Eddo ko

Irooj ej m̧ōņōņō kōn wujlepļo̧k eo am̧ n̄an jerbal ilo Kabun̄ eo An. Ijin ilaļ ej juon kōmeļeļe ekadu in eddo ko n̄an kūr eo am̧.

Jibadbad eo an Doulul eo an Elder ro

Melkisedek Priesthood eo ej jipan̄ ajri ro nejin Anij kōppopo n̄an jepļaakļo̧k n̄an Ippān. Ro uwaan doulul eo an elder ro rej jerbal ippān doon n̄an jipan̄ kōtōprak jerbal in lo̧mo̧o̧r eo an Anij im mour ijo eutiej tata. Rej jerbal n̄an ro jet, kakūrm̧ool eddo ko an priesthood, kalōk ippān doon, im ekkatak im mour kōn katak ko (lale Bok in Meļeļe eo Eļap, Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 8.1).

Rikakpilōklōk ro

Rikakpilōklōk ro an doulul eo an elder rej rie būreejtōn eo kōn eddo ko an n̄an ejaake kijejeto ko ippān būreejtōnji eo an Doulul eo an Kōrā ro im lale jerbal in karejar, m̧akūtkūt ko, riboot ko, reko̧o̧t ko, im jāān ko. Rikakpilōklōk ro jān doulul eo an elder ro im Doulul eo an Kōrā ro remaron̄ bōk ijitōn̄ ko n̄an tōl jerbal in mijenede an ward ak jerbal in menmenbwij ko an baam̧le (lale 8.3.3.2).

Būreejtōnji

Būreejtōnji eo an doulul eo an elder ro im rijeje eo rej kemakijkij aer kweilo̧k ippān doon. Jipan̄ em̧m̧aan ro rej pojak n̄an bōk Priesthood eo an Melkisedek ej juon iaan kālet ko ilōn̄tata an būreejtōnji eo (lale 8.4).

Doulul eo an Elder ro im Doulul eo an Kōrā ro

Doulul eo an elder im Doulul eo an Kōrā ro rej loloorjake jerbal in karejar im jipan̄ tōl jerbal in tampeļ im menmenbwij an baam̧le im kijejeto ko n̄an kūr aolep n̄an bōk kōjeraam̧m̧an ko an gospel in. Rej barāinwōt wōr juon aer eddo eaorōk ilo katakin membōr ro an ward eo pedped in jerbal in karejar, intōrpiu ko an jerbal in karejar, mour kōn kakien eo an jitlo̧k, kalōk un̄n̄are peid make, im kōļapļo̧k m̧aanjabpopo ko an kajjojo armej im baam̧le (lale 22.6.2).

Kweilo̧k ko an Jabōt

Doulul eo an elder ej kweilo̧k ilo Jabōt ruo im emān ilo juon allōn̄ n̄an kōļapļo̧k tōmak, kalōk ippān doon, im kōkajoorļo̧k baam̧ļe ko im im̧ōko. Būreejtōn eo an doulul eo an elder ro rej jar kake enaan ko jen kwelok eo eļap ekāāl tata n̄an ekōnono pedped ioon aikuj ko an membōr ro (lale 8.2.1.2).

Jerbal in jipan̄ im M̧akūtkūt ko

Būreejtōnji ko an doulul eo an elder ro remaron̄ karōk m̧akūtkūt ko n̄an kōkajoorļo̧k ro uwaan doulul eo im leļo̧k n̄an er iien ko rem̧m̧an n̄an jerbal ippān doon. Būreejtōnji ko rej ekōnono kōn m̧akūtkūt ko ippān bisop eo (lale 8.2.1.3).