Akong Calling isip Magtatambag sa Kapangulohan sa Sunday School

Mga Responsibilidad

Ang Ginoo mapasalamaton sa imong kaandam nga moserbisyo sa Iyang Simbahan. Sa ubos mao ang kinatibuk-ang pagpasabot sa mga reponsibilidad sa imong calling.

Katuyoan sa Sunday School

Ang Sunday School magtabang nga matuman ang buhat sa Dios sa kaluwasan ug kahimayaan. Mahimo kini pinaagi sa pagtabang sa mga anak sa Dios nga makat-on ug mosunod sa ebanghelyo ni Jesukristo (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 13.1, Librarya sa Ebanghelyo [Gospel Library]).

Kapangulohan sa Sunday School

Ang presidente mao ang responsable sa pagserbisyo diha sa konseho sa ward, pagdumala sa pagkat-on ug pagtudlo sa ebanghelyo diha sa panimalay ug sa simbahan, ug pag-organisar sa mga klase. Ang iyang mga magtatambag moabag kaniya. Ang kapangulohan sa Sunday School mosuporta, moawhag, ug motudlo sa mga magtutudlo nga mahimong mas epektibo pinaagi sa pagsunod sa mga baroganan sa mga kasulatan ug sa Pagtudlo sumala sa Pamaagi sa Manluluwas (tan-awa sa 13.2.2.2).

Mga Klase sa Dominggo

Ang mga klase sa Sunday School ipahigayon sa una ug ikatulong mga Dominggo sa bulan. Ang gidak-on sa klase managlahi base sa mga panginahanglan sa matag ward (tan-awa sa 13.3). Ang mga magtutudlo sa Sunday School mogamit sa mga kasulatan, naka-iskedyul nga mga leksiyon sa Dali, Sunod Kanako, ug mga pulong sa modernong mga propeta isip ilang nag-unang mga kapanguhaan sa pagtudlo.

Nakasentro sa Panimalay nga Pagkat-on

Ang mga ginikanan mao ang responsable alang sa pagtudlo sa ebanghelyo ngadto sa ilang mga anak (tan-awa sa 13.5). Ang mga magtutudlo sa Sunday School ug mga lider moawhag sa mga miyembro nga magtinguha sa ilang kaugalingong inspirasyon kon unsaon sa pagtuon ug pagtudlo sa ebanghelyo sa ilang mga panimalay (tan-awa sa 17.2).

Mga Miting sa Konseho sa Magtutudlo

Ang mga magtatambag moabag sa presidente sa Sunday School sa pag-organisar ug pagpatuman sa mga miting sa konseho sa magtutudlo. Sa mga miting sa konseho sa magtutudlo, ang mga magtutudlo magtinambagay mahitungod sa mga baroganan sa Kristohanong pagtudlo. Sila usab magtinambagay kon unsaon sa pagpalambo ang pagkat-on ug pagtudlo sa ebanghelyo. Pagtudlo sumala sa Pamaagi sa Manluluwas gigamit isip usa ka kapanguhaan (tan-awa sa 17.4). Kini nga mga miting himoon matag tulo ka bulan atol sa klase sa Dominggo ug sa kasagaran pangulohan sa presidente sa Sunday School (tan-awa sa 13.4).

Mga Miting sa Konseho sa Magtutudlo alang sa mga Ginikanan

Ang mga magtatambag moabag sa presidente sa Sunday School sa pag-organisar ug pagpatuman sa mga miting sa konseho sa magtutudlo alang sa mga ginikanan. Kini nga mga miting mosunod sa sama nga han-ay isip regular nga mga miting sa konseho sa magtutudlo, apan niini nga sitwasyon ang ginikanan ang gidapit nga moapil. Ang katuyoan mao ang pagtabang sa mga ginikanan nga mahimong mas maayo nga mga magtutudlo sa ilang mga panimalay. Pagtudlo sumala sa Pamaagi sa Manluluwas gigamit isip usa ka kapanguhaan (tan-awa sa 17.4).

Mga Lagda ug mga Palisiya

Ang tanang hamtong nga naglihok uban sa kabatan-onan kinahanglang mokompleto sa pagbansay sa pagpanalipod sa kabataan ug kabatan-onan sulod sa usa ka bulan human mapaluyohi (ProtectingChildren.ChurchofJesusChrist.org). Dugang nga mga lagda sa Sunday School makita sa seksiyon 13.7 diha sa Kinatibuk-ang Tamdanan nga Basahon.