Te mau hōpoi’a

’Ua māuruuru roa te Fatu nō tō ’oe ineine e tāvini i roto i tāna ’Ēkālesia. E ’ite mai ’oe i raro nei i te hi’ora’a rere ā manu nō te mau hōpoi’a e tū’ati i tō ’oe pi’ira’a.

Te fā o te Ha’api’ira’a Sābati

E tauturu te Ha’api’ira’a Sābati i te fa’atupura’a i te ’ohipa nō te fa’aorara’a ’e te fa’ateiteira’a a te Atua. E rave ’oia i te reira nā roto i te tauturura’a i te mau tamari’i a te Atua ’ia ha’api’i mai ’e ’ia ora i te ’evanelia a Iesu Mesia (hi’o Buka arata’i rahi : Te tāvinira’a i roto i te ’Ēkālesia a Iesu Mesia i te Feiā Mo’a i te mau Mahana Hope’a nei, 13.1, Vaira’a buka ’evanelia).

Te peresidenira’a nō te Ha’api’ira’a Sābati

E hōpoi’a nā te peresideni te tāvinira’a i roto i te ’āpo’ora’a pāroita, te hi’opo’ara’a i te ’apora’a ’e te ha’api’ira’a i te ’evanelia i te fare ’e i te fare purera’a, ’e te fa’anahora’a i te mau piha ha’api’ira’a. E tauturu tōna nā tauturu iāna. E turu, e fa’aitoito ’e e ha’api’i te peresidenira’a nō te Ha’api’ira’a Sābati i te mau ’orometua ha’api’i ’ia ’aravihi atu ā maoti te pe’era’a i te mau parau tumu i roto i te mau pāpa’ira’a mo’a ’e te Ha’api’ira’a mai tā te Fa’aora (hi’o 13.2.2.2).

Te mau piha ha’api’ira’a i te sābati

E fa’aterehia te mau piha ha’api’ira’a a te Ha’api’ira’a Sābati i te sābati mātāmua ’e te toru o te ’āva’e. Te fāito rahi o te mau piha ha’api’ira’a, mai te au ïa i te mau hina’aro o te pāroita tāta’itahi (hi’o 13.3). E fa’a’ohipa te mau ’orometua o te Ha’api’ira’a Sābati i te mau pāpa’ira’a mo’a, te mau ha’api’ira’a tei tārenahia i roto te Mai, pe’e mai, ’e te mau parau a te mau peropheta nō teie tau ’ei rāve’a tumu nō tā rātou ha’api’ira’a.

Te ’apora’a i fa’atumuhia i ni’a te ’utuāfare

E hōpoi’a nā te mau metua te ha’api’ira’a i te ’evanelia i tā rātou mau tamari’i (hi’o 13.5). E fa’aitoito te mau ’orometua ’e te feiā fa’atere o te Ha’api’ira’a Sābati i te mau melo ’ia ’imi i tō rātou iho fa’aurura’a, nō ni’a i te huru e ’imi ’e e ha’api’i i te ’evanelia i roto i tō rātou ’utuāfare (hi’o 17.2).

Te mau rurura’a ’āpo’ora’a a te mau ’orometua ha’api’i

E tauturu nā tauturu i te peresideni Ha’api’ira’a Sābati ’ia fa’anaho ’e ’ia fa’atupu i te mau rurura’a a te ’āpo’ora’a a te mau ’orometua ha’api’i. I roto i te mau rurura’a ’āpo’ora’a a te mau ’orometua ha’api’i, e tau’aparau ’āmui te mau ’orometua ha’api’i i te mau parau tumu nō te ha’api’ira’a mai te Mesia te huru. E ’aparau ato’a rātou e nāhea ’ia ha’amaita’i te ha’api’ira’a ’e te ’apora’a i te ’evanelia. E fa’a’ohipahia te Ha’api’ira’a mai tā te Fa’aora ’ei mātēria tauturu (hi’o 17.4). E fa’atupuhia teie mau rurura’a i te mau toru ’āva’e ato’a i te taime nō te mau piha ha’api’ira’a, ’e tei mātarohia, nā te peresideni nō te Ha’api’ira’a Sābati e fa’atere i te reira (hi’o 13.4).

Te mau rurura’a ’āpo’ora’a ’orometua ha’api’i nō te mau metua

E tauturu nā tauturu i te peresideni Ha’api’ira’a Sābati ’ia fa’anaho ’e ’ia fa’atupu i te mau rurura’a ’āpo’ora’a ’orometua ha’api’i nō te mau metua. E pe’e teie rurura’a i te hō’ē ā fa’anahora’a ’e te mau rurura’a tāmau a te ’āpo’ora’a a te mau ’orometua ha’api’i, i terā rā taime, e ani-manihini-hia te mau metua ’ia haere mai. Te fā, ’o te tauturura’a ïa i te mau metua ’ia riro ’ei ’orometua ha’api’i maita’i a’e i roto i tō rātou ’utuāfare. E fa’a’ohipahia te Ha’api’ira’a mai tā te Fa’aora ’ei mātēria tauturu (hi’o 17.4).

Te mau arata’ira’a ’e te mau fa’aturera’a

E ti’a i te mau ta’ata pa’ari ato’a e ha’a ’e te feiā ’āpī, ’ia fāri’i hope roa i te ha’api’ipi’ira’a nō ni’a i te pārurura’a i te mau tamari’i ’e i te feiā ’āpī, i roto hō’ē ’āva’e o tō rātou pāturura’ahia (ProtectingChildren.ChurchofJesusChrist.org). Tei roto te tahi atu ā mau arata’ira’a nō te Ha’api’ira’a Sābati i te tufa’a 13.7 o te Buka arata’i rahi.