iTavi eso

E vakavinavinakataka na Turaga ena nomu lomasoli mo veiqaravi ena Nona Lotu. E koto e ra na ivakamacala raraba ni itavi eso ni nomu veikacivi.

iNaki ni Lalai

Na Lalai e vukei ira na gone me ra vakila na loloma ni Tamada Vakalomalagi; vulica me baleta na Nona ituvatuva ni marau; bulataka na kosipeli i Jisu Karisito; ka vakila, kila, ka cakacaka ena veivakauqeti ni Yalo Tabu. Na Lalai sa gauna talega ni vakavakarau, cakava, ka maroroya na veiyalayalati tabu ni ra vakaitavi na gone ena cakacaka ni veivakabulai kei na bula vakacerecerei ni Kalou. (Raica na iVoladusidusi Raraba: Veiqaravi e Na Lotu i Jisu Karisito ni Yalododonu Edaidai, 12.1.)

Peresitedi kei na Mataveiliutaki

Na mataveiliutaki ni Lalai e vukei ira na itubutubu mera vakarautaki ira na gone mera curu ka toso ki liu ena salatu ni veiyalayalati. Oqo e dua vei ira na nodra itavi bibi duadua. Na peresitedi e dua na lewe ni matabose ni tabanalevu. Eratou dau sota wasoma kei rau na nona daunivakasala ka dau bose vata talega kei bisopi se na nona daunivakasala sa lesi. Eratou dau raica raraba na mataveiliutaki na soqoni ni Lalai, nodra qaravi na gone yadua, qasenivuli kei na iliuliu, kei na gagadre vakaveiliutaki eso ena Lalai. (Raica na 12.3.2.)

Kalasi kei na Gauna ni Lagasere

E sa dua na madigi tabu me da vakavulici ira na gone. Era dau lomani ira ka vakavulici ira na gone na iliuliu ni Lalai ena ivakarau ni iVakabula. Era dau tauyavutaki na vei kalasi ni Lalai ena yabaki ni bula kei na iwiliwili ni qasenivuli era tiko rawa (raica na 12.1.3). Na gauna ni lagasere e vukei ira na gone mera vakila na loloma ni Tamada Vakalomalagi ka vulica na Nona ituvatuva ni marau (raica na 12.1.4).

Bose kei na Matabose

Ena dau matataka na peresitedi ni Lalai na nodra gagadre na gone ni dau bose ka veivakasalataki kei ira na iliuliu ena tabanalevu. Oqo e oka kina na bose eso vata kei bisopi se daunivakasala sa lesi, matabose ni tabanalevu, mataveiliutaki kei na sekeriteri, itubutubu, kei ira tale eso. (Raica na 12.3.2.)

Qasenivuli kei na iLiuliu

Na vakavulici ira na luve ni Kalou sa dua na madigi tabu. Eratou dau veitokoni na mataveiliutaki ni Lalai vei ira na qasenivuli kei na iliuliu ni Lalai ena gauna ni kalasi, isususu, kei na gauna ni lagasere (raica na 12.3.5). Eratou dau vakatura kina matabisopi na mataveiliutaki ni Lalai na turaga kei na marama me ra veiqaravi ena veikacivi eso ni Lalai kei na isususu.

iTaviqaravi ni Lalai

Era tuvanaka na iliuliu ni itaviqaravi ni Lalai na itaviqaravi lasa ka veivakauqeti eso ka na vukea na kena rawati na cakacaka ni veivakabulai kei na bula vakacerecerei ni Kalou. Na veiqaravi kei na itaviqaravi eso e dodonu me tara cake na ivakadinadina, vaqaqacotaka na matavuvale, ka vakarautaka na madigi mera vakalougatataki kina na tani. Na itaviqaravi ni Lalai e dau vakayacori vakarua ena dua na vula me baleti ira na gonelalai yabaki 8–11. (Raica na 12.3.6.)

iDusidusi kei na Lawatu

Na itabaqase kece era cakacaka vata kei ira na gonelalai kei ira na itabagone e dodonu me ra vakacavara na veituberi ni Veitaqomaki vei ira na Gonelalai kei na iTabagone ena loma ni dua na vula mai na gauna era a tokoni kina (ProtectingChildren.ChurchofJesusChrist.org). Na idusidusi kei na lawatu me baleti ira na gonelalai era vakaleqai tu, veika e gadrevi ena veitaqomaki, na parokaramu ni Gonelalai kei na iTabagone, kei na so tale era kune ena wase 12.5 ni iVoladusidusi Raraba.