Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki hoʻo uiuiʻí.

Taumuʻa ʻo e Fineʻofá

Ko e Fineʻofá ko ha faʻunga fakalangi kuo fokotuʻu maʻá e kakai fefine lalahi kotoa ʻi he Siasí. ʻOku tokoni ʻa e Fineʻofá ke teuteuʻi ʻa e fānau ʻa e ʻOtuá ke nau foki ki Hono ʻaó. Naʻe akoʻi ʻe he Palōfita ko Siosefa Sāmitá ko e taumuʻa ʻo e Fineʻofá ke “fakahaofi ʻa e ngaahi laumālié mo fakafiemālieʻi ʻa e faingataʻaʻiá”—ʻo ʻomi ʻa e tokoni ʻa e Fakamoʻuí (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 9.1).

Tokoni Palesiteni Fineʻofa ʻi he Siteikí

ʻOku lahi ʻa e ngaahi fatongia ʻo e kau mēmipa ʻo e kau palesitenisī ʻo e Fineʻofa ʻi he siteikí ʻo kau ai hono fakataukeiʻi ʻo e kau palesitenisī ʻo e Fineʻofa ʻo e uōtí naʻe toki uiuiʻi foʻoú pea hokohoko atu hono poupouʻí; akoʻi ki he kau palesiteni Fineʻofa fakauōtí ʻa e ngaahi tefitoʻi moʻoni ʻo e ngāue fakaetauhí, hisitōlia fakafāmilí, mo e ngāue fakafaifekaú (vakai, 9.5); fakamālohia ʻo e kau fafine tāutahá; fakafekauʻaki ʻa e ngaahi ngāue ki ha meʻa fakatuʻupakē; lea ʻi he ngaahi houalotu sākalamēnití mo ha ngaahi feituʻu kehe; mo e ʻaʻahi ki he ngaahi fakataha fakauooti ʻa e Fineʻofá (vakai, 6.7.1).

Ngaahi Fakatahá mo e Ngaahi Fakataha Alēleá

ʻOku totonu ke fealēleaʻaki fakataha maʻu pē ʻa e kau palesitenisī ʻo e Fineʻofa ʻi he siteikí. ʻE kau ha mēmipa ʻo e kau palesitenisií ʻi he kōmiti fakasiteiki ʻo e kau taautaha lalahi kei talavoú mo e kau taautaha lalahí, kapau ʻe fokotuʻu. ʻE kau ʻa e kau palesitenisií ki he ngaahi fakataha fakatakimuʻa fakataʻu ʻa e siteikí mo fakahinohinoʻi ʻa e kau palesitenisī fakauooti ʻo e Fineʻofá ʻi he ngaahi fakataha ko iá (vakai, 29.3.4), kau ʻi he kōmiti fakatakimuʻa ʻa e kakai lalahi ʻi he siteikí, pea kau ʻi he ngaahi fakataha alēlea fakafekauʻakí ʻi hano fakaafeʻi ʻe he Fitungofulu Fakaʻēliá (vakai, 29.4).

Ngāue Tokoní mo e Ngaahi ʻEkitivitií

ʻE lava ke palani mo fakahoko ʻe he kau palesitenisī Fineʻofa ʻi he siteikí ha fakataha ʻe taha pe ua ʻi he taʻu maʻá e kau fafine Fineʻofa kotoa pē ʻi he siteikí. ʻE lava ke kau ʻi he ngaahi fakataha ko ʻení ha ngāue tokoni, ngaahi kalasi, ngaahi konifelenisi, pe ko ha ngaahi fakataha ako (workshops) (vakai, 6.7.1.1). Ko e taimi ʻe niʻihi ʻe lava ke palani ʻe he kau palesitenisī ‘o e Fineʻofá, Kau Finemuí mo e Palaimelí ha ngaahi ʻekitivitī ʻoku fakatahaʻi ai ʻenau ngaahi houalotú (vakai, 6.7.1).

Ngaahi Fakahinohinó mo e Ngaahi Tuʻutuʻuní

ʻOku maʻu ha ngaahi fakahinohino mo ha ngaahi tuʻutuʻuni lahi ange ʻi he konga 9.6 ʻo e Tohi Tuʻutuʻuni Fakakātoá.