Ngaahi Fatongiá

ʻOku houngaʻia ʻa e ʻEikí ʻi hoʻo loto fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ʻi ho uiuiʻí.

Taumuʻa ʻo e Lautohi Faka-Sāpaté

ʻOku tokoni ʻa e Lautohi Faka-Sāpaté ki hono fakahoko ʻa e ngāue ʻa e ʻOtuá ki he fakamoʻuí mo e hakeakiʻí. ʻOkú ne fakahoko ʻeni ʻaki hono tokoniʻi e fānau ʻa e ʻOtuá ke nau ako mo moʻui ʻaki e ongoongolelei ʻo Sīsū Kalaisí (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 13.1, Gospel Library).

Kau Palesitenisī ʻo e Lautohi Faka-Sāpaté

Ko e fatongia ʻo e palesitení ke kau ʻi he fakataha alēlea ʻo e uōtí, tokangaʻi hono ako mo akoʻi ʻo e ongoongoleleí ʻi ʻapi pea ʻi he lotú, pea mo hono fokotuʻutuʻu ʻo e ngaahi kalasí. ʻE tokoni kiate ia ʻa hono ongo tokoní. ʻOku poupouʻi, fakalotolahiʻi, mo fakahinohinoʻi foki ʻe he kau palesitenisī ʻo e Lautohi Faka-Sāpaté ʻa e kau faiakó ke nau hoko ʻo lelei ange ʻi heʻenau muimui ki he ngaahi tefitoʻi moʻoni ʻi he folofolá mo e Ko e Faiako ʻi he Founga ʻa e Fakamoʻuí (vakai, 13.2.2.2).

Ngaahi Kalasi ʻi he Sāpaté

ʻOku fakahoko ʻa e ngaahi kalasi Lautohi Faka-Sāpaté ʻi he Sāpate ʻuluaki mo e Sāpate tolu ʻo e māhiná. ʻE kehekehe pē ʻa e tokolahi ʻo e kalasí ʻo fakatatau mo e ngaahi fiemaʻu ʻa e uooti takitaha (vakai, 13.3). ʻOku fakaʻaongaʻi ʻe he kau faiako Lautohi Faka-Sāpaté ʻa e folofolá, ngaahi lēsoni kuo fakataimi-tēpileʻi ʻi he Haʻu, ʻo Muimui ʻIate Aú, mo e ngaahi lea ʻa e kau palōfita ʻo onopōní ko ʻenau tefitoʻi maʻuʻanga tokoni ki he faiakó.

Ako ʻOku Fakatefito ʻi ʻApí

ʻOku ʻa e ngaahi mātuʻá ʻa e fatongia ke akoʻi e ongoongoleleí ki heʻenau fānaú (vakai, 13.5). ʻE poupouʻi ʻe he kau faiako mo e kau taki ʻo e Lautohi Faka-Sāpaté ʻa e kāingalotú ke nau feinga ke maʻu haʻanau ueʻi fakalaumālie ʻanautolu pē fekauʻaki mo e founga ke nau ako mo akoʻi ai ʻa e ongoongoleleí ʻi honau ngaahi ʻapí (vakai, 17.2).

Fakataha Alēlea ʻa e Kau Faiakó

ʻE tokoni ʻa e ongo tokoní ki he palesiteni ʻo e Lautohi Faka-Sāpaté ke fokotuʻutuʻu mo fakahoko ʻa e ngaahi fakataha alēlea ʻa e kau faiakó. ʻE fealēleaʻaki fakataha ʻa e kau faiakó ʻi he ngaahi fakataha alēlea ʻa e kau faiakó, fekauʻaki mo e ngaahi tefitoʻi moʻoni ʻo e faiako hangē ko Kalaisí. Te nau toe fealēleaʻaki foki fekauʻaki mo e founga ki hono fakaleleiʻi ʻo e ako mo hono akoʻi ʻo e ongoongoleleí. ʻOku fakaʻaongaʻi ʻa e Ko e Faiako ʻi he Founga ʻa e Fakamoʻuí ko ha maʻuʻanga tokoni (vakai, 17.4). ʻOku fakahoko fakakuata ʻa e ngaahi fakataha ko ʻení ʻi he lolotonga ʻo e taimi kalasí ʻi he Sāpaté pea ʻoku faʻa tataki ia ʻe he palesiteni ʻo e Lautohi Faka-Sāpaté (vakai, 13.4).

Ngaahi Fakataha Alēlea ʻa e Kau Faiakó maʻá e Mātuʻá

ʻE tokoni ʻa e ongo tokoní ki he palesiteni ʻo e Lautohi Faka-Sāpaté ke fokotuʻutuʻu mo fakahoko ʻa e ngaahi fakataha alēlea ʻa e kau faiakó ki he mātuʻá. ʻOku muimui ʻa e fakataha ko ʻení ʻi he founga tatau mo e tuʻo lahi ʻo e fakataha alēlea ʻa e kau faiakó, ka ʻi he tuʻunga ko ʻení, ʻoku fakaafeʻi ai ʻa e mātuʻá ke nau kau mai. Ko e taumuʻá ke tokoniʻi ʻa e mātuʻá ke nau hoko ko ha kau faiako lelei ange ʻi honau ʻapí. ʻOku fakaʻaongaʻi ʻa e Ko e Faiako ʻi he Founga ʻa e Fakamoʻuí ko ha maʻuʻanga tokoni (vakai, 17.4).

Ngaahi Fakahinohinó mo e Ngaahi Tuʻutuʻuní

Kuo pau ke fakakakato ʻe he kakai lalahi kotoa pē ʻoku ngāue mo e toʻu tupú ʻa e ako ki hono maluʻi ʻo e fānaú mo e toʻu tupú, ʻi loto ʻi he māhina ʻe taha mei honau hikinimaʻí (ProtectingChildren.ChurchofJesusChrist.org ʻOku maʻu ha ngaahi fakahinohino lahi ange ki he Lautohi Faka-Sāpaté ʻi he konga 13.7 ʻo e Tohi Tuʻutuʻuni Fakakātoá.