Lin b’oqb’al jo’ aj tenq’ aj k’ehol na’leb’ sa’ li awa’b’ejil re li Dominkil Tzoleb’aal
Li k’a’ru teneb’anb’il
Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.
Li rajom li Dominkil Tzoleb’aal
Li Dominkil Tzoleb’aal natenq’an chixb’aanunkil lix k’anjel li Dios re li kolb’a-ib’ ut li taqenaqil loq’al. Naxb’aanu a’in rik’in xtenq’ankileb’ li ralal xk’ajol li Dios chixtzolb’al ut chixyu’aminkil lix evangelio li Jesukristo (chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li kutan, 13.1).
Li awa’b’ejil re li Dominkil Tzoleb’aal
Teneb’anb’il sa’ xb’een li awa’b’ej naq taak’anjelaq sa’ li ch’uut re teep, naq taajolominq sa’ xb’een li xtzolb’al ut li xk’utb’al li evangelio sa’ li ochoch ut sa’ li iglees, ut naq tixk’uub’eb’ li tzoleb’aal. Wankeb’ laj tenq’ aj k’ehol na’leb’ li neke’tenq’ank re. Li awa’b’ejil re li Dominkil Tzoleb’aal naxtenq’aheb’, naxwaklesi xch’ooleb’, ut naxk’e xna’leb’eb’ laj k’utunel re naq te’chaab’ilo’q rik’in xtaaqenkileb’ li na’leb’ li neke’tawman sa’eb’ li loq’laj hu ut sa’ Li K’utuk jo’ li Kolonel (chi’ilmanq 13.2.2.2).
Eb’ li tzoleb’aal re domingo
Na’ux li tzolok sa’ li Dominkil Tzoleb’aal chiru li xb’een ut li rox domingo re li po. Jalan jalanq rajlankileb’ li komon sa’eb’ li tzoleb’aal a’ yaal li na’ajman ru sa’ li junjunq chi teep (chi’ilmanq 13.3). Eb’ laj k’utunel sa’ li Dominkil Tzoleb’aal neke’roksi xb’een wa li loq’laj hu, eb’ li raqal sa’ Kim, Taaqehin, ut li raatineb’ li profeet re li kutan a’in naq neke’k’utuk.
Li tzolok li jayalinb’il sa’ li ochoch
Eb’ li na’b’ej yuwa’b’ej tento sa’ xb’eeneb’ xk’utb’al li evangelio chiruheb’ li ralal xk’ajol (chi’ilmanq 13.5). Eb’ laj k’utunel ut laj jolominel sa’ li Dominkil Tzoleb’aal neke’xwaklesi xch’ooleb’ li komon chixsik’b’al lix musiq’anb’il na’leb’ re te’xnaw chan ru xtzolb’al ut xk’utb’al li evangelio sa’ li rochocheb’ (chi’ilmanq 17.2).
Eb’ li ch’utam reheb’ laj k’utunel
Eb’ laj tenq’ aj k’ehol na’leb’ neke’xtenq’a li awa’b’ej chixk’uub’ankileb’ ut chixb’aanunkileb’ li ch’utam reheb’ laj k’utunel. Sa’ li ch’utam reheb’ laj k’utunel, eb’ laj k’utunel neke’xk’uub’ xna’leb’ chirix li k’utuk jo’ li Kristo. Neke’xtz’il rix ajwi’ chan ru naq naru taachaab’ilob’resiiq li xtzolb’al ut li xk’utb’al li evangelio. Neke’roksi li k’anjenel hu Li K’utuk jo’ li Kolonel (chi’ilmanq 17.4). Neke’b’aanuman li ch’utam a’in jun sut rajlal oxib’ po chiru xhooril li tzolok sa’ domingo, ut a’an li awa’b’ej re li Dominkil Tzoleb’aal li nab’eresin sa’ li ch’utam (chi’ilmanq 13.4).
Eb’ li ch’utam reheb’ laj k’utunel choq’ reheb’ li yuwa’b’ej
Eb’ laj tenq’ aj k’ehol na’leb’ neke’xtenq’a li awa’b’ej chixk’uub’ankileb’ ut chixb’aanunkileb’ li ch’utam reheb’ laj k’utunel choq’ reheb’ li yuwa’b’ej. Nab’aanuman li ch’utam a’in jo’ chanru li ch’utam reheb’ laj k’utunel, a’b’an b’oqb’ileb’ ajwi’ li na’b’ej yuwa’b’ej chi tz’aqonk. Li rajom a’an xtenq’ankileb’ li na’b’ej yuwa’b’ej chi chaab’ilo’k jo’ aj k’utunel sa’ li rochocheb’. Na’oksiman Li K’utuk jo’ li Kolonel (chi’ilmanq 17.4).
Li b’eresink ut li chaq’rab’ink
Chixjunileb’ li komon ak ninqeb’ li neke’k’anjelak rik’ineb’ li saaj tento te’xb’aanu li tzolok chirix xkolb’aleb’ rix li kok’al naq maji’ jun po rokikeb’ sa’ lix b’oqb’aleb’ (ProtectingChildren.ChurchofJesusChrist.org). Naru natawman xkomon chik li chaq’rab’ink chirix li Dominkil Tzoleb’aal sa’ li tasal 13.7 re li Jolomil K’anjenel Hu.