Apendiks

7.0

Fas Toktok

Taem we yu nidim, mo taem we i stret blong misin mo situesen blong yu, folem sam moa gaedlaen we oli putumaot insaed long apendiks ia.

7.1

Ol Responsabiliti blong Lidasip blong Wan Yang Misinari

Ol wok we oli givim, mo ol responsabiliti blong ol yang misinari lida, oli tekem olgeta ia, be tu, i no hemia nomo we i stap long lis andanit; i save gat sam moa.

Senia Kompanion

Wan misinari insaed long wanwan kompanionsip i gat wok ia blong stap olsem senia kompanion. Senia kompanion ia, hem i :

Lidim kompanionsip ia blong mekem wok i kamtru insaed long wan tijing eria we oli putum i stap blong wok long hem.
Leftemap tingting blong kompanionsip ia blong stadi, prea, folem evri dei taemtebol, mo kipim ol rekod oli stret gud.
I helpem kompanion blong hem blong kam wan moa gud misinari.
Luksave mo i poenemaot ol skil, talen, mo hadwok we oli wokaot gud moa long kompanion blong hem.
Soem olsem wanem blong wok long wan wei we i gud moa wetem ol lokol lida mo ol memba, blong save kodinetem ol misinari hadwok.

Trena

Wan misinari i gat wok ia blong stap olsem trena mo senia kompanion blong wanwan niu misinari. Wan trena i:

Wok wetem, mo i trenem wan niu misinari wetem lav, fasin blong wet longtaem, jareti mo fasin blong andastanem man.
Respektem ol kontribusen mo ol niu tingting blong niufala misinari, olsem wan ikwol kompanion.
Spendem sam moa taem blong givim trening evri dei long taem blong kompanion stadi (luk long “Blong Ol Niu Misinari: Wan Moa Kompanion Stadi” insaed long “Fas Toktok: ?Olsem Wanem Bae Mi Save Yusum Gud Prijim Gospel blong Mi?” insaed long Prijim Gospel blong Mi [2019], ix–x).
Stadi long ol standet we oli putum i stap insaed long hanbuk ia evri dei wetem kompanion blong hem.
Trenem niu misinari long saed blong ol topik we oli stap insaed long ol risos ia: Ol Sef Wei blong Stap Yusum Teknoloji mo Stretem Yuwan long Misinari Laef.
Soemaot olsem wanem blong kodinetem gud ol misinari hadwok wetem ol lokol lida mo ol memba.

Distrik Lida

Wan elda i kasem wok ia blong givim seves olsem wan distrik lida insaed long wan distrik, we i gat plante eria blong tij. Distrik lida ia i:

Lidim, trenem, mo toktok wetem ol misinari long ol wik distrik kaonsel.
Lidim ol intaviu blong baptaes (luk long 2.3.6).
Lidim ol wok blong jenisim ol kompanion wetem ol elda insaed long distrik blong hem (luk long 2.3.1).
Wok wetem ol lokol lida mo ol memba blong save kodinetem ol misinari hadwok.
Ripot i go stret long son lida.

Ol Sista Trening Lida mo Ol Son Lida

Oli givim wok long tufala sista blong tufala i givim seves, insaed long wan kompanionsip, blong tufala i ol sista trening lida insaed long wan, o moa long wan son. Oli givim wok long wan ol sista blong stap olsem senia kompanion. Tufala i responsibol blong trening mo welfea blong ol sista misinari we tufala i gat wok ia blong lukaotem. Tufala tu i ol memba blong distrik mo son, mo tufala i helpem misin presiden, ol son lida, mo ol distrik lida long taem blong ol trening miting mo ol son konfrens.

Oli givim wok long tufala elda blong tufala i givim seves, insaed long wan kompanionsip, blong tufala i stap olsem ol son lida insaed long wan son nomo. Oli givim wok long wan ol elda blong stap olsem senia kompanion. Tufala i responsibol blong trenem mo lukaotem gudlaef blong evri misinari we tufala i gat wok ia blong lukaotem insaed long son blong tufala. Tufala i helpem misin presiden lida long taem blong ol trening miting mo ol son konfrens.

Ol sista trening lida mo ol son lida oli:

Lidim, trenem mo kondaktem ol taem blong jenjenisim kompanion wetem ol misinari insaed long son, o ol son blong olgeta. Ol sista trening lida oli kondaktem wok blong jenjenisim kompanionsip wetem ol sista, mo ol son lida oli kondaktem ol taem blong jenjenisim kompanion wetem ol elda.
Wok wetem ol lokol lida mo ol memba blong save kodinetem ol misinari hadwok.
Tekpat long misin lidasip kaonsel.
Ripot i go stret long misin presiden.

Ol son lida tu oli lidim ol intaviu blong baptaes (luk long 2.3.6).

Ol asisten long Presiden

Oli givim wok long tufala elda blong tufala i givim seves, insaed long wan kompanionsip, blong tufala i stap olsem ol asisten blong misin presiden. Ol Asisten oli:

Lidim ol wok blong jenisim ol kompanion wetem ol son lida mo ol nara elda (luk long 2.3.1).
Givim trening long ol misin lidasip kaonsel mo ol son konfrens olsem we misin presiden i askem.
I save givim advaes long saed blong ol misinari transfea o lidasip wok, be oli no mekem ol las desisen.
Ripot i go stret long misin presiden.

7.2

Ol Gaedlaen blong Givim Seves

Folem ol seves gaedlaen we oli putum i stap long olgeta smol seksen ia.

7.2.1

Ol Seves Aktiviti tru long Ol Ofisol Wei

Yu save faenem sam janis blong givim seves tru long ol oganaesesen olsem JustServe.org (long ol ples we oli stap), olsem we ol misin lida blong yu i talem.

Taem we yu tekpat long wan seves we oli oganaesem, kipim olgeta standet ia long maen blong yu:

Putum limit long aoa we yu givim long deitaem.
Traem blong no givim seves long ol taem we i moa gud blong faenem mo tijim man, be nomo sapos misin presiden blong yu i talem yu blong go mekem.
Tekpat long ol komuniti seves projek taem we i posibol.
Traem blong no tekpat long ol seves aktiviti we oli holem long ol priperesen dei, o long ol taem we i gat ol distrik kaonsel miting, o ol son konfrens.
No traem blong kanselem o putum nara taem blong ol apoenmen blong tij blong save tekpat long ol seves projek, be sapos nomo misin presiden i talem long yu.
Stap wetem kompanion blong yu taem yu stap givim seves.
Werem nem tag blong yu sapos oli letem mo sapos hem i stret, iven sapos yu dresap long klos blong wok.
No tekpat long ol aktiviti we bae yu spendem mane, o bae oli pem yu from.
No komitim yu blong mekem ol projek we oli tekem longtaem; yu mas kasem apruvol blong ol misin lida blong yu fastaem.

