O Lo’u Valaauga o se Fesoasoani i le Au Peresitene o le Aualofa
O Tiutetauave
E faafetai le Alii mo lou naunau e auauna atu i Lana Ekalesia. O loo i lalo se vaaiga aoao o tiutetauave mo lou valaauga.
Faamoemoega o le Aualofa
O le Aualofa o se faalapotopotoga na faatuina faalelagi mo tamaitai matutua uma i le Ekalesia. O le Aualofa e fesoasoani i fanau a le Atua e sauniuni ai e toe foi atu i Lona afioaga. Na aoao mai le Perofeta o Iosefa Samita e faapea o le faamoemoega o le Aualofa o le “laveai o agaga ma faamama i mafatiaga”—tuuina atu o le mapusaga o le Faaola (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 9.1).
O Fesoasoani
O le Peresitene ma ona fesoasoani e vaavaaia tuafafine o auaunaga, aoaoga i Aso Sa, ma gaoioiga. Latou te aoaoina atu tuafafine i o latou tiutetauave mo feagaiga, saunia tamaitai talavou e auai i le Aualofa, ma faamaopoopo taumafaiga a le Aualofa e faamalolosia tuafafine talavou matutua (tagai i le 9.4). E fono e le aunoa le au peresitene o le Aualofa ma le failautusi (tagai i le 9.3.2.3).
Taitaiga ma Aufono
E fuafua e taitai o le Aualofa ia sauniga o le Aso Sa, gaoioiga, auaunaga, galuega fesoasoani, ma isi fegalegaleaiga e tuuina atu ai i tamaitai ni aafiaga i le galuega a le Atua mo le faaolataga ma le faaeaga. E galulue faatasi sui auai o le Aualofa ma le korama a toeaina i le lotogatasi (tagai i le 9.2).
Aualofa ma le Korama a Toeaina
O au peresitene o le Aualofa ma le korama a toeaina e faamaopoopoina tofitofiga o auaunaga ma fesoasoani e taitai galuega ma taumafaiga o malumalu ma talafaasolopito o aiga e valaaulia tagata uma ia maua faamanuiaga o le talalelei. O loo i ai foi sa latou matafaioi autu i le aoaoina o tagata o le uarota i mataupu faavae o le auauna atu ia i latou e manaomia le fesoasoani, ola i le tulafono o le anapogi, fausiaina o le ola tutoatasi, ma faateleina le saunia faaletagata lava ia ma faaleaiga (tagai i le 22.6.2).
O Sauniga i Aso Sa
E potopoto aualofa i Aso Sa lona lua ma lona fa faatasi ai ma se faamoemoega e faateleina le faatuatua ia Iesu Keriso, fausia le lotogatasi, ma faamalolosia aiga ma auaiga. O sauniga e amata i le tatalo ma ia aofia ai le taimi mo le fefautuaai faatasi ma aoaoga anoa ma talanoaga o le talalelei e faavae i lauga o konafesi aoao lata mai nei (tagai i le 9.2.1.2).
Auaunaga ma Gaoioiga
E mafai e au peresitene o Aualofa ona fuafuaina gaoioiga e faamalolosia ai faatuatua o tuafafine ia Iesu Keriso, faateleina lo latou naunau e osia ma tausia feagaiga, ma tuu atu ia i latou avanoa e auauna faatasi ai. O le peresitene e vaavaaia nei gaoioiga ma e mafai ona fesili o ia i se fesoasoani po o se isi tuafafine e taitai i le fuafuaina ma le faafoeina o na gaoioiga (tagai i le 9.2.1.3).
Taiala ma Aiaiga Faavae
O loo maua taiala ma aiaiga faavae faaopoopo i le vaega 9.6 o le Tusitaulima Aoao.