan i stap kolosap.
-
Yu go long institiut mo ol nara klas blong relijin.
-
Yu lukaotem edukesen mo wok tru long ol risos blong Jos mo ol narafala risos.
Yu laef long wan wei we bae yu save filim kaen glad ia we oli tokbaot insaed long Buk blong Momon taem we Yangfala Alma i bin mitim ol fren misinari samtaem long laef blong hem:
“Mo nao i bin hapen se, taem we Alma i stap wokbaot i aot long graon blong Gidion i go long Saot, i kamaot i go long graon blong Mantae, luk, long bigfala sapraes blong hem, hem i mitim ol boe blong Mosaea we oli stap wokbaot i go long graon blong Sarahemla.
“ … From hemia Alma i glad tumas blong luk ol brata blong hem; mo wanem i ademap moa long glad blong hem, i we oli stil ol brata blong hem long Lod; yes, mo oli kam strong long save blong trutok; from oli ol man we oli haremsave stret ol samting mo oli stadi long ol skripja wetem strong tingting, blong oli save andastanem toktok blong God.
“Be i no hemia nomo; oli bin mekem plante prea, mo livim kakae; taswe oli bin gat spirit blong profesi, mo spirit blong revelesen, mo taem we oli bin tij, oli bin tij wetem paoa mo raet blong God.” (Alma 17:1–3oli ademap italik).