Ko Hoku Uiuiʻi ko ha Sekelitali ʻo e Kōlomu ʻo e Kau Taulaʻeikí

Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki ho uiuiʻí.

Taumuʻa ʻo e Lakanga Taulaʻeiki Faka-ʻĒloné

ʻOku tokoniʻi ʻe he ngaahi kōlomu ʻo e Lakanga Taulaʻeiki Faka-ʻĒloné ʻa e kau talavoú ke nau fakahoko mo tauhi ʻa e ngaahi fuakava toputapú pea mo fakaloloto ʻenau ului kia Sīsū Kalaisi mo ʻEne ongoongoleleí. Ko e taumuʻa ʻo ha kōlomu ke tokoni ki he kau maʻu lakanga fakataulaʻeikí ke nau ngāue fakataha ke kau ʻi he ngāue ʻa e ʻOtuá ki he fakamoʻuí mo e hakeakiʻí. (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní 10.1, Gospel Library.)

Kōlomu ʻo e Kau Taulaʻeikí

ʻOku kau ʻa e kau talavoú ki he kōlomu ʻo e kau taulaʻeikí ʻo kamata ʻi he Sānuali ʻo e taʻu ʻoku hoko ai honau taʻu 16. Kapau ʻoku nau mateuteu mo moʻui taau, ʻe lava foki ke fakanofo mo kinautolu ko ha kau taulaʻeiki. ʻOku maʻu ʻe he kau taulaʻeikí ʻa e fatongia tatau mo e kau tīkoní mo e kau akonakí. ʻE lava foki ke fakahoko ʻe he kau taulaʻeikí ʻa e sākalamēnití, fakahoko ʻo e papitaisó (kau ai ʻa e papitaiso ʻi he temipalé), mo fakanofo ha kau taulaʻeiki, kau akonaki, pe kau tīkoni kehe (vakai, Tokāteline mo e Ngaahi Fuakava 20:46–52, 73–79; Tohi Tuʻutuʻuni Fakakātoá, 10.1.3.3).

Sekelitalí

Ko e taimi ʻoku ui ai ha kau sekelitali fakakōlomú, te nau teuteu ʻa e ngaahi ʻasenita ki he ngaahi fakatahá mo hiki ʻa e ngaahi fakamatalá. Te nau toe tokoni foki ki he kalake fakauōtí pe ko ha ʻetivaisa fakakōlomu ke muimuiʻi ʻa e maʻulotú. (Vakai, 10.4.2.)

Ngāue Tokoní mo e Ngaahi ʻEkitivitií

ʻE palani ʻe he pīsopé mo e kau taki fakakōlomu ʻo e toʻu tupú ʻa e ngāue tokoní mo e ngaahi ʻekitivitií, pea poupouʻi ʻe he kau ʻetivaisá. ʻOku totonu ke tokoni ʻeni ke fakahoko ʻa e ngāue ʻo e fakamoʻuí mo e hakeakiʻí. ʻOku totonu ke nau potupotutatau ʻi he ngaahi tafaʻaki ʻe fā ʻo e tupulaki fakafoʻituituí: fakalaumālie, fakasōsiale, fakatuʻasino, mo fakaeʻatamai. (Vakai, 10.2.1.3.)

Ngaahi Fakahinohinó mo e Ngaahi Tuʻutuʻuní

ʻOku maʻu ha ngaahi fakahinohino mo ha ngaahi tuʻutuʻuni lahi ange, kau ai hono poupouʻi ʻo e kau talavou ʻoku faingataʻaʻia fakatuʻasinó, maʻu ʻo e ngaahi fakaʻilonga ʻo e Fānaú mo e Toʻu Tupú, mo hono tānaki ʻo e ngaahi foaki ʻaukaí, ʻi he konga 10.8 ʻo e Tohi Tuʻutuʻuni Fakakātoá.