Lin b’oqb’al jo’ aj tz’iib’anel sa’ lix molameb’ laj tij

Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

Li rajom li Tijonelil re Aaron

Eb’ li molam sa’ li Tijonelil re Aaron naxtenq’aheb’ li saaj winq chixk’ulb’aleb’ ut chixpaab’ankileb’ li loq’laj sumwank ut chixchamob’resinkil lix jalajik xch’ooleb’ rik’in li Jesukristo ut lix evangelio. Li rajb’al jun molam a’an xtenq’ankileb’ li xe’k’uluk re li tijonelil chi k’anjelak sa’ komonil sa’ xk’anjel li Dios re li kolb’a-ib’ ut li taqenaqil loq’al. (Chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 10.1, Biblioteca del Evangelio.

Lix molameb’ laj tij

Eb’ li saaj winq neke’ok sa’ lix molameb’ laj tij sa’ xtiklajik li enero re li chihab’ te’xket wi’ 16 chihab’. Wi kawresinb’ileb’ ut k’ulub’eb’, naru ajwi’ te’k’ojob’aaq choq’ aj tij. Eb’ laj tij wankeb’ ajwi’ xteneb’ankileb’ jo’eb’ aj tenq’anel ut aj tzolonel. Eb’ laj tij naru neke’xk’anjela li loq’laj wa’ak, naru neke’kub’sink ha’ (jo’ ajwi’ li kub’iha’ sa’ li santil ochoch), ut naru neke’xk’ojob’ jalaneb’ chik laj tij, laj tzolonel, malaj laj tenq’anel (chi’ilmanq Tzol’leb’ ut Sumwank 20:46–52, 73–79; Jolomil K’anjenel Hu, 10.1.3.3).

Laj tz’iib’anel

Naq neke’b’oqman laj tz’iib’anel sa’ li molam, neke’xkawresi xtusulaleb’ li ch’utam ut neke’xtz’iib’a resil li k’a’ru nayeeman. Neke’xtenq’a ajwi’ laj tz’iib’ re teep malaj laj k’anjenel sa’ li molam chixk’uulankil resil jarub’eb’ yookeb’ chi wulak sa’eb’ li ch’utam. (Chi’ilmanq 10.4.2.)

Li k’anjelak chiru as iitz’inb’ej ut eb’ li kok’ k’anjel

Li obiisp rochb’eeneb’ li saaj aj jolominel sa’eb’ li molam, chi tenq’anb’ileb’ xb’aaneb’ laj k’anjenel, neke’xk’uub’eb’ li kok’ k’anjel ut li k’anjelak chiruheb’ li qas qiitz’in. Tento naq eb’ li k’anjel a’in te’tenq’anq chixtz’aqob’resinkil ru li k’anjel re li kolb’a-ib’ ut li taqenaqil loq’al Tento xb’aanunkileb’ sa’ li junjunq reheb’ li kaahib’ chi na’leb’ re k’iik: sa’ musiq’ej, sa’ komonil wank, sa’ tib’elej, ut sa’ k’a’uxleb’aal. (Chi’ilmanq 10.2.1.3.)

Li b’eresink ut li chaq’rab’ink

Naru natawman xkomon chik li b’eresink ut li chaq’rab’ink, jo’ xtenq’ankileb’ li saaj winq wankeb’ xmajelal, xk’ulb’aleb’ li eetalil reheb’ li Kok’al ut li Saaj, ut xch’utub’ankileb’ li mayej re kuyuk sa’, sa’ li tasal 10.8 re li Jolomil K’anjenel Hu.