O le Mamoe na Leiloa, saunia e Yongsung Kim, havenlight.com

Soifua Manuia Faaletino

4.0

Faatomuaga

O le galuega faafaifeautalai e manaomia ai le tautinoga faaletino ma le faalelagona. O tulaga faatonuina i lenei vaega ma i le Faafetaui i le Olaga Faafaifeautalai o le a fesoasoani ia te oe e saunia ai lou mafaufau ma le tino e auauna atu ai ma le lelei i le Alii ma Lona faamoemoega. Iloilo pea lava pea nei tulaga faatonuina i le gasologa o lau misiona.

4.1

Taumafa Maloloina ma Sauniuniga

O le suavai ma taumafa maloloina e tatau ai e taua i lou soifua manuia.

4.1.1

Taiala Faalauaitele o Taumafa Maloloina

Faamolemole ia mulimuli i tulaga faalauaitele o taumafa maloloina o loo i lalo:

Inu le 6 i le 12 ipuvai (48 i le 96 aunese po o le 1.5 i le 3 lita) o suavai mama i aso taitasi. O le a e manaomia le tele o le suavai ma le masima pe afai o le a e afu pea lava pea i le gasologa o le aso po o le taimi o le faamalositino.
Taumafa meaai paleni e aofia ai fualaau faisua, fualaau aina, fatu laau, gao maloloina, ma polotini.
Faatapulaa meaai leaga, faguinu kaponeti, meaai gaosi, ma meaai mai faleaiga.

4.1.2

Sauniuniga Saogalemu o Taumafa

Matau taiala nei ina ia mautinoa ai ua saogalemu lelei le sauniuniga o au taumafa:

Fufulu mama luga o mea o saunia ai taumafa i ni vai mama, vevela, ma se fasimoli a o lei faia ma pe a maea foi ona faia le kuka.
Fufulu mama luga o mea o saunia ai taumafa i ni vai mama, vevela, ma se fasimoli a o lei faia ma pe a maea foi ona faia le kuka.
Teu aano o manufasi mata, moa, fuamoa, ma taumafa mai le sami ese mai isi taumafa a o faia se kuka.
Faavela lelei aano o manufasi, ia, ma moa.
Aloese mai le taumafaina o aano o manufasi e lei vela lelei pe mata foi.
Fofoe fua mata ma fualaau aina, pe fufulu ia mama lelei.
Teu i le pusaaisa taumafa o totoe ina nei faaleagaina. Ina ia puipuia mai le mai, tiai taumafa ua umi ona tuu nai lo le taimi faatulagaina i le pusa.
Taumafai ina ia aua le taumafaina meaai mai tagata faatau i le auala, ona e le iloa le lelei ma le saogalemu o lo latou sauniuniga.

Ia faaaoga pea lava pea nei taiala, e tusa lava o nisi (e aofia ai isi faifeautalai) o loo taumafai e tauanau oe e le taua pe ogaoga.

Matamata i le vitio lenei mo nisi faamatalaga e faatatau i taumafa maloloina ma le saogalemu.

17:50

4.1.3

Suavai ma Taumafa Susu Saogalemu

Ua na o suavai mama ma taumafa gaosi mai susu faamamaina e saogalemu ona e taumafaina.

Mulimuli i nei ma nisi taiala faaopoopo e tuuina mai e lau misiona:

Faaaoga se faamama vai pe afai o e talai i se eria e le maua ai se suavai faamamaina.
Faaaoga suavai mama e fufulu ai ou nifo ma faamama ma saunia ai taumafa.
Taumafa na o meaai gaosi mai susu faamamaina.

Ia faaeteete ona i nisi nofoaga, o kiupi aisa ma faguinu i faleaiga po o maketi atonu e gaosi mai suavai le faamamaina. Ia faaeteete, ma aua le taumafaina aisa po o faguinu atonu e le saogalemu.

4.2

Faamalositino

O le faamalositino e tumau ai lou malosi ma fesoasoani e aveesea ai le atuatuvale. Fai ia avea o se vaega o lou soifuaga i aso taitasi (tagai 2.4.2). Faafesootai le ofisa o le misiona pe afai e iai ni au fesili. Mulimuli i taiala e patino lava i le misiona faapea foi ma taiala faalauaitele o loo mulimuli mai:

Fai ni faamalositino eseese i le gasologa o le vaiaso, e aofia ai faamalositino mo le fatu, malosi, ma le sooga o ivi. Mo lou saogalemu, taumamao mai le siisii o mea mamafa.
Afai e iai sau masini feaveai, e mafai ona e faaaogaina se polokalama ua faamaonia e ou taitai o le misiona e fuafua ai au faamalositino.
E le tatau ona e faamalositino i nofoaga faitele po o faletoleni taatele.