7.2.2

Sefti long taem blong Seves

Blong sefti blong yu long taem blong ol janis blong givim seves, yusum gud tingting blong yu mo folem ol kwaet toktok blong Tabu Spirit, mo olgeta gaedlaen ia:

Mekem olgeta aktiviti ia nomo we yu yu fit long bodi, blong mekem olgeta.
No yusum ol paoa tul, o no mekem eni masin i wok, o yu no ron long eni masin (olsem ol trakta, ol trela, o ol kamiong we i gat kat blong hem).
Werem ol stret klos (olsem ol hanglav, o ol sot wetem ol longfala han).
Yu no wok long ol ples we bae yu stap antap evriwan mo yu save foldaon i go daon evriwan (olsem antap long ol ruf, o long ol tri).
Yu no wok long ol ples we bae yu fas i stap, o yu save kasem kil, olsem ol spes we oli klos evriwan (olsem insaed long ol bigfala hol long graon).
Yu no givim seves insaed long ol skul, ol dei kea senta, o eni nara ples we bae yu stap yuwan wetem ol pikinini, mo hemia i tekem tu Praemeri o neseri (luk long 3.5.2).

Wajem vidio ia blong gat moa infomesen abaot fasin blong givim seves.

15:26

7.3

Respek long Ol Nara Man

Tritim evriwan wetem fasin we i kaen mo wetem respek. Mo folem sam moa gaedlaen insaed long seksen ia.

7.3.1

Ol Topik blong Storian blong Stap Longwe long Ol

Blong soem respek long ol narawan, mo blong protektem sefti blong yu, stap longwe blong ol topik blong storian we i save mekem problem. Ol topik blong stap longwe long ol, i tekem lokol mo nasonal politik blong ol eria we yu stap givim seves long hem; mo tu, no sakem ol politik toktok long praevet o long pablik. Antap long hemia:

Neva mekem fani long saed blong fasin blong ol teroris, o ol aksen blong ol teroris.
Neva givim tingting long ol pipol blong oli muv i go long wan nara kantri—iven blong wok o blong skul.
Neva proposem, o mekem promes blong givim sapot long saed blong mane, o long saed blong visa long ol pipol insaed long misin eria we yu stap long hem; hemia i tekem tu promes blong sapot blong wok, skul, haos, o adopsen.

7.3.2

Ol Lokol Loa mo Kalja

Obei ol lokol loa mo rul abaot fasin blong serem ol samting, obei ol rul blong kastom mo boda, mo ol rul blong paspot mo visa. Sapos yu no savegud long ol lokol loa, kastom, mo fasin we pipol i akseptem, askem ol misin lida blong yufala, blong kasem help.

Wajem vidio ia blong gat moa infomesen abaot wanem i wan stret fasin.

16:32

7.4

Go long Tempol

Taem yu go long tempol, tingbaot olgeta samting ia:

Stap wetem kompanion blong yu.
Tekpat long eni odinens we oli stap mekem insaed long tempol. Be, blong save stap longwe long fasin blong andastanem rong ol filing long saed blong spirit olsem we oli ol lav filing, yu no stap olsem proksi blong wan hasban o wan waef insaed long wan siling seremoni, o stap olsem wan witnes insaed long wan endaomen sesen.
Yu no wari blong tekem ol klos blong tempol: insaed long tempol i gat ol tempol klos we oli save givim long ol misinari blong yusum, mo bae yu no nid blong pem blong yusum.
Folem gud ol fasin blong yusum fon. Yu save tekem fon blong yu i go insaed long tempol blong oli printim ol kad blong ol odinens. Be, yu no save yusum kamera blong yu, toktok long fon blong yu, o sendem ol mesej taem yu stap insaed long tempol.
Yu no tekem ol kamera o riding buk, mo tu, yu no tekem petriakel blesing blong yu, blong yu yusum insaed long tempol.
Yu no joenem grup blong plante misinari, o nildaon long prea insaed long selestial rum.

Tingbaot blong oltaem werem tempol gamen, olsem we oli givim instraksen long yu. Sapos yu gat ol kwestin abaot fasin blong gamen, o abaot fasin blong stap go long tempol, askem ol misin lida blong yu.

7.5

Teknoloji

Folem ol standet blong teknoloji olsem we oli putumaot olgeta long ol smol seksen ia we oli stap ia.

7.5.1

Stap Folem Ol Standet blong Jeneral Teknoloji

Lukluk nomo long ol pipol, i no long teknoloji. Taem yu gat fes tu fes miting, givim ful tingting mo sora blong yu i go long ol pipol. Taem yu stap wetem ol narafala man mo yu stap jekem imel, stap ansarem ol teks, o stap gotru long sosol media, i save stopstopem pipol mo i wan fasin we i no gat respek long hem.

Yu save yusum:

Wi-Fi taem i gat i stap blong yusum mo misin presiden blong yu i apruvum.
Ol pablik kompiuta, olsem olgeta we oli stap long ol laebri, mo ol intanet stoa.
Praevet kompiuta blong wan blong save tij wetem sapos man/woman we kompiuta i blong hem, i givim raet long yu blong yusum.
Yusum ol hedfon blong ol misinari aktiviti we oli givim raet from, olsem long taem blong toktok wetem famli blong yu, o blong tekem ol misinari kos.

Yu no lukaot long teknoloji blong lokol wod o stek; yu no lukaotem ol websaet, blog, o sosol media akaon blong olgeta.

Wajem vidio ia blong kasem moa infomesen long saed blong fasin blong yusum ol lektronik tul long wok blong misinari.

4:40

7.5.2

Stap Yusum Ol Teknoloji long Sef Fasin

Yu mas finisim onlaen kos ia, Stap Yusum Ol Teknoloji long Sef Fasin, taem yu stap long misinari trening senta. Olgeta standet ia bae oli helpem yu blong yusum teknoloji long sef fasin mo wetem stamba tingting blong mekem misinari wok:

Yusum teknoloji sapos yu gat samting blong mekem. Mekem plan blong holem sam aktiviti we bae oli helpem yu blong invaetem ol narawan blong oli kam long Sevya.
No yusum teknoloji blong karemaot tingting we i fasfas o from se yu no gat samting blong mekem.
Lisin long ol kwaet toktok we oli kam long Tabu Spirit mo mekem folem. Wan strong koneksen wetem Spirit blong Lod i bes tul blong yu blong difendem yu agensem fasin blong no yusum gud teknoloji.
Oltaem stap long wan posisen we yu mo kompanion blong yu i save luk skrin blong yutufala bakegen. No yusum ol mobaelfon taem we yu yu stap yuwan, olsem taem we yu stap long ples blong swim.
Wok wetem kompanion blong yu taem yu stap faenem, o stap tijim pipol onlaen. Luklukbak long ol toktok mo ol mesej blong wanwan bifo yu post, o bifo yu sendem wan mesej; hemia i blong mekem se yutufala tugeta i save serem ol aedia mo save stap akaontebol from risal we i kamaot long komunikesen. Not: Hemia i no aplae long ol komunikesen wetem famli blong yu (luk long 3.9.1), misin ofis, o wetem misin presiden.
Lukluk i gobak long Stap Yusum Teknoloji long Sef Fasin plante taem long taem blong stadi blong yuwan, o long taem blong stadi wetem kompanion blong yu.

