Ol Responsabiliti

Lod i tangkyu from tingting blong yu blong wantem givim seves insaed long Jos blong Hem. Andanit ia i wan sot lukluk long ol responsabiliti blong koling blong yu.

Stamba Tingting blong Praemeri

Praemeri i helpem ol pikinini blong filim lav blong Papa blong olgeta long Heven; blong lanem abaot plan blong Hem blong stap glad; blong laef folem gospel blong Jisas Kraes; mo blong filim, luksave, mo mekem folem paoa blong Tabu Spirit. Praemeri i wan taem tu blong redi from, mekem, mo kipim ol tabu kavenan taem ol pikinini oli stap tekpat long wok blong God blong fasin blong sevem man mo blong kam olsem wan god. (Luk long Jeneral Hanbuk : Stap Givim Seves Insaed long Jos Ia blong Jisas Kraes blong Lata-dei Sent, 12.1.)

Ol Kaonsela

Praemeri Presidensi i helpem ol papa mo mama blong help mekem rere ol pikinini blong kam insaed mo progres folem kavenan rod ia. Hemia i wan long ol moa impoten responsabiliti blong olgeta. Presidensi i lukluk long ol miting blong Praemeri, stap givhan long wanwan pikinini, ol tija mo lida, mo ol administretiv nid blong Praemeri. (Luk long 12.3.2.)

Ol Klas mo Singsing Taem

Hem i wan tabu spesel janis blong stap tijim ol pikinini. Ol lida blong Praemeri oli lavem mo tijim ol pikinini long wei blong Sevya. Oli oganaesem ol klas blong Praemeri folem yia mo namba blong ol tija we oli stap (luk long 12.1.3). Singsing taem i helpem ol pikinini blong oli filim lav blong Papa long Heven mo oli lanem abaot plan blong Hem blong stap glad (luk long 12.1.4).

Ol Miting mo Ol Kaonsel

Presiden mo ol kaonsela blong hem oli gat miting evri taem. Oli gat ol miting tu wetem bisop mo kaonsela we i lukaot long Praemeri. (Luk long 12.3.2.)

Ol Tija mo Ol Lida

Blong stap tijim ol pikinini blong God hem i wan tabu spesel janis. Praemeri presidensi i givim sapot long ol tija mo lida blong Praemeri long taem blong ol klas, neseri, mo singsing taem (luk long 12.3.5). Praemeri presidensi i givim ol nem long bisoprik blong ol man mo ol woman we bae oli givim seves long Praemeri mo ol neseri koling.

Ol Praemeri Aktiviti

Ol Praemeri aktiviti lida oli mekem plan blong holem ol aktiviti we oli help blong mekem wok ia blong fasin blong sevem man mo hemia blong oli kam olsem wan god, i hapen. Ol seves mo ol aktiviti ia, oli mas bildimap ol testemoni, mekem ol famli oli kam strong moa, mo i givim ol janis blong blesem ol narawan. Plante taem oli stap mekem ol praemeri aktiviti tu taem long wan manis blong ol pikinini we oli gat 8–11 yia. (Luk long 12.3.6.)

Sam Moa Gaedlaen mo Polisi

Evri adalt we oli wok wetem ol pikinini mo yut oli mas finisim proteksen trening blong ol pikinini mo ol yut, hemia bifo wan manis i pas afta we oli sastenem olgeta (ProtectingChildren.ChurchofJesusChrist.org). Yu save faenem ol gaedlaen mo ol polisi blong ol pikinini wetem ol spesel nid, ol samting we i nidim blong stap sef, program blong Ol Pikinini mo Ol Yut, mo ol nara samting, long seksen 12.5 blong Jeneral Hanbuk.