Lin b’oqb’al jo’ aj tenq’ aj k’ehol na’leb’ sa’ li awa’b’ejil re lix molamebʼ li xbʼeenil
Li k’a’ru teneb’anb’il
Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.
Li rajom lix molameb’ li xb’eenil
Li Tijonelil re Melkisedek naxtenq’aheb’ li ralal xk’ajol li Dios chixkawresinkil rib’ re sutq’iik rik’in a’an. Eb’ li komon sa’ lix molameb’ li xb’eenil neke’k’anjelak sa’ komonil re tenq’ank chixb’aanunkil lix k’anjel li Dios re li kolb’a-ib’ ut li taqenaqil loq’al. Neke’k’anjelak chiru ras riitz’ineb’, neke’xb’aanu li teneb’anb’il sa’ xb’eeneb’ sa’ li tijonelil, neke’xwaklesi li junajil, ut neke’xtzol ut neke’xyu’ami li tzol’leb’ (chi’ilmanq Jolomil K’anjenel Hu: Li k’anjelak sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 8.1).
Eb’ laj tenq’ aj k’ehol na’leb’
Eb’ laj tenq’ aj k’ehol na’leb’ neke’xtenq’a li awa’b’ej rik’in lix teneb’ankil re xk’uub’ankil xna’leb’ rik’in li awa’b’ejil re li Komonil re Tenq’ank; xb’eresinkil li ilok komon, li kok’ k’anjel, li tz’iib’anb’il esil, ut chan ru na’oksiman li tumin. Eb’ laj tenq’ aj k’ehol na’leb’ sa’ lix molameb’ li xb’eenil ut li Komonil re Tenq’ank naru nekek’ehe’ xtaqlankil chixjolominkil li k’anjel re xjultikankil li evangelio sa’ li teep malaj li k’anjel re li santil ochoch ut li resilal li junkab’al (chi’ilmanq 8.3.3.2).
Li awa’b’ejil
Li awa’b’ejil re lix molameb’ li xb’eenil ut laj tz’iib’anel neke’xch’utub’ rib’ chi kok’ aj xsa’ Jwal aajel ru xk’anjel li awa’b’ejil re xtenq’ankileb’ li maji’ neke’ok choq’ xb’eenil re te’xkawresi rib’ chixk’ulb’al li Tijonelil re Melkisedek (chi’ilmanq 8.4).
Lix molameb’ li xb’eenil ut li Komonil re Tenq’ank
Eb’ li awa’b’ejil re lix molameb’ li xb’eenil ut li Komonil re Tenq’ank neke’xb’eresiheb’ sa’ komonil li k’anjel re ilok komon ut neke’tenq’an chixjolominkil li k’anjel re li santil ochoch ut li resilal li junkab’al, ut li k’anjel re xb’oqb’aleb’ chixjunileb’ chixk’ulb’aleb’ li rosob’tesihom li evangelio. Jo’kan ajwi’, aajel ru xk’anjeleb’ re xtzolb’aleb’ li komon re li teep chirix li k’anjel re ilok komon, li tz’ilok-ix choq’ reheb’ laj ilol komon, xyu’aminkil li chaq’rab’ re li kuyuk sa’, rilb’al rib’ chi us, ut xkawresinkileb’ li komon ut li junkab’al (chi’ilmanq 22.6.2).
Eb’ li ch’utam re domingo
Eb’ lix molameb’ li xb’eenil neke’xch’utub’ rib’ chiru li xkab’ ut li xkaa domingo re li po, re xnimob’resinkil li paab’aal, re xkawob’resinkil li junajil, ut re xkawresinkileb’ li junkab’al ut li ochoch. Rik’in tijok, li awa’b’ejil re lix molameb’ li xb’eenil naxsik’eb’ ru li aatin re li jolomil ch’utub’aj-ib’ toje’ xnume’ li te’xtz’il rix a’ yaal rajomeb’ ru li komon (chi’ilmanq 8.2.1.2).
Li k’anjelak chiru as iitz’inb’ej ut eb’ li kok’ k’anjel
Eb’ li awa’b’ejil re lix molameb’ li xb’eenil naru neke’xk’uub’eb’ li kok’ k’anjel re xkawob’resinkileb’ li komon sa’ li molam, ut re xtenq’ankileb’ chi k’anjelak sa’ komonil (chi’ilmanq Eb’ li awa’b’ejil neke’aatinak rik’in li obiisp chirixeb’ li kok’ k’anjel (chi’ilmanq 8.2.1.3).