7.5.3

Stap Longwe long Ponografi

Ponografi i kam long ol defren wei. Taem yu mekem plan fastaem, mo yu stap mekem ol joes we oli raet, hemia i save helpem yu blong stap longwe long ponografi (luk long Stap Yusum Teknoloji long Sef Fasin). Taem yu kam krosem hemia, yu gowe, yu ofem lektronik tul blong yu, o yu aot long situesen ia. Andanit ia, i gat samfala tingting blong save helpem yu blong stap longwe long ponografi:

Stap longwe long ol websaet, ol buk o nara samting, mo ol ples we bae i gat janis blong yu harem, ridim, o luk ol kaen samting we oli no stret, o ponografi.
Lan blong luksave ol taem we yu gat temtesen blong yusum teknoloji long wan fasin we i no stret, olsem we taem yu taed o yu no gat samting blong mekem.
Gat wan plan blong samting we bae yu mekem long kaen taem olsem. Ol misin lida blong yu oli save help. Yu save faenem sam infomesen tu long ChurchofJesusChrist.org/addressing-pornography.

Eniwan we i wantem blong stap longwe, o winim ponografi, i save faenem help mo hiling tru long Atonmen blong Jisas Kraes. Sapos yu yu stap gat hadtaem blong mekem hemia, toktok wetem misin presiden blong yu, we i sapos blong givim sapot wetem lav, givim kaonsel mo help.

7.5.4

Stap Tij wetem Teknoloji

Taem we oli givim raet, yusum teknoloji wetem ol memba mo ol pipol we yu stap tijim blong konek wetem olgeta, blong helpem olgeta, mo blong serem ol mesej blong gospel wetem olgeta.

Helpem ol narawan blong lanem ol wei we i wok blong serem gospel, mo blong sapotem ol memba blong Jos taem we oli stap yusum teknoloji long ol misinari hadwok blong olgeta.
Wok onlaen wetem ol pipol we yu stap tijim, we oli stap aotsaed long eria we oli givim yu blong wok long hem, mo helpem olgeta long taem blong storian blong yu wetem olgeta.
Taem we yu stap tijim wan we i stap aotsaed long eria blong yu, wok kolosap wetem ol misinari we oli gat wok blong lukaot long eria ia we man o woman ia we yufala i stap tijim, i stap long hem. Tugeta, helpem man o woman ia blong i kam kolosap moa long Papa long Heven mo long Jisas Kraes.
Yusum ol foto, ol vidio, mo ol nara media we oli kam long Jos Media Laebri mo ol nara ofisol websaet blong Jos, hemia insaed long ol tijing taem blong yu, mo yusum olsem we yu luk se i stret blong yusum. Long ol komunikesen blong yu, no yusum media we Jos i no apruvum (eksampol: ol vidio we ol memba o ol lokol yunit oli krietem).
Taem yu stap post long sosol media, serem ol mesej abaot gospel mo serem misinari eksperiens blong yu, be i no blong yu stap tokbaot ol wokbaot blong yu.

Folem gud olgeta gaedlaen ia blong protektem praevet laef blong ol pipol, mo tu, praevet infomesen:

Yu mas save se ful nem, ol foto (luk long 3.7), kontak infomesen, mo ol situesen blong wanwan pipol we yu stap tijim, oli konfidensiol. Blong stap serem o stap postem infomesen ia, i save agensem ol loa blong praevet data. Yu mas lukaotgud long wanem yu stap raetem long ol memba blong famli, from se oli save postem ol leta mo ol imel mesej blong yu onlaen.
Kasem raet blong eniwan we i stap insaed long wan foto, o wan vidio bifo yu serem wetem eniwan, o bifo yu postem onlaen. Kasem raet blong papa mo mama bifo yu serem ol foto mo ol vidio blong ol pikinini (luk long 3.7).

Wajem vidio ia blong kasem moa infomesen abaot fasin blong protektem praevet laef blong ol nara pipol.

5:24

7.5.5

Stap Yusum Imel

Long taem blong misin blong yu, yu yu gat wan imel akaon blong yuwan blong yu save yusum, be i no eni nara imel akaon we i blong yuwan. Yusum imel akaon ia blong evri komunikesen blong yu, be yu no yusum hemia blong sendem wik leta blong yu long misin presiden, we bae yu sendem i go tru long Missionary Portal.

7.5.6

Stap Yusum Sosol Media

Yu save yusum sosol media blong serem gospel. Meksua se yu stap yusum sosol media we oli apruvum long misin ples blong yu, from se ol loa abaot sosol media oli defren long wanwan kantri.

Folem eni spesifik misin standet abaot sosol media, mo tu, folem olgeta standet ia:

Meksua se sosol media akaon blong yu i soemaot stamba tingting mo koling blong yu olsem wan misinari.
Meksua se profael pikja blong yu, mo ol man mo ol woman, mo ol grup we yu stap folem, oli soem se yu yu wan misinari blong Lod.
Yu no krietem wan nambatu akaon long sosol media blong mekem se bae yu no jenisim wanem we i stap long akaon blong yu we i stap naoia. Hemia i go agensem yusa agrimen blong plante websaet blong sosol media.
Yu no yusum ol taetol olsem “Elda” o “Sista” long akaon nem blong yu. Ol taetol olsem, yu no gat raet blong yusum long sam sosol media.
Lukluk nomo blong gat ol gudfala rilesen we oli gat mining, be i no blong jes stap klikim “like” o mekem se bae oli serem mesej blong yu onlaen.
Yu no mekem se man i luk se wanem we yu postem, hem i wan ofisol toksave we i kam long Jos.
Protektem praevet laef blong yu. Yu lukaot blong yu no serem taemtebol mo ples we yu stap long hem onlaen. Lukaotgud long ol pipol we yu stap akseptem long sosol netwok blong yu; samfala pipol ia bae oli wantem yusum nogud ol misinari.
Protektem praevet laef blong ol narawan. Sapos yu wantem postem wan samting abaot wan we yu stap wok wetem, yu nid blong askem raet blong hem faswan (long toktok o long raeting) bifo yu postem eni samting we i talemaot nem blong hem, o i tekem pikja blong hem (luk long 3.7). From ol lokol loa long saed blong praevet laef, long samfala misin, ol misinari oli no gat raet blong serem foto long pablik, blong olgeta pipol ia we oli stap tijim olgeta.

Wajem vidio ia blong kasem moa infomesen abaot fasin blong protektem praevet laef blong ol nara pipol.

5:24

7.6

Ol Had Situesen

Folem ol gaedlaen andanit ia blong stretem ol situesen we oli had.

