Ko Hoku Uiuiʻi ko ha Tokoni ʻi he Kau Palesitenisī ʻo e Palaimelí ʻi he Siteikí

Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ʻi ho uiuiʻí.

Taumuʻa ʻo e Palaimelí

ʻOku tokoni ʻa e Palaimelí ke ongoʻi ʻe he fānaú ʻa e ʻofa ʻa ʻenau Tamai Hēvaní; ako fekauʻaki mo ʻEne palani ʻo e fiefiá; moʻui ʻaki ʻa e ongoongolelei ʻo Sīsū Kalaisí; pea ongoʻi, ʻiloʻi, mo ngāue ʻo fakatatau mo e ivi tākiekina ʻo e Laumālie Māʻoniʻoní. Ko e Palaimelí ko ha taimi foki ia ke mateuteu, fakahoko, mo tauhi ai ʻa e ngaahi fuakava toputapú ʻi he kau ʻa e fānaú ʻi he ngāue ʻa e ʻOtuá ki he fakamoʻuí mo e hakeakiʻí. (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 12.1.)

Tokoni Palesiteni Palaimeli ʻi he Siteikí

ʻE ngāue ʻa e ongo tokoni ʻi he Palaimeli ʻa e siteikí ʻi he kau palesitenisī Palaimeli ʻo e siteikí. ʻOku lahi ha ngaahi fatongia ʻo e kau mēmipa ʻo e kau palesitenisií ʻa ia ʻoku kau ai hono tokoniʻi e kau palesitenisī fakasiteikí, tokoni ʻi he fakataha alēlea fakasiteikí (palesitení pē), fakataukeiʻi e kau palesitenisī Palaimeli ʻo e uōtí ne uiuiʻi foʻoú, fai maʻu pē ha poupou mo ha fakahinohino, mo ʻaʻahi ki he ngaahi kalasi fakauooti ʻi he siteikí. ʻI hano fakaafeʻi, te nau lava ʻo kau atu ki he ngaahi fakataha alēlea fakafekauʻakí mo lea ʻi he ngaahi houalotu sākalamēnití mo ha ngaahi feituʻu kehe (vakai, 6.7.1).

Ngaahi Fakatahá mo e Fakataha Alēleá

ʻOku totonu ke fealēleaʻaki fakataha maʻu pē ʻa e kau palesitenisī Palaimeli ʻi he siteikí. ʻE lava ke fakaafeʻi kinautolu ke nau kau ki ha ngaahi fakataha alēlea kehe. (Vakai, 6.7.1.1.)

Ngaahi ʻEkitivitī ʻa e Palaimelí

ʻE lava ke palani ʻe he kau palesitenisī Palaimeli ʻi he siteikí ha ngaahi ʻekitivitī maʻá e fānau taʻu 8 ki he 11. ʻE lava ke fakahoko ʻa e ngaahi ʻekitivitī ko ʻení ʻe he fānau fefiné, fānau tangatá, pe fakatouʻosi (vakai, 6.7.1.3).

Ngaahi Fakahinohinó mo e Ngaahi Tuʻutuʻuní

Kuo pau ke fakakakato ʻe he kakai lalahi kotoa pē ʻoku ngāue mo e fānaú mo e toʻu tupú ʻa e ako ki hono Maluʻi ʻo e Fānaú mo e Toʻu Tupú ʻi loto ʻi he māhina ʻe taha hono hikinimaʻi kinautolú (ProtectingChildren.ChurchofJesusChrist.org). ʻOku maʻu ʻa e ngaahi fakahinohino mo e ngaahi tuʻutuʻuni fekauʻaki mo e fānau ʻoku ʻi ai ʻenau ngaahi fiemaʻu makehé, ngaahi fiemaʻu ki he malú, polokalama ʻa e Fānaú mo e Toʻu Tupú, mo e niʻihi kehé ʻi he vahe 12.5 ʻo e Tohi Tuʻutuʻuni Fakakātoá.