Ti Calling-ko a kas Mamagbaga iti Korum dagiti Deacon

Dagiti Pagrebbengan

Agyamyaman ti Apo iti kinatallugodmo nga agserbi iti Simbaanna. Adda iti baba ti pakagupgopan dagiti pagrebbengan iti calling-mo.

Panggep ti Aaronic Priesthood

Tulongan dagiti korum ti Aaronic Priesthood dagiti agtutubo a lallaki a mangaramid ken mangtungpal kadagiti sagrado a katulagan ken mangpauneg iti kumbersionda ken ni Jesucristo ken iti ebangheliona. Ti panggep ti maysa a korum ket tapno matulongan dagiti priesthood holder nga agtitinnulong a makiraman iti aramid ti Dios iti pannakaisalakan ken pannakaitan-ok. (Kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 10.1, Gospel Library.)

Korum dagiti Deacon

Kumappeng dagiti agtutubo a lallaki iti korum dagiti deacon mangrugi iti Enero iti tawen a panagtawenda iti 12. Iti daytoy a gundaway maikarida pay a maordenan a deacon no nakasagana ken maikarida. Mairaman kadagiti pagrebbengan ti panangipasa iti sakramento ken panangtulong iti bishop iti “panangannong iti amin a naindagaan a banag” (Doktrina ken Katulagan 107:68). (Kitaen iti 10.1.3.1.)

Mamagbaga

Suportaran dagiti mamagbaga ti korum dagiti deacon ti presidente kadagiti pagrebbenganna, agraman ti panangidaulo kadagiti panagkagumaan ti korum iti pannakipaset iti aramid ti Dios iti pannakaisalakan ken pannakaitan-ok; panangam-ammo ken panagserbi iti tunggal miembro ti korum, agraman kadagidiay saan a dumardar-ay kadagiti miting ti korum; panangpapigsa kadagiti baro ken agsubsublin a miembro; panangisuro kadagiti miembro ti korum kadagiti pagrebbenganda iti priesthood; ken panagplano ken panangiturong kadagiti miting ti korum (kitaen iti 10.4.2). Nasken a regular nga agmiting ti panguluen ti korum (kitaen iti 10.4.3).

Serbisio ken dagiti Aktibidad

Dagiti lider ti bishopric ken korum dagiti agtutubo, a suportaran dagiti mamalbalakad, ket agplanoda iti serbisio ken dagiti aktibidad. Nasken a dagitoy ti makatulong a mangipatungpal iti aramid ti pannakaisalakan ken pannakaitan-ok. Nasken a natimbengda iti uppat a tay-ak ti panagdur-as: espiritual, sosial, pisikal, ken intelektual. (Kitaen iti 10.2.1.3.)

Dagiti Pangiwanwan ken Annuroten

Dagiti nayon a pangiwanwan ken annuroten, agraman ti panangsuporta kadagiti agtutubo a lallaki nga addaan kadagiti pagkurangan, panangawat kadagiti emblem ti Ubbing ken Agtutubo, ken panangummong kadagiti daton iti panagayuno, ket masarakan iti benneg 10.8 ti Sapasap a Handbook.