7.6.1

Stap Lukluk long Ol Situesen we Oli No Stret

Olsem Sevya, ol profet mo plante misinari fastaem long yu, bae yu gotru long taem we man i sakemaot yu, mo ating bae oli no gat respek long yu olsem wan misinari. Olgeta gaedlaen ia bae oli helpem yu blong handelem ol taem we oli sakemaot yu:

Yu no sakemaot ol filing blong yu.
- Luksave se hem i oraet blong talemaot long kompanion blong yu, ol yang misinari lida, ol misin lida, mo ol memba blong famli se yu yu no glad, mo tingting blong yu i slak.
- Andastanem se, samtaem, blong stap tokbaot wan nogud situesen i save help blong filing ia i gowe.
- Yu no stastap tingting, o stanap long ol nogud situesen, o letem ol nogud situesen ia oli jenisim fasin blong yu blong wan longfala taem.
Putum taem ia we oli sakemaot yu, i stap long wan defren lukluk.
- Yu mas save se ol situesen we oli nogud oli no talemaot huia yu, wanem oli singaotem yu blong mekem, mo hamas nao yu yu mekem gud long wok ia.
- Yu no traem blong talem ol jeneral toktok olsem “Ol pipol oli neva lisin.”
- Andastanem se fridom blong mekem joes i letem wanwan man, woman i akseptem o sakemaot mesej blong yu.
- Luksave se laef blong ol pipol mo situesen blong olgeta i save jenis. Blong sakemaot ol pipol i no minim oltaem se man o woman ia bae i neva intres long gospel ia we i kambak.
Tritim yuwan mo ol narawan wetem lav mo sore.
- Lukaotem kamfot insaed long prea. Tingbaot se Lod i save huia yu, i save situesen blong yu, mo i save nid blong yu.
- Yu no talem nogud yu, situesen ia, o ol pipol we oli stap long situesen ia.
- Yu mekem bes blong yu gat gudfala tingting oltaem.
Lanem samting aot long eksperiens ia. Tingting long wanem bae yu mekem i defren long nekis taem.

7.6.2

Stap Lukluk long Ol Pipol we Oli Wantem Fesem Man

Bae yu fesem ol pipol we oli no save tok gud, o oli save agensem man. Sapos wan i no save tok gud, toktok long gud fasin mo aot kwik. Sapos yu filim se yu stap long denja, aot kwiktaem. Sefti blong yu mo kompanion blong yu (luk long 4.5) i kam faswan oltaem.

Ol pipol we oli wantem fesem yu mo oli no save toktok gud, oli save mekem tingting i fasfas smol. Tekem step we yu nidim blong tekem blong no mekem tingting i fasfas (luk long 4.3) mo blong yu kea long yuwan long saed blong filing mo long saed blong spirit.

Yu mas save se eni kaen abius long toktok, filing, o bodi, we eniwan i givim, mo tu, we i kam long kompanion, i no wan fasin blong akseptem. Hemia i tekem ol toktok, ol aksen long han, fes, bodi, mo ol nara aksen we oli givim woning o oli abiusum wan narawan.

Toktok kwik long misin presiden blong yu, waef blong hem, o wan nara lida we yu trastem sapos yu yu fesem, o sapos yu yu harem abaot eni nogud toktok, aksen o luk eni denja long saed blong seks o long saed blong bodi (luk long 7.8.2–7.8.4).

7.7

Ol Trabol long saed blong Helt blong Bodi mo Tingting

Folem ol helt gaedlaen we oli putum i stap long olgeta smol seksen ia.

7.7.1

Stap Kontaktem Misin Ofis abaot Ol Medikol Wari

No dipen long tingting blong yuwan o long tingting blong ol narawan. I nomata se medikol advaes we i kam long kompanion blong yu, ol nara memba blong Jos, ol famli o ol fren, oli save help, yu mas kontaktem misin medikol kodineta taem yu gat eni kwestin o wari, speseli abaot ol bigfala kil o helt problem. Misin presiden blong yu bae i toktok wetem stek presiden blong yu mo famli blong yu abaot ol series kil mo ol bigfala problem blong helt.

Kontaktem misin medikol kodineta sapos yu yu gotru long eniwan long olgeta helt problem ia:

Sik we i bitim ol nomol flu mo ol saen blong sik we i blong sot taem.
Ol bigfala kil.
Hat bit blong yu i hariap tumas (100 plas bit long wan minit) taem we yu no stap mekem eksasaes.
Eni fiva we i hae moa bitim 101°F (38.3°C), wan fiva we i kasem 101°F (38.3°C) blong moa long 2 dei, o wan fiva we i no go daon afta we yu tekem meresin.
Yu lusum kilo o yu karem kilo long bodi kwiktaem tumas, o i bigwan tumas.
Yu tosta plante we plante, o yu pispis plante we plante.
Yu traot oltaem, yu gat hed i soa oltaem, o yu harem olsem se hed i raon oltaem, yu kof, o yu sikrasem yu oltaem.
Ol en blong leg, ol leg, bel o fes i solap.
Yu lusum blad o sitsit hem i blak.
Yu no save go bus, o yu no save go gud long toelet, o bel blong yu i ron i bitim 2 dei.
Tut i soa.
Nel blong to blong yu i gro i gobak insaed long mit.

7.7.2

Stap Lukaotem Gud Helt blong Bodi

Bambae yu save laekem moa misin eksperiens blong yu, mo bae yu save givim moa gud seves long Lod taem yu stap tekem kea long helt blong bodi blong yu. Wok strong wetem strong tingting long ol misinari hadwok blong yu, be yu no pusum yu i go bitim we yu save tekem.

Blong helpem yu holemtaet helt blong bodi blong yu, meksua se yu:

Mekem spot oltaem.
Slip inaf.
Kakae ol helti kaekae wetem plante vejetebol, frut, mo ol sid.
Dring plante wota.
Wasem han oltaem.
Werem krim we i blokem san long skin blong yu, mo yusum sprei blong ronemaot ol bebet taem we i stret blong yusum.
Faenem sam wei blong yu rilaks.
Stap glad long ol gudfala taem we yu spendem long ol priperesen dei.

7.7.3

Stap Lukaotem Gud Helt blong Tingting

Hem i nomol blong harem se yu no hapi, se yu wari, yu homsik, mo yu slak long taem we yu stap long misin blong yu. Be, ol filing mo fasin ia we oli stopem yu blong wok gud, bae yu mas stretem. Ol fasin ia oli save tekem olgeta ia:

Filing i swing o jenis oltaem.
Wari plante o oltaem yu filim se yu yu rong long wan samting.
Filing ia we yu filim se tingting i fasfas bigwan mo yu no glad.
Fasin blong kakae we i no helti.
Gat hadtaem blong kontrolem ol filing long saed blong seks.

