O Lo’u Valaauga o se Fesoasoani i le Au Peresitene o Tamaitai Talavou
Tiutetauave
E faafetai le Alii mo lou naunauta’i e auauna atu i Lana Ekalesia. O loo i lalo se vaaiga aoao o tiutetauave mo lou valaauga.
Faamoemoega o Tamaitai Talavou
O le faalapotopotoga a Tamaitai Talavou e fesoasoani i afafine faapelepele a le Atua e sauniuni e toe foi atu i Lona afio’aga. E fesoasoani i tamaitai talavou e osia ma tausia feagaiga paia ma faalolotoina lo latou liua ia Iesu Keriso ma Lana talalelei. I a latou vasega, e auauna atu tamaitai talavou i isi, e faataunuuina tiutetauave o feagaiga, fausia le lotogatasi, ma aoao ma ola i aoaoga faavae. (Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 11.1.1.)
Fesoasoani
E auauna atu le peresitene ma fesoasoani i tamaitai talavou a o avea i latou ma soo o Iesu Keriso i le olaga atoa. Latou te aoao atu au peresitene o vasega e uiga i o latou tiutetauave ma tuuina atu le lagolago (tagai i le 11.3.2). E lagolagoina foi e fesoasoani le peresitene i faamaumauga, lipoti, ma mea tau tupe.
Taitai o le Autalavou
O le au peresitene o Tamaitai Talavou e lagolagoina taitai o le autalavou. O peresitene o vasega e i ai i le aufono a le autalavou o le uarota. O au peresitene o vasega e taitai ma auauna atu i tamaitai talavou a o latou faalatalata atili atu i le Faaola ma auai i le galuega a le Atua o le faaolataga ma le faaeaga. Faatasi ai ma le lagolago a taitai matutua, latou te fuafuaina galuega fesoasoani, gaoioiga, ma sauniga i Aso Sa (tagai i le 11.3.4.2).
Vasega i Aso Sa
O au epikopo ma taitai matutua o Tamaitai Talavou e faia ma le agaga tatalo faai’uga pe faapefea ona faatulaga ia vasega e tusa ai ma tausaga. Latou te iloiloina avanoa faaletaitaiga mo tamaitai talavou. O vasega taitasi, tusa po o le a le toatele, e tatau ona i ai se peresitene ma, i nofoaga e mafai ai, e toatasi pe toalua ni fesoasoani ma se failautusi (tagai i le 11.1.3).
Auaunaga ma Gaoioiga
O au peresitene o vasega, e lagolagoina e taitai matutua, e fuafuaina auaunaga ma gaoioiga ia e fausia ai molimau, faamalolosia ai aiga, uunaia ai le lotogatasi o le vasega, ma maua ai avanoa e faamanuia ai isi (tagai i le 11.2.1.3). O auaunaga ma gaoioiga o ni avanoa ia e faapotopoto ai le autalavou ma faasoa atu le olioli o le ola ai i le talalelei ma auai i le galuega tele a le Alii.
Taiala ma Aiaiga Faavae
O tagata matutua uma e galulue ma le tamaiti ma le autalavou e tatau ona faamae’aina le a’oa’oga faamasani o le Puipuiga o Tamaiti ma le Autalavou i totonu o le masina e tasi talu ona lagolagoina (ProtectingChildren.ChurchofJesusChrist.org). O taiala ma aiaiga faavae e faatatau i tamaitai talavou e i ai manaoga faapitoa, faatusa o le autalavou, ma isi o loo maua i le vaega 11.6 o le Tusitaulima Aoao.