4.3

Puleaina o le Loto Atuatuvale

O le galuega faamisiona e mamafatu, ma o le lagona atuatuvale mai lea taimi i lea taimi o se mea e masani ai. E mafai ona e saunia lou tino ma lou mafaufau e taulimaina le atuatuvale e ala lea i le faaaogaina o le lagolago a le aiga (tagai 3.9.1) e faatasi ai ma le faataitai o le uiga o le taumafa maloloina lelei (tagai 4.1.1), faamalositino e le aunoa (tagai 4.2), moe masani, malologa, ma le faaleagaga (e aofia ai le tatalo, manatunatu, ma le suesuega).

I lau misiona atoa, faaaoga le Faafetaui i le Olaga Faafaifeautalai e fesoasoani ia te oe e pulea ai lou atuatuvale ma fesoasoani ai i isi faifeautalai. Afai e te lagona o oe ma lau soa e iai ni faafitauli e puleaina ai le atuatuvale i ni auala maloloina lelei, pe afai foi e iai se faalavelave faafuasei, faafesootai ou taitai o le misiona.

Afai ua tusia atu ni au fualaau mo le atuatuvale, mulimuli i le vailaau fautuaina ma le taitaiina a lou fomai.

Na toe tepa le Aposetolo o Paulo i ana taumafaiga o se faifeautalai ma aoao mai o le Alii o le a faatumauina, lagolagoina, ma fesoasoani ia i latou o e saili ia te Ia. O le a le tuua lava oe e le Alii. Sa aoao mai Paulo:

“Aua o le Atua o le na fai atu ia pupula mai le malamalama mai le pouliuli, ua faapupula mai e ia i o matou loto, ina ia malamalama e iloa ai le mamalu o le Atua i fofoga o Iesu Keriso. … Ua puapuagatia i matou i mea uma, a e le faaatuatuvaleina; ua le mautonu, a e le aveesea ai le faamoemoe; ua sauaina, a e le tuulafoaiina; ua lafotuina i lalo, a e le fano. … O loo ia i matou lea lava loto faatuatua, e pei ona tusia, ua ou faatuatua, o le mea na ou tautala atu ai; o i matou foi ua matou faatuatua, o le mea lea ua matou tautatala atu ai. … “Aua o lo matou puapuaga mamasagia ma le vave mavae, e tupu mai ai mo i matou le manuia mamafa e matua silisili ese lava ma le faavavau; (2 Korinito 4:6, 8–9, 13, 17).

Mo nisi faamatalaga tagai i le vaega 7.6 “Tulaga Faigata.”

4.4

Tausiga Faafomai

Tauave ma le faaeteete lou soifua maloloina faaletino ma le faalelagona. Ia iloa e le tagata o loo faamaopoopoina tausiga faalesoifua maloloina a le misiona tulaga uma ( e pei o fualaau o loo e inumia, uiga e tetee atu e le tino, po o gaoioiga e tatau ona e taofia) ina ia e maua le lagolago e te manaomia. Faafesootai le ofisa o le misiona pe afai e iai ni au fesili e faatatau i toatuga faalesoifua maloloina.

Mo lou saogalemu:

Aua le faasoaina fualaau faamaonia ma soo se tasi pe faaaoga foi fualaau faamaonia a se isi.
Aua nei lafoina mai ia te oe e se tasi o le aiga po o uo fualaau e faasaina i le atunuu po o le eria o loo e galue ai.

Afai e faafuasei ona e maua i ni aafiaga faalesoifua maloloina, ia vave ona fai ni gaoioiga masani e faaaoga lelei i ai le mafaufau mo lou saogalemu po o se tausiga lelei. Valaau i le auaunaga o faalavelave faafuasei o le lotoifale ( e pei o le 911 i le Iunaite Setete o Amerika) sei vagana ua tuuina atu ia te oe nisi o faatonuga i lau misiona. I se vave e mafai ai, faafesootai ou taitai o le misiona.