Andastanem se i no gat sem blong stap luksave mo tritim eni helt problem, wetem ol problem long saed blong filing o tingting. Sapos yu yu filim se yu o kompanion blong yu i nidim help, toktok long misin presiden blong yu, waef blong hem, o medikol kodineta blong yu. Oli save lukluk long samfala risos long saed blong helt blong tingting. Bae yu faenem sam kaonsel we i save help long Stretem Yuwan long Misinari Laef.

7.7.4

Tritim Yu Taem Animol o Bebet i Kakae Yu

Taem animol o ol bebet oli kakae yu, i save mekem se yu kasem ol sik we i save mekem yu yu ded. Taem wan bebet i kakae yu mo i solap mo i soa bigwan, ringim misin ofis kwiktaem.

Blokem Sik

Yu save help blong blokem ol laos, ol moskito, mo ol nara bebet blong oli kakae yu taem yu folem olgeta gaedlaen ia:

Stap longwe long ol wota we oli stap nomo mo oli no muv, from i ples we ol moskito oli laef long hem.
Stap longwe long ol graon we oli gat fulap wud mo bus, from hemia i ples we ol laos blong animol oli laef long hem.
Werem ol klos we oli kavremap han mo leg blong yu, iven long taem we ples i hot.
Wajem vidio ia blong “Missionaries Counseled to Follow Malaria Protocols.”

12:4
Yusum spre long skin we klos i no kavremap, mo yusum wan spre aotsaed long ol klos.

Tritmen

Sapos wan laos blong animol o wan moskito, o wan nara bebet oli kakae yu, yu folem olgeta gaedlaen ia:

Tritim ol smol soa taem bebet i kakae yu wetem aes o ol meresin we i no nidim pepa blong dokta.
Luk long medikol profesonol blong karemaot ol laos ia we oli fas long skin, mo blong testem Lyme sik.
Wasem ples we animol i kakae yu long hem wetem sop mo wota (blong 15 minit sapos i posibol), mo ringim misin ofis. Faenemaot huia i ona blong animol, sapos i posibol, blong mekem se misin ofis i save help blong faenemaot se i no gat rebis o ol nara bigfala sik.
Sapos wan laos o wan nara bebet i kakae yu mo i solap, mo yu harem se i soa bigwan, o i mekem se i gat wan raon ae raon long ples we hem i kakae, o i mekem yu sikras bigwan, ringim misin ofis kwiktaem.

Wajem vidio ia blong kasem moa infomesen abaot fasin blong protektem yuwan long ol bebet mo ol nara animol we oli save kakae yu.

2:3

7.8

Ol Denja Situesen

Folem ol Sefti gaedlaen we oli putum i stap long olgeta smol seksen ia.

7.8.1

Stap Rere from Ol Denja Situesen

Ol gaedlaen we oli kam afta, oli save helpem yu blong rere from ol denja situesen mo blong fesem olgeta:

Prea long Lod blong Hem i protektem yu evri dei.
Lisin long, mo folem ol kwaet toktok blong Spirit, we i save wonem yu long wan denja.
Mas savegud long misin imejensi aksen plan. Folem ol step blong wanem blong mekem long taem blong ol imejensi situesen.
Putum infomesen blong ol imejensi kontak blong eria blong yu mo kantri blong yu insaed long fon blong yu. Kipim fon blong yu i fuljaj oltaem, mo i stap wetem yu oltaem.
Stap longwe long ol eria insaed long misin blong yu we oli putum se oli ol eria we i gat denja.
No givim tingting long man se yu yu gat ol samting we mane blong hem i bigwan (eksampol, no stap karem wan basket we i fulap long samting).
Mas lukluk samting we i stap hapen raon long yu, we i no nomol, olsem wan we i stap lukluk gud wanem yu stap mekem, i stap askem ol kwestin abaot praevet laef blong yu, o i stap folem yu.
Traem blong yusum wan bodi lanwis we i soem se yu yu trastem yuwan mo yu yu no fraet.
Yu mas gat wan kod toktok (o sikret toktok) o sentens we bae yu yusum wetem kompanion blong yu blong givim saen se yu yu wantem aot. Yusum toktok o sentens ia sapos yufala i stap long wan situesen we yu harem se yu no stap sef.

Praktis blong stap yusum ol gaedlaen ia oltaem, iven sapos ol narawan (we i tekem ol misinari) oli pusum yu blong yu go long ol situesen we oli no sef blong save mekem misinari wok blong yu i hapen.

7.8.2

Stap Luksave Ol Denja Situesen

Kwiktaem, yu kontaktem ol misin lida blong yu o wan nara lida we yu trastem sapos yu fesem, yu witnesem, o harem abaot wan nogud fasin long saed blong bodi o long saed blong seks; hemia eni kaen wei blong nogud fasin ia. Hemia i save tekem tu blong mekem taem man i kilim man, i tok agensem laef, o tok nogud long yu. Iven we olgeta denja andanit ia, oli talem mining blong hem i defren folem ol lokol loa, ripotem eni samting we i mekem yu yu wari:

Man i kilim nara man, i olsem wan i fosem narawan long saed blong bodi o long saed blong seks. Ol eksampol blong hemia, i olsem taem wan i wantem tajem bodi blong narawan, mo narawan i no wantem, fasin blong tajem nogud man o woman, o fasin blong vaelens.
Tok agensem laef i hapen taem wan i mekem narawan i fraet from i tok long hem se bae i givim kil o bae i kilimded hem. Ol eksampol blong hemia, i tekem ol strong tok we i kamaot long maot, o i kamaot long aksen; mo hemia i eni kaen strong tok o aksen.
Tok nogud long saed blong seks, i taem wan i tok nogud long narawan i talem nogud samting o i mekem ol nogud aksen wetem han o bodi, i askem seks, o eni aksen long saed blong seks we wan i no wantem gat. Ol eksampol blong hemia, i taem wan i folfolem man (folfolem man wetem tingting blong mekem nogud long wan) o blong soem ol praevet pat blong bodi.

7.8.3

Fesem Man taem I Kilim, Tok Agensem Laef, o Tok Nogud long Yu

Mekem olgeta samting ia sapos oli wantem stilim yu, o kompanion blong yu:

Lego ol samting blong yu kwiktaem. Hemia i save mekem se stilman i lego yu mo i no mekem nogud long yu. Laef mo gudlaef blong yu, oltaem bae i moa impoten bitim ol samting we yu gat.
Traem blong yu no lusum kontrol blong yu, mo mekem samting i nogud. Hemia i save mekem ol samting oli go mowas.

