Kūr eo aō āinwōt juon Rikakpilōklōk an Doulul eo an Tikōn ro

Eddo ko

Irooj ej m̧ōņōņō kōn wujlepļo̧k eo am̧ n̄an jerbal ilo Kabun̄ eo An. Ijin ilaļ ej juon kōmeļeļe ekadu kōn eddo ko n̄an kūr eo am̧.

Kōttōbar eo an Priesthood eo an Aron

Doulul ko an Priesthood eo an Aron ej jipan̄ likao ro kōm̧m̧an im kōjparok bujen ko rekwojarjar im kam̧wilaļ ļo̧k oktak tok eo aer n̄an Jisōs Kraist im gospel eo An. Jibadbad eo an juon doulul eo ej n̄an jipan̄ rikabwijer priesthood ro jerbal ippān doon n̄an kōtōprak jerbal in lo̧mo̧o̧r eo an Anij im mour ijo ilōn̄tata. (Lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar Ilo Raan Ko Āļiktata, 10.1, Gospel Library.)

Doulul eo an Tikōn ro

Likao ro rej koba ippān doulul eo an tikōn ro ilo jinoin Jānwōde ilo iiō eo me ej jejjet 12 aer iiō. Ilo iien in remaron̄ ekkapit āinwōt tikōn ro eļan̄n̄e repojak im erreo. Jerbal ko jet ekoba ajije kwojkwoj eo im jipan̄ bisop eo “kajeikik aolep men ko an jidimkij” (Katak im Bujen Ko 107:68). (Lale 10.1.3.1.)

Rikakpilōklōk

Rikakpilōklōk ro an doulul eo an tikōn ro rej jipan̄ būreejtōn eo ilo eddo ko an, ekoba tōl kijejeto ko an doulul eo n̄an bōk kuņaer ilo jerbal in lo̧mo̧o̧r eo an Anij im mour ijo ilōn̄tata; jeļā kajjien im jerbal n̄an ro uwaan doulul eo, ekoba ro rejjab pād ilo kweilo̧k ko; kōkajoorļo̧k membōr ro rekāāl im rej ro̧o̧ltok; katakin ro uwaan doulul eo eddo ko aer ilo priesthood; im karōk im kōjekiik kweilo̧k ko an doulul eo (lale 10.4.2). Būreejtōnji eo an doulul eo rej aikuj kweilo̧k emakijkij (lale 10.4.3).

Jerbal in Jipan̄ im M̧akūtkūt ko

Bisoprik eo im ritōl ro an doulul eo an jodikdik ro, kōn jipan̄ jān rikapilōk ro, rej karōk jerbal in jipan̄ im m̧akūtkūt ko. Rej aikuj jipan̄ kōttōprak jerbal in lo̧mo̧o̧r eo im mour iijo ilōn̄tata. Rej aikuj jon̄an wōt juon ilubwiljin eria ko emān ikkijeen eddōkļo̧k an juon make: ilo jetōb, iiaio, kanniōk, im jeļāļo̧kjeņ. (Lale 10.2.1.3.)

Unin Tōl im Kakien ko

Kakkobaba in unin tōl im kakien ko, ekoba jipan̄ likao ro ewōr utam̧we ilo ānbwinier, bōk nōbar ko n̄an Ajri ro im Jodikdik ro, im aiini joortak in jitlo̧k ko, rej waļo̧k ilo jekjōn 10.8 in Bok in Bōk Meļeļe Eļap.