Afai e te manaomia tausiga faalesoifua maloloina e le o se faalavelave faafuasei, valaau vave le tagata o le misiona o loo faamaopoopoina tausiga faalesoifua maloloina. O asiasiga le faafuasei e ao ona muai faamaonia e le tagata e faamaopoopoina tausiga faalesoifua maloloina a le misiona. E faasino atu e le tagata e faamaopoopoina tausiga faalesoifua maloloina a le misiona ia te oe se fomai i lou eria.

Mo nisi faamatalaga tagai i le vaega 7.7 “Toatuga Faalesoifua Maloloina Faaletino ma Faalemafaufau.”

4.5

Tulaga Matautia ma Lamatia

E tele tulaga e ono matautia e mafai ona foia i le faaaoga o le mafaufau tatau ma le mulimuli ai i tulaga faatonuina o le misiona, e aofia ai le iai i le mea e mafai ai ona e vaai ma lagona atu ai lau soa. Ae peitai, e mafai lava e tagata ona faamanualia oe e tusa lava po o lou taumafai ina ia saogalemu lelei. Afai o i ai se faafitauli, lipoti vave loa i se tasi o ou taitai o le misiona.

Aluese faavave pe afai o oe po o lau soa ua lagona le le mautonu i se nofoaga, tagata, po o le tulaga (e aofia ai tulaga e aoao atu ai). Faalogo i musumusuga faaleagaga. E mafai ona e tuua lau soa pe afai e te lagona o le a fai o ia ma tulaga matautia ia te oe. Afai ae te tuua lau soa, valaau faavave se tasi o ou taitai o le misiona.

Mo nisi faamatalaga tagai i le vaega 7.8 “Tulaga Matautia.”

4.6

Fale

Faaali lou faaaloalo mo lou fale, o le e ona le nofoaga po o le talimalo, ma ou tuaoi. Afai e te faaleagaina se mea, o le a gafa oe ma le totogiina mo le toe lipeaina e faaaoga ai au lava tupe patino. Talanoa ma le tagata o faamaopoopoina fale o le misiona pe afai e iai sou faaletonu e faatatau i lou fale.

Mo nisi faamatalaga tagai i le vaega 7.9 “Saogalemu o Fale.”

4.7

Femalagaaiga

Ia mulimuli lelei pea i tulafono o le lotoifale i taavale afi, tulafono, ma aga masani pe a e malaga. Faaaoga le mafaufau tatau, ia iloa lelei lou faasinomaga, ia faamasani ma lou eria, ma mulimuli i le tulaga faatonuina o le saogalemu faalauaitele o loo i lenei tusitaulima.

Mo nisi faamatalaga tagai i le vaega 7.10 “Saogalemu o Femalagaaiga.”

4.8

Tupe

Tupe Lagolago a Faifeautalai e faaalia mai ai le taulaga a tagata taitoatasi o le Ekalesia. O tupe e paia, ma e ao ona e faaaogaina ma le tatau, faamaoni, ma le paia atoa e tatau ai.

4.8.1

O Tupe Lagolago a Faifeautalai

Faaaoga tupe lagolago a faifeautalai mo mea patino e lagolago ai le galuega faafaifeautalai. Vagana ai ni nai tuusaunoaga laiti, e tatau ona e faaaoga au tupe uma o le misiona i masina taitasi. Aua nei faasaoina se tupe mai nei vaegatupe po o le tuuina atu foi o se vaega o le tupe i se tasi, e aofia ai soo se isi i le aiga. Aua nei nono pe aitalafu tupe.

O lau paketi mo le tupe o le misiona e ono aofia ai mea nei:

Taulaga anapogi o loo totogi i le uarota po o le paranesi o loo e galue ai.
Meaai e saunia ai taumafa maloloina (tagai 4.1.1).
Femalagaaiga, e aofia ai le penisini po o femalagaaiga lautele.
Mea e teuteu ai le lauulu ma isi mea teuteu patino.
Faamamaina o laei ma mea e fai ai tagamea.
Tupe faaalu i le meli po o le initoneti mo fesootaiga faalevaiaso ma le aiga (tagai 3.8).
Taumafataga faatapulaa i faleaiga.

E le manaomia ona e totogi se sefuluai i tupe lagolago o le misiona.

