1

O Lou Aafiaga Faafaifeautalai Faamisiona

1.0

Faatomuaga

O lau misiona e le’i amataina moni i le aso na vaetofia ai oe ma e le mae’a foi i le aso e faamalolo ai oe. O le misiona e le faapei o le ofuina o se toniga o se tagata faigaluega po o se aoga i le taeao ae tatalaese pe a maea le aso. Mai lava i le taimi na papatisoina ai oe, ua e iai i le ala o le feagaiga e ta’ita’i atu ai i le fiafia e faavavau, olioli, ma le filemu. O lou aafiaga faafaifeautalai faamisiona e mafai ona avea o se mea e suia ai ma e fai foi ma vaega taua o le aafiaga o lou soifuaga i le misiona.

Pe a matau mai i se vaaiga e faavavau, o lou aafiaga faafaifeautalai faamisiona ua sili a’e nai lo le na o le siakiina o pusa ma maka ua uma—o se auala e faaauau ai pea ona avea o se soo o Iesu Keriso mo le soifuaga atoa.

Na toe tepa le Perofeta o Iosefa Samita i faamanuiaga ma avanoa tatou te maua pe a tatou filifili e avea o se vaega o lenei galuega maoae o le faaolataga. Sa ia fesiligia le mua’i Aupaia “Uso e [ma tuafafine], tatou te lē o atu pea ea i lenei faamoemoega sili? O aga’i i luma ae le o le solomuli. Lototetele, uso e [ma tuafafine]; ma ia aga’i atu, aga’i atu pea i le manumalo! Ia olioli o outou loto, ma ia fiafia tele” (Mataupu Faavae ma Feagaiga 128:22).

Ia fiafia i lo outou aafiaga faafaifeautalai e faapei ona outou alolofa i le Atua ma o outou tuaoi. O le taimi lenei e olioli ai ma maua aafiaga o le fiafia e faavavau ma le filemu e ala ia Iesu Keriso.

1.1

Usiusitai

O soo moni o Iesu Keriso e usiusitai. Na aoao mai le Faaola, “Afai tou te alofa mai ia te au, ia outou tausi mai i a’u poloaiga” (Ioane 14:15). O le tausia o poloaiga o lona uiga e te naunau ma le faamaoni e faia mea ua poloaiina ai oe e le Alii, aua e te alofa ia te Ia ma e te faia foi ma le “olioli” (Kolose 1:11) ma le “fiafia ma le loto faamaoni” (Galuega 2:46).

O Iesu Keriso o le faataitaiga o le faatuatua atoatoa. Na Ia faia lava le finagalo o Lona Tama. Mulimuli ia te Ia e ala i lou faia o le mea silisili e tausia Ana poloaiga uma ma ola ai i tulaga faatonuina mo faifeautalai. O le faatuatua ma le usiusitai o lona uiga foi o lou taumafai e suesue, ola, ma alualu i luma; ia vave ona faasao mea sese; ma faia ou tiute patino e tusa ai ma au faatinoga.

O lou ta’ita’i misiona o le a fesoasoani pea ia te oe e a’oa’o pe faapefea ona faaaoga ia mataupu faavae o i lenei tusitaulima.

O le a saogalemu lelei oe pe a e mulimuli i tulafono ma tulaga faatonuina a le misiona ma faaaoga tatau foi le mafaufau lelei. Ae ia e iloa foi e ui ina o loo e tausia poloaiga, e mafai foi ona aafia oe i ni puapuaga, ma’i, po o le faamanualia (tagai i le Ioane 16:33). Na o’o le Faaola i nei mea uma (tagai i le Alema 7:11–12; Mataupu Faavae ma Feagaiga 122:8), ma e ua Ia folafola mai, “Ou te le tu’ua outou o matuaoti: ou te sau ia te outou” (Ioane 14:18).

E alofa le Atua ia te outou. Filifili e tausi i poloaiga ona e te alofa i le Atua. Aua le taumafai e fai ni feutagaiga ma le Alii ma faamoemoe e maua ni faamanuiaga faapitoa e ala i le fetuunai o mea e manaomia ona e faia. O tulaga moomia e tatau ona e tausia ua faamaonia e le Au Peresitene Sili ma le Korama a Aposetolo e Toasefululua ma o loo maua i nei faatulagaga faatonuina. Mo se faataitaiga, aua e te taumafai e fefaatauai ma le Alii e ala lea i lou ala po, e aunoa ma se meaai poo se meainu (e ese mai le anapogi faalemasina), po o le faamisi o se aso o sauniuniga.

1.2

Tulaga Faatonuina mo le Olaga

Ua valaau oe e le Atua e tuuto atu oe lava ia te Ia i lou olaga atoa. O tulaga faatonuina o le misiona e pei o suesuega patino, faatulagaina o sini, ma le faaaogaina ma le amiotonu o tekinolosi o le a faamanuiaina ai oe i lau misiona ma fesoasoani ia te oe i lou olaga atoa.

Ia avea poloaiga o loo i tusitusiga paia, o mataupu faavae i le Talai Atu Lau Talalelei: O se Taiala i Galuega Faafaifeautalai (2019), ma tulaga faatonuina faafaifeautalai i lenei tusi e fai ma mataupu faavae taiala o lou olaga. A o e mulimuli i poloaiga a le Atua ma tulaga faatonuina, o le a Ia faatonutonu, faamanuia, ma taiala oe i lou olaga atoa.