Mekem olgeta samting ia sapos oli tok agensem laef blong yu, o kompanion blong yu, o sapos oli tok agensem laef o tok nogud long yu, mo i gat moa bitim ol samting we yu gat we oli stap long denja:

Yu nomo yu save disaed long bes wei we yu save fesem wan situesen. Yu save jusum blong ron, blong difendem yuwan, o blong mekem folem wanem oli talem long yu. Eksampol:
- Sapos yu ron, maet bae yu stap longwe long wan atak.
- Sapos yu difendem yuwan, bae yu save protektem bodi blong yu taem yu singsingaot strong, yu kilim man, i sikrasem man, yu kakae man, yu kikim man, o yu prea from man.
- Sapos yu nomo save muv mo yu mas mekem folem, we i nomol long sam situesen, plis bae yu no blemem yu afta long hemia.
Tingting blong kasem help o pulum tingting blong wan man. Eksampol:
- Yu save askem help long wan narawan, speseli long wan we i gat atoriti (olsem bas draeva) long ples we yu stap long hem.
- Sapos yu stap long wan pablik spes wetem ol pipol oli stap raon, mo yu no save ronwe long wan we i wantem kilim yu mo mekem nogud yu long saed blong seks, (eksampol taem yu stap ron long pablik transpot) tingting blong toktok strong blong traem karemaot tingting blong man blong mekem samting moa long yu. Eksampol: yu save yusum wan strong bodi lanwis, lukluk man ia we i wantem mekem nogud yu stret long ae blong hem mo toktok laod mo strong. Yu save tok long man o woman ia, talem wanem fasin hem i wantem mekem long yu, mo talem wanem yu wantem man/woman ia bae i mekem; olsem: “Ei, yu ia long yelo sot, yu no tajem mi. Yu muv go longwe long mi.” Yu muv go longwe long mi.”
- Sapos i no gat man i stap kolosap long yu, yu save singsingaot, singaot, o taem blong pulum tingting blong man; maet bae wan i luk yu mo bae i save helpem yu.

7.8.4

Stap Ripotem Man we I Kilim, Tok Agensem Laef, o Tok Nogud long Yu

Sapos eniwan i kilim yu, i tok agensem laef blong yu, o i tok nogud long yu (luk long 7.8.2), kwiktaem kontaktem wan long ol misin lida blong yu, wan long misin ofis, o wan nara lida we yu trastem. Ol misin lida blong yu oli gat ol risos blong sapotem yu wetem dokta, profesonol kaonseling, putum yu long wan nara ples, o eni nara samting we yu nidim. Yu mas luksave se maet yu seksek yet i stap afta wanem i hapen, mo maet bae yu gat ol saen we i soem se yu no oraet yet. Taem yu filim se yu sef, traem raetemdaon eni samting we yu save tingbaot abaot nogud taem ia.

Yu mas andastanem se, sapos oli kilim yu, i nomata wanem nao yu bin stap mekem, fasin ia we oli kilim yu, i no rong blong yu. Yu oltaem gat joes blong save kaonsel wetem wan we yu trastem mo filim se yu oraet wetem hem; wan ia i save misin presiden blong yu, waef blong hem, ol gavman atoriti, o ol pipol long hom. Hem i desisen blong yu blong go talem long polis o nogat.

Hem i wan nomol samting blong gat kwestin long yuwan, mo wanem nao yu mo kompanion blong yu i bin save mekem i defren. Trastem se yu yu bin mekem bes samting we yu bin save mekem long nogud taem ia. Ol pipol oli fesem ol strong taem olsem long defren fasin. Lod bae i helpem yu taem yu stap kam oraet.

Wajem vidio ia blong kasem moa infomesen abaot fasin blong stap rere from, stap luksave, mo stap manejem ol denja situesen mo ol toktok agensem laef blong yu.

21:8

7.9

Haos Sefti

Folem ol gaedlaen andanit ia blong kipim haos blong yu i praevet, i sef, mo i klin.

7.9.1

Praevet Laef mo Sefti

Folem gud olgeta gaedlaen ia blong meksua se haos blong yu i praevet mo i sef:

Instolem mo lukaotem gud ol smol masin we oli save kasem se i gat smok long haos. Jekem mo riplesem ol batri olsem we misin haos kodineta i putum long taemtebol. No ofem ol tul ia we oli save sevem laef.
No laetem eni kaen kandel.
Lokem ol doa mo ol windo we oli open i go aotsaed. Sapos i nid, ol misin lida blong yu oli save givim sam moa tingting blong mekem se ea aotsaed i kam insaed long haos.
Oltaem nomo, yu klosem ol keten taem ples i kam tudak.
Yu no serem adres blong yu long pablik o wetem ol pipol we yu stap tijim.
Yu no openem doa sapos yu no save se huia i stap aotsaed, o sapos yu no filim gud long huia i stap aotsaed.
Neva tijim ol pipol insaed long haos blong yu, neva invaetem ol pipol oli go insaed, be nomo sapos oli ol misinari o ol lokol lida blong Jos we ol misin lida blong yu oli apruvum blong oli kam visitim yu.
Neva stap long wan hom we i gat ol pipol we oli no mared, mo oli no sem jenda olsem yu, o neva stap long wan hom we hasban o waef i no stap long haos plante taem.
Kwiktaem, ripot i go long misin ofis sapos yu gat wari long sefti blong yu, mo tu, ripotem eniwan we i stap wajem haos blong yu o i stap mekem se yu no filim se yu sef i stap.
Letem ol nara misinari we oli sem jenda olsem yu nomo, folem ol taem blong jenis we oli apruvum, blong oli spendem naet insaed long haos blong yu.
Spendem inaf mane nomo blong kipim haos blong yu i sef. Eksampol, blong riplesem laet balb we oli bon olsem we i nid.

7.9.2

Kipim Ples I Klin, mo Lukaotem Ples

Kipim haos blong yu i klin mo evri samting i stap long ples blong olgeta.

Klinap long priperesen dei (Luk long 2.5.1) mo evri dei sapos i nid.
Tekem step blong blokem ol bebet mo ol bebet (Luk long 7.7.4) blong kam insaed long haos blong yu.
Yu mas save olsem wanem blong yusum ol lektrik masin, speseli ol stov mo ol hita.
Yu no lukaotem eni kaen animol olsem animol blong haos.

Bambae oli jekem haos blong yu oltaem blong mekemsua se hem i stret, hem i sef, mo yu stap lukaotem gud.

Wajem olgeta vidio ia blong gat moa infomesen abaot fasin blong stap sef long haos.

15:26

12:55

7.10

Transpot Sefti

Folem ol Sefti gaedlaen we oli putum i stap long olgeta smol seksen ia.

7.10.1

Stap Wokbaot

Taem yu stap wokbaot:

Sapos i posibol, wokbaot long saed we yu fesem trak we i kam long fored.
Stap long ol ples we i gat laet long naet taem.
Jenisim ol defren rod mo taem we yufala i stap wokbaot raon long eria blong yu. Folem toktok blong Spirit we i talem wanem rod blong jenisim, o wanem evri dei fasin blong jenisim.

Wajem vidio ia blong gat moa infomesen abaot sefti taem yu stap wokbaot.

