Mensahe gikan sa Unang Kapangulohan ug sa Korum sa Napulog Duha ka Apostoles

Minahal nga Kaubang Misyonaryo:

Human sa Iyang Pagkabanhaw, si Jesukristo mipakita ngadto sa Iyang mga disipulo ug misugo kanila nga “himoa nga akong mga tinun-an ang tanang katawhan” (tan-awa sa Mateo 28:19) “sa tibuok kalibotan, bunyagi sila sa ngalan sa Amahan, sa Anak ug sa Espiritu Santo ug tudloi sila pagtuman sa tanan nga akong gisugo kaninyo” (Mateo 28:19–20).

Ikaw gitawag pinaagi sa pagpadayag sa pinili nga mga sulugoon sa Dios sa pagtabang sa mga Apostol niining talagsaong buhat sa pagdala sa ebanghelyo ni Jesukristo ngadto sa kalibotan aron makahimo og mga tinun-an sa tanang kanasoran.

Kon ikaw moserbisyo og misyon sa tibuok nimong kasingkasing, makatabang ka sa pagtuman sa duha ka dagkong mga sugo nga: “Higugmaa ang Ginoo nga inyong Dios … [ug] mohigugma sa inyong silingan ingon sa inyong kaugalingon” (Doktrina ug mga Pakigsaad 59:5–6).

Aron mamahimong epektibo nga misyonaryo, kinahanglang usa ikaw ka matinud-anon nga disipulo ni Jesukristo. Kami nagdapit kanimo sa pagpalambo sa imong mga talento ug mga kahanas alang sa himaya sa Dios. Si Jesukristo mopalambo kanimo. Ang Langitnong Amahan nahigugma kanimo, ug Siya motabang kanimo sa paghigugma ug pagpanalangin sa Iyang mga anak bisan asa ka moserbisyo. Hatagan ka Niya og kalig-on ug ang mga tawo nga imong gialagaran, pinaagi sa Pag-ula ni Jesukristo, aron mahimong tinud-anay nga “makabig ngadto sa Ginoo” (Alma 23:6).

Kini nga mga sumbahan sa misyonaryo aprobado sa Unang Kapangulohan ug sa Korum sa Napulog Duha ka Apostoles. Kini mopanalipod kanimo sa pisikal, espirituwal, ug emosyonal nga paagi ug motabang kanimo nga mamahimo nga disipulo nga maoy gikinahanglan ni Jesukristo kanimo.

Kon aduna kay mga pangutana mahitungod sa usa ka sumbanan, mainampoon nga mangutana sa Ginoo aron matabangan ka nga makasabot sa kaimportante niini, ug dayon kon gikinahanglan, pangutana sa imong kompanyon, sa imong mga batan-ong lider nga misyonaryo, o bisan asa sa imong mga lider sa misyon alang sa tabang. Magtuon kanunay niining mga sumbanan uban sa imong kompanyon ug paningkamot sa pagtuman niini.

Kami midayeg kanimo gumikan sa pagdawat sa tawag sa pagserbisyo og usa ka full-time nga misyon, ug mag-ampo kami nga imong makaplagan ang tinuod nga kalinaw ug kalipay diha sa pagserbisyo sa Ginoo nga si Jesukristo.

Unang Kapangulohan ug Korum sa Napulog Duha ka Apostoles

Ang Simbahan ni Jesukristo sa mga Santos sa Ulahing mga Adlaw