Mga Responsibilidad

Ang Ginoo mapasalamaton sa imong kaandam nga moserbisyo sa Iyang Simbahan. Sa ubos mao ang kinatibuk-ang pagpasabot sa mga reponsibilidad sa imong calling.

Katuyoan sa Primary

Ang Primary motabang sa kabataan nga mobati sa gugma sa ilang Langitnong Amahan; makakat-on mahitungod sa Iyang plano sa kalipay; mosunod sa ebanghelyo ni Jesukristo; ug mobati, moila, ug molihok sa impluwensiya sa Espiritu Santo. Ang Primary usa usab ka panahon sa pagpangandam, paghimo ug pagtuman sa sagrado nga mga pakigsaad samtang ang kabataan moapil sa buhat sa Dios sa kaluwasan ug kahimayaan. (Tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 12.1.)

Presidente ug Kapangulohan

Ang kapangulohan sa Primary motabang sa mga ginikanan nga maandam ang kabataan sa pagsulod ug pag-uswag subay sa dalan sa pakigsaad. Mao kini ang usa sa ilang labing importanteng mga responsibilidad. Ang presidente moserbisyo isip sakop sa konseho sa ward. Siya ug ang iyang mga magtatambag regular nga magmiting ug aduna usab mga miting uban sa bishop o sa iyang gitahasan nga magtatambag. Ang kapangulohan modumala sa mga miting sa Primary, mangalagad sa indibidwal nga mga bata, mga magtutudlo ug mga lider, ug sa administratiba nga mga panginahanglan sa Primary. (Tan-awa sa 12.3.2.)

Mga Klase ug Panahon sa Pagpanganta

Usa ka sagrado nga pribilehiyo ang pagtudlo sa kabataan. Ang mga lider sa Primary mohigugma ug motudlo sa kabataan sumala sa pamaagi sa Manluluwas. Ang mga klase sa Primary gi-organisar sumala sa edad ug sa gidaghanon sa mga magtutudlo nga anaa (tan-awa sa 12.1.3). Ang panahon sa pagpanganta makatabang sa mga bata nga mobati sa gugma sa Langitnong Amahan ug makakat-on mahitungod sa Iyang plano sa kalipay (tan-awa sa 12.1.4).

Mga Miting ug mga Konseho

Ang presidente sa Primary nagrepresentar sa mga panginahanglan sa kabataan samtang nakigmiting ug nakigtambag sa mga lider sa ward. Kini naglakip sa padayon nga mga miting uban sa bishop o natahasan nga magtatambag, konseho sa ward, kapangulohan ug secretary, mga ginikanan, ug uban pa. (Tan-awa sa 12.3.2.)

Mga Magtutudlo ug mga Lider

Ang pagtudlo sa mga anak sa Dios usa ka sagrado nga pribilihiyo. Ang kapangulohan sa Primary maghatag og suporta sa mga magtutudlo ug mga lider sa Primary atol sa mga klase, sa nursery, ug sa panahon sa pagpanganta (tan-awa sa 12.3.5). Ang kapangulohan sa Primary morekomendar ngadto sa bishopric og mga lalaki ug mga babaye nga moserbisyo og mga calling sa Primary ug sa nursery.

Mga Kalihokan sa Primary

Ang mga lider sa kalihokan sa Primary magplano og makalingaw ug mga makadasig nga mga kalihokan nga makatabang nga matuman ang buhat sa Dios sa kaluwasan ug kahimayaan. Ang serbisyo ug mga kalihokan kinahanglan nga mopalambo og mga pagpamatuod, molig-on og mga pamilya, ug mohatag og mga oportunidad sa pagpanalangin sa uban. Ang mga kalihokan sa Primary sa kasagaran ipahigayon og kaduha sa matag bulan alang sa mga bata nga nag-edad og 8–11. (Tan-awa sa 12.3.6.)

Mga Lagda ug mga Palisiya

Ang tanang hamtong nga naglihok uban sa kabataan ug kabatan-onan kinahanglang mokompleto sa pagbansay sa Pagpanalipod sa Kabataan ug Kabatan-onan sulod sa usa ka bulan human mapaluyohi (ProtectingChildren.ChurchofJesusChrist.org). Ang mga lagda ug mga palisiya kabahin sa kabataan nga adunay espesyal nga mga panginahanglan, mga kinahanglanon sa kahilwasan, ang Programa sa Kabataan ug Kabatan-onan, ug uban pa makita sa seksiyon 12.5 sa Kinatibuk-ang Tamdanan nga Basahon.