18:0

7.10.2

Stap Ron long Baeskel

Taem yu stap ron long baeskel:

Folem ol sefti loa mo gaedlaen, mo tu, yusum wan helmet (hat blong putum long hed) we oli apruvum blong olgeta we oli ron long baeskel; yusum ol tul we i saenem laet, mo yusum ol han saen taem we i stret.
Neva ting se yu yu gat raet long rod.
Traem blong no ron long baeskel taem we weta i nogud, taem i gat trafik we i fasfas, o long naet taem. Taem yu ron long baeskel, no saedsaed o ron kolosap long kompanion blong yu, o narawan.
Stap long wan distens we i longwe long kompanion blong yu, be yet, yu save luk hem.
Kipim baeskel blong yu i fit blong i ron, meksua se hedlaet, tel laet mo saedsaed laet i wok.
Lokem o putum baeskel long sef ples taem yu no ron long hem.

Wajem vidio ia blong gat moa infomesen abaot sefti taem yu ron long baeskel.

15:17

7.10.3

Stap Yusum Trak

Sapos oli givim yu wok blong draev long taem we yu stap long misin, draevem ol trak we oli blong misin nomo. Blong draevem wan trak we i blong misin, yu mas gat laesens blong kantri ia we yu stap long misin long hem; yu mas soem se yu andastanem ol standet blong yusum misin trak, mo yu mas gat raet we i kam long ol misin lida. Olsem we i stap, folem ol gaedlaen ia:

Andastanem se yutufala tugeta, yu mo kompanion blong yu i responsibol blong sefti blong yutufala, i nomata huia i stap draev.
Werem ol strap blong jea blong trak, draev long fasin we i stret we i protektem yu, yusum ol hedlaet long naet mo dei taem, mo lukaot gud mo save gud wanem i stap, i nomata se yu yu draeva o yu yu pasenja.
Sapos yu yu stap draev, yu no lego samting i pulumaot tingting blong yu long eni wei, we i minim tu se bae yu no mas yusum wan mobael tul, o odio sistem blong trak.
Sapos yu yu pasenja, yu helpem draeva blong hem i lukaot gud.
Sapos yu yu pasenja, yu stanap long wan sef distens aotsaed long trak blong lidim draeva taem we hem i stap arier o rives long trak.
Blong mekem se yu sef mo yu no responsibol long ol samting, yu no save draevem eniwan, be nomo ol fultaem misinari we oli semmak seks wetem yu.
Yu limitim draeving blong yu i folem ol kilometa we oli givim raet long yu.
Yu no jenisim wetem mita o eni sefti tul we oli putum insaed long trak.
Kipim trak i klin, mo mekem ol ripea wok we i nid.
Sapos yu yu mekem aksiden, lukluk long paket ia, Wanem blong Mekem Sapos Yu Gat Wan Aksiden we i sapos blong stap insaed long hanglav bokis insaed long trak. Kontaktem misin trak kodineta kwik olsem we i sef blong mekem.

Wajem vidio ia blong gat moa infomesen abaot sefti long trak.

18:43

7.10.4

Stap Yusum Pablik Transpot

Taem yu stap yusum pablik transpot:

Yusum nomo pablik transpot ia we misin blong yu i apruvum.
Yu mas save gud ol rod we pablik transpot i stap tekem, mo ol eria we yu stap go long ol.
Sidaon kolosap long draeva taem we i posibol. Putum ol bag blong yu long fored blong yu sapos i sef blong mekem.

7.11

Ol Prishud Odinens mo Blesing

Yusum ol jeneral gaedlaen ia blong mekem ol prishud odinens mo blesing. Infomesen we i stap long seksen ia, oli karemaot long japta 18 blong Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent.

Not: Olsem we oli eksplenem long olgeta seksen we oli kam afta, samfala odinens, bae prisaeding atoriti we hem i holem ol stret ki nao i mas givim raet from.

7.11.1

Mekem Wok blong Prishud: Ol Jeneral Gaedlaen blong Olgeta we Oli Kasem Melkesedek Prishud

Olgeta we oli holem Melkesedek Prishud, oltaem oli mas traehad blong oli klin inaf blong Tabu Spirit i stap wetem olgeta, mo klin inaf blong Tabu Spirit i lidim olgeta. Oli mas mekem wanwan odinens ia, o blesing ia long wan fasin we i tabu, i gat respek, mo oli meksua se i folem olgeta rul ia:

Odinens ia, oli mekem long nem blong Jisas Kraes.
Odinens ia, oli mekem olgeta wetem atoriti blong prishud.
Odinens ia, oli mekem folem stret fasin blong mekem ol odinens ia; i minim se oli yusum ol stret toktok o oli yusum oel we oli konsekretem finis.
Prisaeding atoriti nao we i holem ol stret ki i givim raet (plante taem hem i bisop long stek presiden o misin presiden), sapos i nid, folem ol instraksen we oli stap insaed long seksen ia.

Olgeta we oli givim ol prishud blesing oli talem ol toktok blong givim blesing (“Mi [o mifala] i blesem yu se, …”) be i no talem hemia olsem wan prea (“Papa long Heven, plis blesem man o woman ia blong …”).

Taem we i gat moa long wan brata we i tekpat long wan odinens o blesing, wanwan i putum raet han blong hem slo nomo long hed blong hem we i kasem odinens (o andanit long bebi we i kasem blesing) mo lef han blong hem i stap antap long solda blong brata ia we i stap long lef saed blong hem.

Olgeta man nomo we oli holem stret prishud mo oli klin inaf oli save mekem wan odinens o givim wan blesing. Olsem we Spirit i lidim hem, ol bisop mo ol stek presiden oli gat raet ia blong invaetem ol man we oli kasem prishud, be oli no klin inaf evriwan blong go long tempol, blong oli mekem o blong oli tekpat long samfala odinens mo blesing (luk long Jeneral Hanbuk, 18.3).

Oli no leftemap tingting tumas blong invaetem wan bigfala namba blong famli, fren, mo lida blong help blong mekem wan odinens o givim wan blesing. Hemia from se maet samfala oli faenem se hemia i defren smol, mo bae i tumas pipol blong stanap blong mekem wan odinens.

7.11.2

Stap Baptaesem Man

Misin presiden i holem ol ki blong stap baptaesem ol niu konvet. Anda long daereksen blong prisaeding atoriti, wan pris we i klin inaf, o wan we i kasem Melkesedek Prishud, i save mekem odinens ia blong baptaes. Blong mekem olsem, hem:

I stanap long wota wetem hem we bae i baptaes.
I holem fored blong raet han blong hem we i baptaes wetem lef han blong hem (blong mekem se i stret mo blong sefti); hem we i kasem baptaes i holem fored blong lef han blong prishud we i mekem baptaes wetem lef han blong hem.
Man we i mekem baptaes i leftemap raet han blong hem i skwea.
I talem ful nem blong hem we i kasem baptaes, mo i talem: “From Jisas Kraes i givim raet long mi, mi baptaesem yu long nem blong Papa, mo long nem blong Pikinini, mo long nem blong Tabu Spirit. Amen” (Doktrin mo Ol Kavenan 20:73).
Letem hem we i kasem baptaes blong i blokem nus blong hem wetem raet han (blong i stret long hem). Hem we i holem prishud i putum raet han blong hem long baksaed blong hem we i kasem baptaes, mo i draonem hem fulwan andanit long wota; hemia i minim se ful klos blong hem we i kasem baptaes i go andanit long wota.
I helpem hem we i kasem baptaes blong kamaot long wota.

