Lin b’oqb’al jo’ aj tenq’ aj k’ehol na’leb’ sa’ li awa’b’ejil re li Komonil re Tenq’ank sa’ li oqech

Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

Li rajom li Komonil re Tenq’ank

Li Komonil re Tenq’ank a’an jun ch’uut k’uub’anb’il sa’ choxahilal choq’ reheb’ chixjunileb’ li ixq sa’ li Iglees. Li Komonil re Tenq’ank naxtenq’aheb’ li ralal xk’ajol li Dios chixkawresinkil rib’ re sutq’iik rik’in a’an. Li profeet aj Jose Smith kixk’ut naq li rajom li Komonil re Tenq’ank a’an re “xkolb’aleb’ li aamej ut xk’osb’al li rahilal”—xk’eeb’al li tenq’ li naxk’e li Kolonel (chi’ilmanq K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 9.1).

Laj tenq’ aj k’ehol na’leb’ sa’ li awa’b’ejil re li Komonil re Tenq’ank sa’ li oqech

Wan naab’al li k’anjel teneb’anb’il sa’ xb’een li awa’b’ejil re li Komonil re Tenq’ank sa’ li oqech, jo’ xk’eeb’al xtzolb’aleb’ li ak’ awa’b’ejil re li Komonil re Tenq’ank ut xtenq’ankileb’ ut xk’eeb’aleb’ xna’leb’; xk’utb’al chiruheb’ li awa’b’ej re li Komonil re Tenq’ank sa’ li teep li na’leb’ chirix li ilok komon, li resilal li junkab’al, ut li k’anjel re xjultikankil li evangelio (chi’ilmanq 9.5); xkawob’resinkileb’ li ixq moko sumsuukeb’ ta; xb’eresinkil li nab’aanuman naq wan li ch’a’ajkilal; aatinak sa’ li ch’utam re li loq’laj wa’ak ut xkomoneb’ chik li ch’utam; ut rula’aninkileb’ lix ch’utameb’ li Komonil re Tenq’ank sa’ li teep (chi’ilmanq 6.7.1).

Eb’ li ch’utam ut eb’ li jolomil ch’uut

Li awa’b’ejil re li Komonil re Tenq’ank sa’ li oqech tento te’xk’uub’ xna’leb’ chi kok’ aj xsa’. Jun komon re li awa’b’ejil nak’anjelak sa’ li ch’uut reheb’ li saaj li maji neke’sumla ut sa’ li ch’uut reheb’ li ninq moko sumsuukeb’ ta sa’ li oqech, wi wankeb’. Li awa’b’ejil nawulak sa’ li ch’utam reheb’ laj jolominel re oqech rajlal chihab’ ut naxk’e xna’leb’eb’ li awa’b’ejil re li Komonil re Tenq’ank sa’eb’ li ch’utam a’an (chi’ilmanq 29.3.4), nak’anjelak sa’eb’ li jolomil ch’uut reheb’ laj jolominel sa’ li oqech (ka’ajwi’ li awa’b’ej), ut nawulak sa’eb’ li jolomil ch’utam naq b’oqb’il xb’aan li Setenta re Area (chi’ilmanq 29.4).

Li k’anjelak chiru as iitz’inb’ej ut eb’ li kok’ k’anjel

Li awa’b’ejil re li Komonil re Tenq’ank sa’ li oqech naru naxk’uub’ jun malaj wiib’ ch’utam rajlal chihab’ choq’ reheb’ chixjunileb’ li ixq sa’ li Komonil re Tenq’ank sa’ li oqech. Sa’eb’ li ch’utam naru neke’k’anjelak chiru as iitz’inb’ej, neke’tzolok, neke’xb’aanu kok’ k’anjel, neke’rab’i laj aatinanel, malaj neke’xtzol junaq seeb’al (chi’ilmanq 6.7.1.1). Eb’ li awa’b’ejil re li Komonil re Tenq’ank, li Saaj Ixq, ut li Tzoleb’aal reheb’ li Kok’al sa’ li oqech naru neke’xk’uub’ li kok’ k’anjel te’xb’aanu sa’ komonil (chi’ilmanq 6.7.1).

Li b’eresink ut li chaq’rab’ink

Naru natawman xkomon chik li chaq’rab’ink chirix li Dominkil Tzoleb’aal sa’ li tasal 9.6 re li Jolomil K’anjenel Hu.