Tagai 4.8.2 mo se lisi o mea e mafai ona totogi i au lava tupe patino.

4.8.2

Tupe Patino a le Tagata Lava Ia

O tupe patino a le tagata lava ia e auina sa’o atu ia te oe mai le aiga. Faaaoga tupe patino a le tagata lava ia mo:

Toe suiina o se’evae ma lavalava.
Faatauina o uila, tausia, ma lipea.
Totogi o falemai e le totogiina e le misiona, e pei o ni vaegatupe totogi, totogi mo le vaaia o mata po o nifo, ma le tausia o gasegase na maua ai muamua.
Totogi o faasalaga mo taavale ma mea e paka ai.
Toe faaleleia o fale pe a faapea na e faaleagaina.
Masini leo po o vitio.
Mea e manatua ai ma meaalofa.

Sefuluai mai tupe patino a le tagata lava ia ma isi tupe maua mai pisinisi po o teugatupe i le aiga e tatau ona totogiina i tupe patino a le tagata lava ia i lau uarota o iai lou aiga pe totogi i foai i luga o le initoneti.

4.8.3

Ola Tutoatasi ma le Fuafuaga o le Faaaogaina o Tupe

Ia avea ma se tagata e ola tutoatasi i le taimi o lau misiona e ala i le fausiaina ma le mulimuli ai i se fuafuaga e faaalu ai tupe. O lenei tomai o le a fesoasoani ma faamanuiaina ai oe i lou olaga atoa. Aloese mai le fesiligia o soa po o le aiga mo nisi tupe seia vagana o se faalavelave.

O le fausiaina ma le mulimuli ai i se fuafuaga e faaaoga ai tupe e aofia ai le faia o se lisi o mea uma e tatau ona e faatauina mo le masina ona filifili lea o mea e sili ona taua ona totogi muamua lea. Filifili muamua mea o loo e manaomia a o lei filifilia isi mea.

Afai e te manaomia nisi tupe faaopoopo pe o iai ni au fesili e uiga i tupe totogi, talanoa i le failautusi o mea tautupe po o ou taitai o le misiona.

4.9

Ofu ma Foliga Vaaia

I le avea ai o oe ma sui ua faatagaina o Iesu Keriso ma Lana Ekalesia toefuataiina, o ou foliga vaaia e tele ina avea ma uluai savali e maua e isi. E ao ona ogatusa ma le savali paia ua tofia oe e faasoa atu. I lau misiona atoa, ia mautinoa o ou foliga vaaia ma lau amio e fesoasoani i isi e taulai atu ai i lena savali.

4.9.1

Faatulagaga Faalauaitele mo Laei ma Foliga Vaaia

O nisi mea ma foliga o laei o le a fautuaina ina ia talafeagai ma le aganuu ma le tau o le atunuu o lau misiona. I aso o sauniuniga, e tatau ona e ofuina ofu masani o faifeautalai i nofoaga faitele. Ae peitai, pe a manaomia mo se gaoioiga faapitoa, e mafai ona e ofuina ni ofu faasamasamanoa. Faamolemole iloilo tulaga faatonuina o loo maua i le ChurchofJesusChrist.org/callings/missionary/dress-and-appearance. O lenei upega tafailagi o loo maua ai faataitaiga o laei talafeagai mo lau misiona. O ou taitai o le misiona ma le Au Peresitene o le Eria e ono faia ni suiga i nei taiala ina ia taulimaina ai tulaga i le lotoifale.

Tagai i le 7.7.4 mo faatonuga faaopoopo i le auala e faagasolo ai pe afai e tulai mai se faalavelave po o se tulaga faafuasei.

4.9.2

Tulaga Faatonuina Faalauaitele mo le Tausia Lelei o le Tino

Mulimuli i tulaga faatonuina o le tausia maloloina o le tino:

Faamalu i aso taitasi, pe a talafeagai ai.
Fufulu ou nifo i taimi uma.
Faaaoga mea faamanogi o le tino i taimi uma.
Faamama lou lauulu pea lava pea.
Fufulu mama ou lima i taimi uma, e aofia ai a o lei saunia taumafa ma pe a maea ona faaaogaina le faleese.
Uu lou tino i se kulimi e puipuia ai mai le la.
Filifili se teuga mama, matagofie o lou ulu e faigofie ona tausia lelei