Ko Hoku Uiuiʻi ko ha Tokoni ʻi he Kau Palesitenisī ʻo e Fineʻofá

Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.

Taumuʻa ʻo e Fineʻofá

Ko e Fineʻofá ko ha faʻunga fakalangi kuo fokotuʻu maʻá e kakai fefine lalahi kotoa ʻi he Siasí. ʻOku tokoni ʻa e Fineʻofá ke teuteu ʻa e fānau ʻa e ʻOtuá ke nau foki ki Hono ʻaó. Naʻe akoʻi ʻe he Palōfita ko Siosefa Sāmitá ko e taumuʻa ʻo e Fineʻofá ke “fakahaofi ʻa e ngaahi laumālié mo fakafiemālieʻi ʻa e faingataʻaʻiá”—ʻo ʻomi ʻa e tokoni ʻa e Fakamoʻuí (vakai Tohi Tuʻutuʻuni Fakakātoá: Ko e Ngāue ʻ i Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 9.1).

Ongo Tokoní

ʻOku tokangaʻi ʻe he palesitení mo hono ongo tokoní ʻa e kau fafine ngāue fakaetauhí, fakahinohino ʻi he Sāpaté, pea mo e ngaahi ʻekitivitií. Te nau akoʻi ʻa e houʻeiki fafiné ʻi honau ngaahi fatongia ʻo e fuakavá, teuteuʻi ʻa e kau finemuí ke nau kau ʻi he Fineʻofá, mo fakafekauʻaki ʻa e ngaahi ngāue ki hono fakamālohia ʻo e kau fafine lalahi kei talavoú (vakai ki he 9.4). ʻE fakataha maʻu pē ʻa e kau palesitenisī ʻo e Fineʻofá pea mo e sekelitalí. (vakai 9.3.2.3).

Tuʻunga Fakatakimuʻá mo e Ngaahi Fakataha Alēleá

ʻE palani ʻe he kau taki ʻo e Fineʻofá ʻa e ngaahi fakataha ʻo e Sāpaté, ngaahi ʻekitivitií, ngāue fakaetauhí, ngāue tokoní, pea mo ha toe ngaahi fengāueʻaki pē ke tokoniʻi ʻa e houʻeiki fafiné ke nau kau ʻi he ngāue ʻa e ʻOtuá ki he fakamoʻuí mo e hakeakiʻí. ʻE ngāue ʻa e kau mēmipa ʻo e Fineʻofá mo e kōlomu ʻo e kaumātuʻá ʻi he uouangataha (vakai 9.2).

Fineʻofá mo e Kōlomu Kaumātuʻá

ʻOku fakafekauʻaki ʻe he kau palesitenisī ʻo e Fineʻofá mo e kōlomu ʻo e kaumātuʻá ʻa e ngaahi ngāue fakaetauhí mo tokoni ke tataki e ngāue fakatemipalé mo e hisitōlia fakafāmilí pea mo e ngaahi ngāue ke fakaafeʻi e taha kotoa ke maʻu e ngaahi tāpuaki ʻo e ongoongoleleí. ʻOku ʻi ai foki honau fatongia mahuʻinga ʻi hono akoʻi ʻo e kāingalotu ʻo e uōtí ki he ngaahi tefitoʻi moʻoni ʻo e ngāue fakaetauhi kiate kinautolu ʻoku faingataʻaʻiá, moʻui ʻaki e fono ʻo e ʻaukaí, langa hake ʻa e moʻui fakafalala pē kiate kitá, pea mo hono fakatupulaki ʻo e mateuteu fakatāutaha mo fakafāmilí (vakai 22.6.2).

Ngaahi Fakataha ʻi he Sāpaté

ʻOku fakataha e Fineʻofá he Sāpate uá mo e faá mo ha taumuʻa ke fakatupulaki e tui kia Sīsū Kalaisí, langaki e uouangatahá, mo fakamālohia e ngaahi fāmilí mo e ʻapí. ʻOku kamata e ngaahi fakatahá ʻaki ha lotu pea fakakau ai ha taimi ki he fealēleaʻaki fakatahá mo hono akoʻi mo aleaʻi ʻo e ongoongoleleí ʻo makatuʻunga ʻi he ngaahi lea konifelenisi lahi fakamuimuitahá (vakai 9.2.1.2).

Ngāue Tokoní mo e Ngaahi ʻEkitivitií

ʻE lava ke palani ʻe he kau palesitenisī ʻo e Fineʻofá ha ngaahi ʻekitivitī ke fakamālohia ai ʻa e tui ʻa e houʻeiki fafiné kia Sīsū Kalaisí, fakatupulaki ʻenau holi ke fakahoko mo tauhi ʻa e ngaahi fuakavá, mo ʻoange ha ngaahi faingamālie ke nau ngāue fakataha ai. ʻE tokangaʻi ʻe he palesitení ʻa e ngaahi ʻekitivitií pea te ne lava ke kole ki ha tokoni pe ki ha fefine kehe ke ne taki ʻi hono palaniʻi mo fakahoko kinautolú (vakai 9.2.1.3).

Ngaahi Fakahinohino mo e Ngaahi Tuʻutuʻuni

ʻOku maʻu ha toe ngaahi fakahinohino mo ha ngaahi tuʻutuʻuni ʻi he konga 9.6 ʻo e Tohi Tuʻutuʻuni Fakakātoá.