Olsem we oli tokbaot long Jeneral Hanbuk, 18.7.6, i gat tufala witnes we oli meksua se oli mekem baptaes long stret fasin. Baptaes ia, bae oli mas ripitim sapos oli no talem ol stret toktok olsem we oli stap long Doktrin mo Ol Kavenan 20:73 o sapos sam pat blong bodi o klos blong hem we i kasem baptaes i no draon fulwan insaed long wota.

7.11.3

Stap Konfemem Man

Misin presiden i holem ol ki blong konfemem ol konvet. Be, bisop nao i lukluk ova long wok ia blong mekem evri konfemesen. Hem i meksua se oli stap konfemem ol niu konvet long wan sakramen miting insaed long wod ia we oli stap laef long hem, speseli long wan Sandei afta we oli baptaes. Oli no stap mekem konfemesen blong ol konvet long taem blong seves blong baptaes blong olgeta.

Wan brata o moa long wan brata we oli holem Melkesedek Prishud oli tekpat long konfemesen ia. Oli putum han blong olgeta, slo nomo, antap long hed blong man o woman ia. Afta, hem we i mekem odinens ia:

I talem ful nem blong man o woman ia.
I talem se odinens ia, oli mekem wetem atoriti blong Melkesedek Prishud.
I konfemem man o woman ia i kam wan memba blong Jos Ia blong Jisas Kraes Ia blong Ol Lata-dei Sent.
I yusum ol toktok ia: “Yu kasem Tabu Spirit” (i no talem “yu kasem presen we i Tabu Spirit”).
I givim ol toktok blong blesing olsem we Spirit i lidim hem blong mekem.
I endem long nem blong Jisas Kraes.

7.11.4

Stap Konsekretem Oel

Wan o moa long wan man we i holem Melkesedek Prishud i mas konsekretem olif oel bifo oli yusum blong anoentem olgeta we oli sik o stap harem nogud. Oli no save yusum wan narafala oel. Blong konsekretem oel ia, wan we i holem Melkesedek Prishud:

I holem wan kontena we i open, we insaed i gat olif oel.
I toktok long Papa long Heven.
I talem se hem i stap mekem wok ia wetem atoriti blong Melkesedek Prishud.
I konsekretem oel (i no kontena o botel) mo i setem oel ia apat blong anoentem mo blesem olgeta we oli sik mo olgeta we oli stap harem nogud.
I endem long nem blong Jisas Kraes.

7.11.5

Stap Givim Blesing long Olgeta we Oli Sik mo Olgeta we Oli Gat Hadtaem

Jisas i bin givim prishud atoriti long Ol Aposol blong Hem blong “[oli hilim ol sik, mo] blong oli gat paoa blong ronemaot devel long man” (Mak 3:15). Olgeta we oli holem Melkesedek Prishud, oli gat semmak atoriti. Yusum presen ia long stret fasin, mo plante taem.

Olgeta we oli holem Melkesedek Prishud nomo, oli save givim blesing long olgeta we oli sik, o olgeta we oli stap harem nogud. Plante taem, tu o moa long tu man we tufala i holem prishud, oli givim blesing long olgeta we oli sik, be wan i save mekem tufala wok ia, anoenting, mo i mekem siling, sapos i nid.

Sapos i no gat oel we oli konsekretem i stap, oli save givim wan blesing tru long atoriti blong prishud, mo i no gat anoenting.

Wan hasban o papa we i klin inaf we i holem Melkesedek Prishud, plante taem i sapos blong blesem ol memba blong famli blong hem we oli sik.

Ol brata oli mas blesem ol sikman taem sikman i askem, o taem olgeta we oli wari tumas oli askem, hemia blong mekem se blesing ia, bae i folem fet blong olgeta. Olgeta we oli holem Melkesedek Prishud we oli stap visitim ol hospital oli no mas askem sam janis blong blesem ol sikman.

Sapos wan i askem moa long wan blesing from semfala sik, bae hem we i holem prishud i no nidim blong anoentem sikman wetem oel afta long fasfala blesing. Be, hem i givim blesing i mekem olsem taem hem i putum han blong hem antap long hed blong sikman, mo wetem atoriti blong prishud.

Blong blesem ol sikman, i gat tufala pat long hem: (1) anoenting wetem oel, mo (2) silim anoenting ia.

Anoenting wetem Oel

Anoenting ia wetem oel, wan we i holem Melkesedek Prishud nao i mekem. Hem i:

Putum wan drop blong oel we oli konsekretem antap long hed blong sikman.
Putum han blong hem slo antap long hed blong sikman, mo i talem ful nem blong sikman ia.
I talem se hem i stap mekem wok ia wetem atoriti blong Melkesedek Prishud.
Talem se hem i stap anoentem sikman ia wetem oel we oli bin konsekretem finis blong anoentem mo blesem olgeta we oli sik mo olgeta we oli stap harem nogud.
I endem long nem blong Jisas Kraes.

Stap Silim Anoenting

Plante taem, tu o moa long tu we oli holem Melkesedek Prishud, oli putum han blong olgeta slo antap long hed blong wan blong silim anoenting ia; be i posibol blong wan nomo we i holem Melkesedek Prishud i mekem blesing ia hemwan, sapos i nid. Taem hem i silim anoenting ia, hem we i holem Melkesedek Prishud:

Singaotem man o woman ia long ful nem blong hem.
Talem se hem i stap silim anoenting ia tru long atoriti blong Melkesedek Prishud.
I givim ol toktok blong blesing olsem we Spirit i lidim hem blong mekem.
I endem long nem blong Jisas Kraes.

7.11.6

Stap Givim Ol Blesing blong Kamfot mo Kaonsel

Olgeta we oli holem Melkesedek Prishud, oli save givim tu ol blesing blong kamfot mo kaonsel long ol narawan we oli askem. Blong silim anoenting, wan o moa long wan brata we i holem Melkesedek Prishud i putum han blong hem slo antap long hed blong hem we i kasem blesing. Afta nao, man we i holem prishud, we i givim blesing:

I singaotem man o woman ia long ful nem blong hem.
I talem se blesing we hem i stap mekem, hem i mekem wetem atoriti blong Melkesedek Prishud.
I givim ol toktok blong blesing olsem we Spirit i lidim hem blong mekem.
I endem long nem blong Jisas Kraes.

Ol misinari we oli givim blesing long ol memba oli mas ripotem se oli givim blesing stret i go long bisop blong memba ia, o tru long presidensi blong kworom blong ol elda, o long wod misin lida, mo olgeta bae oli talemaot long bisop.