Ti Calling-ko a kas Mamagbaga iti Panguluen ti Primary iti Stake
Dagiti Pagrebbengan
Agyamyaman ti Apo iti kinatallugodmo nga agserbi iti Simbaanna. Adda iti baba ti pakagupgopan dagiti pagrebbengan para iti calling-mo.
Panggep ti Primary
Tulongan ti Primary dagiti ubbing a makarikna iti ayat ti Nailangitan nga Amada; makasursuro maipapan iti planona iti kinaragsak; agbiag iti ebanghelio ni Jesucristo; ken mangrikna, mangbigbig, ken agtignay iti impluensia ti Espiritu Santo. Ti Primary ket panawen pay ti panagsagana, panagaramid, ken panagtungpal kadagiti sagrado a katulagan bayat ti pannakiraman dagiti ubbing iti aramid ti Dios iti pannakaisalakan ken pannakaitan-ok. (Kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 12.1.)
Mamagbaga iti Primary iti Stake
Dagiti mamagbaga iti Primary iti stake ket agserbida iti panguluen ti Primary iti stake. Addaan dagiti miembro ti panguluen iti adu a pagrebbengan a pakairamanan ti panangtulong iti panguluen iti stake, panagserbi iti konseho ti stake (presidente laeng), panang-orient kadagiti kabarbaro a naawagan a panguluen iti Primary iti ward, mangipaay iti agtultuloy a suporta ken instruksion, ken panangsarungkar kadagiti klase iti ward iti stake. No maawisda, mabalinda ti dumar-ay kadagiti miting ti panagtututunos ti konseho ken agsarita kadagiti miting ti sakramento ken dadduma pay a kasasaad (kitaen iti 6.7.1).
Dagiti Miting ken Konseho
Nasken a regular nga agiinnuman ti panguluen ti Primary iti stake. Mabalinda a maawis nga agserbi kadagiti nayon a konseho. (Kitaen iti 6.7.1.1.)
Dagiti Aktibidad iti Primary
Mabalin ti panguluen ti Primary iti stake a sagpaminsan nga agplano kadagiti aktibidad iti stake para kadagiti ubbing nga agtawen iti 8 agingga iti 11. Mabalin a dagitoy nga aktibidad ket para kadagiti ubbing a babbai, lallaki, wenno agpada (kitaen iti 6.7.1.3).
Dagiti Pangiwanwan ken Annuroten
Amin a nataengan a makipagtrabaho kadagiti ubbing ken agtutubo ket nasken a leppasenda ti training iti Panangsaluad kadagiti Ubbing ken Agtutubo iti uneg ti makabulan a pannakakanunongda (ProtectingChildren.ChurchofJesusChrist.org). Dagiti pangiwanwan ken annuroten maipanggep kadagiti ubbing nga addaan iti naisangsangayan a pagkurangan, kasapulan iti panagtalged, ti programa dagiti Ubbing ken Agtutubo, ken dadduma pay ket masarakan iti benneg 12.5 ti Sapasap a Handbook.