Koling blong Mi olsem wan Kaonsela insaed long Presidensi blong Kworom blong Ol Elda

Ol Responsabiliti

Lod i tangkyu from tingting blong yu blong wantem givim seves insaed long Jos blong Hem. Andanit ia i wan sot lukluk blong ol responsabiliti blong koling blong yu.

Stamba Tingting blong Kworom blong Ol Elda

Melkesedek Prishud i helpem ol pikinini blong God blong oli rere blong gobak stap wetem Hem, long ples blong Hem. Ol memba blong kworom blong ol elda, oli wok tugeta blong help blong mekem wok blong God blong fasin blong sevem man mo fasin blong kam olsem wan god, i hapen. Ol givim seves long ol narawan, mekem ol prishud wok blong olgeta, bildim yuniti, mo lanem mo laef folem doktrin (luk long Jeneral Hanbuk, Stap Givim Seves Insaed long Jos Ia blong Jisas Kraes blong Ol Lata-dei Sent, 8.1).

Ol Kaonsela

Ol kaonsela blong kworom blong ol elda oli sapotem presiden long ol responsabiliti blong hem blong oganaesem ol wok wetem presidensi blong Rilif Sosaeti mo lukaotem ol wok blong givhan, ol aktiviti, ol ripot, ol rekod, mo ol faenens. Oli save asaenem ol kaonsela long kworom blong ol elda mo Rilif Sosaeti, blong lidim wod misinari wok o ol wok blong tempol mo famli histri (luk long 8.3.3.2).

Presidensi

Presidensi blong kworom blong ol elda mo sekretari oli gat miting evri taem. Blong stap helpem ol fiuja elda ia blong rere blong kasem Melkesedek Prishud i wan long ol fas hae wok blong presidensi (luk long 8.4).

Kworom blong Ol Elda mo Rilif Sosaeti

Presidensi blong Kworom blong Ol Elda mo Rilif Sosaeti oli wok wetem ol asaenmen blong wok blong givhan mo help blong lid long tempol mo famli histri wok mo traehad blong invaetem evriwan blong kasem ol blesing blong gospel. Oli gat wan ki rol blong tijim ol memba blong wod ol prinsipol blong givhan, ol givhan intaviu, stap laef folem loa blong livim kakae, stap bildim wan Indipenden laef, mo kam antap blong wan i stap rere long hemwan, mo mekem famli i rere (luk long 22.6.2).

Ol Sandei Miting

Ol kworom blong ol elda oli mit long nambatu mo namba fo Sandei blong manis blong leftemap fet, bildimap fasin blong stap wok wan, mo mekem ol famli mo ol hom oli kam moa strong. Presidensi blong kworom blong ol elda oli prea mo jusum ol mesej blong jeneral konfrens we i jes pas mo toktok raon long hem folem ol nid blong ol memba (luk long 8.2.1.2).

Seves mo Ol Aktiviti

Ol presidensi blong kworom blong ol elda oli save mekem plan blong ol aktiviti blong mekem ol memba blong kworom oli kam strong moa mo i givim olgeta ol janis blong oli givim seves tugeta. Ol presidensi oli toktok raon long ol aktiviti wetem bisop (luk long 8.2.1.3).