Ol Responsabiliti

Lod i tangkyu from tingting blong yu blong wantem givim seves insaed long Jos blong Hem. Andanit ia i gat wan sot lukluk long ol responsabiliti blong koling blong yu

Stamba Tingting blong Rilif Sosaeti

Rilif Sosaeti i wan tabu oganaesesen we oli stanemap blong evri adalt woman insaed long Jos. Rilif Sosaeti i helpem ol pikinini blong God blong rere blong gobak stap wetem Hem, long ples blong Hem. Profet Josef Smit i bin tijim se stamba tingting blong Rilif Sosaeti hem i blong “sevem ol sol mo help long taem blong safaring.(luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 9.1).

Ol Kaonsela

Presiden mo ol kaonsela blong hem oli lukaotem ol givhan sista, instraksen blong Sandei, mo ol aktiviti. Oli tijim ol sista abaot ol kavenan responsabiliti blong olgeta, rere long ol yang woman blong tekpat long Rilif Sosaeti, mo traehad blong mekem ol yang adalt sista oli kam strong moa. (Luk long 9.4). Rilif Sosaeti Presidensi mo sekretari oli mit oltaem (luk long 9.3.2.3).

Lidasip mo Ol Kaonsel

Ol lida blong Rilif Sosaeti, oli mekem plan blong holem ol Sandei miting, ol aktiviti, ol givhan wok, seves, mo ol nara wok ia blong givim long ol woman eksperiens ia long wok blong God blong fasin blong sevem man mo fasin blong kam olsem wan god. Ol memba blong Rilif Sosaeti mo kworom blong ol elda, oli joen wan blong mekem wok ia i hapen.(luk long 9.2).

Rilif Sosaeti mo Kworom blong Ol Elda

Presidensi blong Rilif Sosaeti mo Kworom blong Ol Elda oli wok wetem ol asaenmen blong wok blong givhan mo help blong lid long tempol mo famli histri wok mo traehad blong invaetem evriwan blong kasem ol blesing blong gospel. Oli gat wan ki rol blong tijim ol memba blong wod ol prinsipol blong givhan long olgeta we oli stap long nid, stap laef folem loa blong livim kakae, stap bildim wan Indipenden laef, mo kam antap blong wan i stap rere long hemwan, mo mekem famli i rere (luk long 22.6.2).

Ol Sandei Miting

Ol Rilif Sosaeti oli mit long nambatu mo nambafo Sandei wetem stamba tingting ia blong mekem fet long Jisas Kraes i kam moa strong, bildim yuniti, mekem ol famli mo hom i kam moa strong. Ol miting i stat wetem wan prea mo hemia i tekem tu taem blong kaonsel tugeta mo gospel instraksen mo storian raon long ol toktok blong jeneral konfrens we i jes pas (luk long 9.2.1.2).

Seves mo Ol Aktiviti

Ol Rilif Sosaeti Presidensi oli mekem ol plan blong ol aktiviti blong mekem fet blong ol sista long Jisas Kraes i kam moa strong, mekem tingting blong olgeta i strong blong oli wantem blong mekem mo kipim ol kavenan, mo givim ol janis blong oli save givim seves tugeta. Presiden nao i lukluk long ol aktiviti ia mo i save askem wan narafala sista blong i tekem lid blong mekem plan long aktiviti o mekem oli hapen (luk long 9.2.1.3).

Ol Gaedlaen mo Ol Polisi

Sam moa long ol gaedlaen mo ol polisi oli faenem insaed long seksen 9.6 blong Jeneral Hanbuk.