Ang Akong Calling isip Lider sa Nursery

Mga Responsibilidad

Ang Ginoo mapasalamaton sa imong kaandam nga moserbisyo sa Iyang Simbahan. Sa ubos mao ang kinatibuk-ang pagpasabot sa mga reponsibilidad sa imong calling.

Katuyoan sa Primary

Ang Primary motabang sa kabataan nga mobati sa gugma sa ilang Langitnong Amahan; makakat-on mahitungod sa Iyang plano sa kalipay; mosunod sa ebanghelyo ni Jesukristo; ug mobati, moila, ug molihok sa impluwensiya sa Espiritu Santo. Ang Primary usa usab ka panahon sa pagpangandam, paghimo, ug pagtuman sa sagrado nga mga pakigsaad samtang ang kabataan moapil sa buhat sa Dios sa kaluwasan ug kahimayaan. (Tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 12.1.)

Lider sa Nursery

Ang pagtudlo sa mga anak sa Dios usa ka sagrado nga pribilihiyo. Ang nursery motabang sa mga bata nga nag-edad og 18 ka bulan hangtod 3 ka tuig nga mobati sa gugma sa Langitnong Amahan ug makat-on mahitungod sa Iyang plano sa kalipay. Ang mga lider sa nursery mohigugma, motudlo, ug mangalagad ngadto sa mga bata. Sila usab moseguro sa ilang kahilwasan ug kaayohan (tan-awa sa 12.1.5).

Klase sa Dominggo

Ang mga lider sa nursery motudlo gikan sa Tan-awa ang Inyong Gagmay nga mga Bata. Sila mosunod sa mga baroganan sa Pagtudlo sumala sa Pamaagi sa Manluluwas ug kapitulo 17 sa Kinatibuk-ang Tamdanan nga Basahon. Kon ang mga hamtong nagtudlo sa kabataan diha sa Simbahan, dili mominos sa duha ka responsable nga mga hamtong ang kinahanglan nga anaa (tan-awa sa 12.3.5).

Mga Lagda ug mga Palisiya

Ang tanang hamtong nga naglihok uban sa kabataan ug kabatan-onan kinahanglang mokompleto sa pagbansay sa Pagpanalipod sa Kabataan ug Kabatan-onan sulod sa usa ka bulan human mapaluyohi (ProtectingChildren.ChurchofJesusChrist.org). Ang mga lagda ug mga palisiya kabahin sa kabataan nga adunay espesyal nga mga panginahanglan, mga kinahanglanon sa kahilwasan, ang Programa sa Kabataan ug Kabatan-onan, ug uban pa makita sa seksiyon 12.5 sa Kinatibuk-ang Tamdanan nga Basahon.