Kūr eo aō āinwōt juon Rikakpilōklōk ilo Būreejtōnji eo an Būraimere

Eddo ko

Irooj ej m̧ōņōņō kōn wujlepļo̧k eo am̧ n̄an jerbal ilo Kabun̄ eo An. Ijin ilaļ ej juon kōmeļeļe ekadu in eddo ko n̄an kūr eo am̧.

Jibadbad eo an Būraimere

Būraimere ej jipan̄ ajri ro en̄jake iakwe eo an Jemeer Ilan̄; katak kōn karōk eo An ekam̧ōņōņō; mour kōn gospel eo an Jisōs Kraist; im en̄jake, kile, im ļoor im̧we eo an Jetōb Kwojarjar. Būraimere ej barāinwōt juon iien n̄an m̧aanjabpopo n̄an, kōm̧m̧an, im kōjparok bujen ko rekwojarjar ilo an ajri ro bōk koņaer ilo jerbal in lo̧mo̧o̧r eo an Anij im mour ijo eutiej tata. (Lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 12.1.)

Rikakpilōklōk ro

Būraimere Būreejtōnji eo ej jipan̄ ro jinen im jemān ajri ro kōpooj ajri ro n̄an deļo̧n̄ im wōnm̧aanļo̧k ilo iaļan bujen eo. En̄in ej juon iaan eddo ko aer raorōk tata. Būreejtōnji eo ej bōk eddo in kweilo̧k ko an Būraimere, jerbal in karejar n̄an kajjojo ajri ro, rūkaki ro im ritōl ro, im aikuj ko an Būraimere. (Lale 12.3.2.)

Kūlaaj ko im Iien Al eo

Ej juon jeraam̧m̧an ekwojarjar n̄an katakin ajri ro. Ritōl ro an Būraimere rej iakwe im katakin ajri ro ilo wāween eo an Rilo̧mo̧o̧r. Kūlaaj ko an Būraimere eo rej jutak kōn iiō im oran rūkaki ro rej rūkaki (lale 12.1.3). Iien al eo ej jipan̄ ajri ro en̄jake iakwe eo an Jemādwōj Ilan̄ im katak kōn karōk in m̧ōņōņō eo An (lale 12.1.4).

Kweilo̧k ko im Ko̧o̧njeļ ko

Būreejtōn eo im rikakpilōklōk ro an rej kweilo̧k aolep iien. Ebar āinwōt wōr aer kweilo̧k ko ippān bisop eo ak rikakpilōklōk eo an me em̧ōj kapeik er. (Lale 12.3.2.)

Rūkaki ro im Ritōl ro

Katakin ajri ro nejin Anij ej juon jeraam̧m̧an ekwojarjar. Būreejtōnji eo an Būraimere ej rie rūkaki ro an im ritōl ro an Būraimere ilo iien kūlaaj ko, nursery, im iien al eo (lale 12.3.5). Būraimere būreejtōnji eo ej elmakoteļo̧k n̄an bisoprik eo em̧m̧aan ro im kōrā ro n̄an jerbal āinwōt rūkaki ro an Būraimere im ritōl ro an nursery.

M̧akūtkūt ko an Būraimere

Ritōl ro an m̧akūtkūt ko an Būraimere rej karōk m̧akūtkūt ko rekalimomo im rej kobaik aolep me ej jipan̄ kōtōprak jerbal in lo̧mo̧o̧r eo an Anij im mour ijo eutiej tata. Jerbal in jipan̄ ko im m̧akūtkūt ko rej aikuj in kalōk naan in kam̧ool ko, kōkajoorļo̧k baam̧le ko, im leļo̧k iien ko rem̧m̧an n̄an kōjeraam̧m̧an ro jet. M̧akūtkūt ko an Būraimere ekkā aer kōm̧m̧an ruo alen ilo juon allōn̄ n̄an ajri ro dettāer 8–11. (Lale 12.3.6.)

Unin Tōl im Kakien ko jet

Aolep rūtto ro rej jerbal ippān ajri ro im jodikdik ro rej aikuj kadedeļo̧k kaminene eo an Kōjparok Ajri ro im Jodikdik ro ilowaan wōt juon allōn̄ jān ke raar rejtake (ProtectingChildren.ChurchofJesusChrist.org Unin tōl ko im kakien ko ikkijen ajri ro ewōr aer utam̧we ko rein juon, men ko aikuji kōn kōjparok (safety requirement), būrookraam̧ eo an Ajri ro im Jodikdik ro, im ko jet loi ilo jekjōn 12.5 an Bok in Bōk Meļeļe Eļap.