O Lo’u Valaauga o se Fesoasoani i le Au Peresitene o le Korama a Toeaina
Tiutetauave
E faafetai le Alii mo lou naunauta’i e auauna atu i Lana Ekalesia. O loo i lalo se vaaiga aoao o tiutetauave mo lou valaauga.
Faamoemoega o le Korama a Toeaina
O le Perisitua Mekisateko e fesoasoani i fanau a le Atua e sauniuni e toe foi atu i Lona afio’aga. O sui auai o le korama a toeaina e galulue faatasi e fesoasoani ia faataunuuina le galuega a le Atua mo le faaolataga ma le faaeaga. Latou te auauna atu i isi, faataunuu tiute o le perisitua, fausia le lotogatasi, ma aoao ma ola i aoaoga faavae (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 8.1).
Fesoasoani
E lagolagoina e fesoasoani o le korama a toeaina le peresitene i ona tiutetauave e faatulaga taumafaiga faatasi ma le au peresitene o le Aualofa ma vaavaaia le auaunaga, gaoioiga, lipoti, faamaumauga, ma mea tautupe. E mafai ona tofia fesoasoani mai le korama a toeaina ma le Aualofa e taitaia le galuega faafaifeautalai a le uarota po o taumafaiga o le malumalu ma talafaasolopito o aiga (tagai i le 8.3.3.2).
Au Peresitene
E fono e le aunoa le au peresitene o le korama a toeaina ma le failautusi. O le fesoasoani i toeaina faaolioli e sauniuni mo le mauaina o le Perisitua Mekisateko, o se tasi lea o faamuamua aupito maualuga a le au peresitene o le korama (tagai i le 8.4).
Korama a Toeaina ma le Aualofa
O au peresitene o le Aualofa ma le korama a toeaina e faamaopoopoina tofitofiga o auaunaga ma fesoasoani e taitai galuega ma taumafaiga o malumalu ma talafaasolopito o aiga e valaaulia tagata uma ia maua faamanuiaga o le talalelei. O loo i ai foi sa latou matafaioi autu i le aoaoina o tagata o le uarota i mataupu faavae o le auauna atu ia i latou e manaomia le fesoasoani, ola i le tulafono o le anapogi, fausiaina o le ola tutoatasi, ma faateleina le saunia faaletagata lava ia ma faaleaiga (tagai i le 22.6.2).
O Sauniga i Aso Sa
E potopoto aualofa i Aso Sa lona lua ma lona fa faatasi ai ma se faamoemoega e faateleina le faatuatua ia Iesu Keriso, fausia le lotogatasi, ma faamalolosia aiga ma auaiga. E filifili ma le agaga tatalo e le au peresitene o le korama a toeaina ia savali mai le konafesi aoao aupito lata mai e talanoaina e tusa ai ma manaoga o tagata o le ekalesia (tagai i le 8.2.1.2).
Auaunaga ma Gaoioiga
E mafai e au peresitene o korama a toeaina ona fuafuaina ni gaoioiga e faamalosia ai tagata o le korama ma tuuina atu ia i latou avanoa e auauna faatasi ai. E talanoaina e au peresitene ia gaoioiga faatasi ma le epikopo (tagai i le 8.2.1.3).