Dagiti Pagrebbengan

Agyamyaman ti Apo iti kinatallugodmo nga agserbi iti Simbaanna. Adda iti baba ti pakabuklan dagiti pagrebbengan para iti calling-mo.

Panggep ti Primary

Tulongan ti Primary dagiti ubbing a makarikna iti ayat ti Nailangitan nga Amada; makasursuro maipapan iti planona iti kinaragsak; agbiag iti ebanghelio ni Jesucristo; ken mangrikna, mangbigbig, ken agtignaay iti impluensia ti Espiritu Santo. Ti Primary ket panawen pay ti panagsagana, panagaramid, ken panagtungpal kadagiti sagrado a katulagan bayat ti pannakipaset dagiti ubbing iti aramid ti Dios iti pannakaisalakan ken pannakaitan-ok. (Kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 12.1.)

Dagiti Mamagbaga

Tulongan ti panguluen ti Primary dagiti nagannak a mangisagana kadagiti ubbing a sumrek ken dumur-as iti dana ti katulagan. Daytoy ti maysa a kapatgan a pagrebbenganda. Ti panguluen ti mangimaton kadagiti miting ti Primary, agminister iti tunggal maysa kadagiti ubbing, mannursuro ken lider, ken dagiti administratibo a kasapulan ti Primary. (Kitaen iti 12.3.2.)

Dagiti Klase ken Oras ti Panagkanta

Maysa a sagrado a pribilehio ti mangisuro kadagiti ubbing. Ayaten ken suruan dagiti lider ti Primary dagiti ubbing iti wagas ti Mangisalakan. Mabukel dagiti klase ti Primary babaen iti edad ken ti bilang dagiti mannursuro nga adda a magun-od (kitaen iti 12.1.3). Ti oras ti panagkanta ti mangtulong kadagiti ubbing a mangrikna iti ayat ti Nailangitan nga Ama ken mangsursuro maipapan iti planona iti kinaragsak (kitaen iti 12.1.4).

Dagiti Miting ken Konseho

Regular nga agmiting ti presidente ken dagiti mamagbagana. Addaanda pay kadagiti miting iti bishop wenno ti nadutokan a mamagbagana. (Kitaen iti 12.3.2.)

Dagiti Mannursuro ken Lider

Maysa a sagrado a pribilehio ti panangisuro kadagiti annak ti Dios. Ti panguluen ti Primary ti mangipaay iti suporta kadagiti mannursuro ken lider ti Primary kabayatan dagiti klase, nursery, ken oras ti panagkanta (kitaen iti 12.3.5). Irekomenda ti panguluen ti Primary iti bishopric dagiti lallaki ken babbai nga agserbi kadagiti calling iti Primary ken nursery.

Dagiti Aktibidad iti Primary

Dagiti lider ti aktibidad iti Primary ti agplano kadagiti makaay-ayo ken makaawis nga aktibidad a makatulong a mangipatungpal ti aramid ti Dios iti pannakaisalakan ken pannakaitan-ok. Nasken a ti serbisio ken dagiti aktibidad ket mangpatibker kadagiti pammaneknek, mangpapigsa kadagiti pamilia, ken mangipaay kadagiti gundaway a mangbendision kadagiti dadduma. Gagangay a maangay dagiti aktibidad iti Primary iti mamindua a daras iti binulan para kadagiti ubbing nga agtawen iti 8–11. (Kitaen iti 12.3.6.)

Dagiti Pangiwanwan ken Annuroten

Amin a nataengan a makipagtrabaho kadagiti agtutubo ket nasken a leppasenda ti training iti Panangsaluad kadagiti Ubbing ken Agtutubo iti uneg ti makabulan a pannakakanunongda (ProtectingChildren.ChurchofJesusChrist.org). Dagiti pangiwanwan ken annuroten maipanggep kadagiti ubbing nga addaan iti pagkurangan, kasapulan iti panangtalged, ti programa dagiti Ubbing ken Agtutubo, ken dadduma pay ket masarakan iti benneg 12.5 ti Sapasap a Handbook.