Ti Calling-ko a kas Presidente ti Korum dagiti Deacon
Dagiti Pagrebbengan
Agyamyaman ti Apo iti kinatallugodmo nga agserbi iti Simbaanna. Adda iti baba ti pakagupgopan dagiti pagrebbengan iti calling-mo.
Panggep ti Aaronic Priesthood
Tulongan dagiti korum ti Aaronic Priesthood dagiti agtutubo a lallaki a mangaramid ken mangtungpal kadagiti sagrado a katulagan ken mangpauneg iti kumbersionda ken ni Jesucristo ken iti ebangheliona. Ti panggep ti maysa a korum ket tapno matulongan dagiti priesthood holder nga agtitinnulong a makiraman iti aramid ti Dios iti pannakaisalakan ken pannakaitan-ok. (Kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 10.1, Gospel Library.)
Korum dagiti Deacon
Kumappeng dagiti agtutubo a lallaki iti korum dagiti deacon mangrugi iti Enero iti tawen a panagtawenda iti 12. Iti daytoy a gundaway maikarida pay a maordenan a deacon no nakasagana ken maikarida. Mairaman kadagiti pagrebbenganda ti panangipasa iti sakramento ken panangtulong iti bishop iti “panangannong iti amin a naindagaan a banag” (Doktrina ken Katulagan 107:68). (Kitaen iti 10.1.3.1.)
Presidente
Mairaman kadagiti pagrebbengan ti presidente ti korum dagiti deacon ti panangidaulo kadagiti panagkagumaan ti korum iti pannakipaset iti aramid ti Dios iti pannakaisalakan ken pannakaitan-ok; panangam-ammo ken panagserbi iti tunggal miembro ti korum, agraman dagidiay saan a dumardar-ay kadagiti miting ti korum; panangpapigsa kadagiti baro ken agsubsublin a miembro; panangisuro kadagiti miembro ti korum kadagiti pagrebbenganda iti priesthood; ken panagplano ken panangiturong kadagiti miting ti korum (kitaen iti 10.4.2). Suportaran dagiti mamagbagana kadagiti pagrebbenganna. Nasken a regular nga agmiting ti panguluen ti korum (kitaen iti 10.4.3).
Konseho dagiti Agtutubo
Miembro ti konseho dagiti agtutubo iti ward ti presidente ti korum dagiti deacon. Ti panggep daytoy a konseho ket tapno tulongan dagiti dagiti agtutubo a mangyeg kadagiti dadduma ken ni Jesucristo ken mangtulong a mangipatungpal iti aramid ti pannakaisalakan ken pannakaitan-ok. Ti bishop ti mangidaulo iti konseho dagiti agtutubo ti ward. (Kitaen iti 10.4.4.)
Serbisio ken dagiti Aktibidad
Dagiti lider ti bishopric ken korum dagiti agtutubo, a suportaran dagiti mamalbalakad, ket agplanoda iti serbisio ken dagiti aktibidad. Nasken a dagitoy ti makatulong a mangipatungpal iti aramid ti pannakaisalakan ken pannakaitan-ok. Nasken a natimbengda kadagiti uppat a tay-ak ti panagdur-as: espiritual, sosial, pisikal, ken intelektual. (Kitaen iti 10.2.1.3.)
Dagiti Pangiwanwan ken Annuroten
Dagiti nayon a pangiwanwan ken annuroten, agraman ti panangsuporta kadagiti agtutubo a lallaki nga addaan iti pagkurangan, panangawat kadagiti emblem ti Ubbing ken Agtutubo, ken panangummong kadagiti daton iti panagayuno ket masarakan iti 10.8 ti Sapasap a Handbook.