Dagiti Pagrebbengan

Agyamyaman ti Apo iti kinatallugodmo nga agserbi iti Simbaanna. Adda iti baba ti pakabuklan dagiti pagrebbengan para iti calling-mo.

Panggep ti Primary

Tulongan ti Primary dagiti ubbing a mangrikna iti ayat ti Nailangitan nga Amada; mangsursuro maipapan iti planona iti kinaragsak; mangibiag iti ebanghelio ni Jesucristo; ken, mangrikna, mangbigbig, ken agtignay segun iti impluensia ti Espiritu Santo. Ti Primary ket panawen pay iti panagsagana, panagaramid, ken panagtungpal kadagiti sagrado a katulagan bayat ti pannakiraman dagiti ubbing iti aramid ti Dios iti pannakaisalakan ken pannakaitan-ok. (Kitaen iti Sapasap a Handbook: Panagserbi iti Ti Simbaan ni Jesucristo dagiti Santo iti Ud-udina nga Aldaw, 12.1.)

Presidente ken ti Panguluen

Tulongan ti panguluen ti Primary dagiti nagannak a mangisagana kadagiti ubbing a sumrek ken dumur-as iti dana ti katulagan. Maysa daytoy kadagiti kapatgan a pagrebbenganda. Agserbi ti presidente a kas maysa a miembro iti konseho iti ward. Regular a makipagmiting kadagiti mamagbagana ken makipagmiting pay iti bishop wenno ti nadutokan a mamagbagana. Ti panguluen ti mangimaton kadagiti miting ti Primary, panagminister a saggaysa kadagiti ubbing, mannursuro, ken lider, ken dagiti kasapulan nga administratibo ti Primary. (Kitaen iti 12.3.2.)

Dagiti Klase ken Oras ti Panagkanta

Sagrado a pribilehio ti mangisuro kadagiti ubbing. Ayaten ken isuro dagiti lider iti Primary dagiti ubbing iti wagas ti Mangisalakan. Mabukel dagiti klase ti Primary baben iti edad ken ti bilang dagiti mannursuro nga adda a magun-od (kitaen iti 12.1.3). Ti oras ti panagkanta ket mangtulong kadagiti ubbing a mangrikna iti ayat ti Nailangitan nga Ama ken mangsursuro maipapan iti planona iti kinaragsak (kitaen iti 12.1.4).

Dagiti Miting ken Konseho

Ti presidente ti Primary ti mangibagi kadagiti kasapulan dagiti ubbing bayat ti pannakipagmiting ken pannakiumanna kadagiti lider iti ward. Mairaman ditoy dagiti agtultuloy a pannakipagmiting iti bishop wenno naidutok a mamagbaga, konseho iti ward, panguluen ken secretary, nagannak ken dadduma pay. (Kitaen iti 12.3.2.)

Dagiti Mannursuro ken Lider

Sagrado a pribilehio ti mangisuro kadagiti ubbing. Mangipaay iti suporta ti panguluen ti Primary kadagiti mannursuro ken lider iti Primary kabayatan dagiti klase, nursery ken oras ti panagkanta (kitaen iti 12.3.5). Irekomenda ti panguluen ti Primary iti bishopric dagiti lallaki ken babbai nga agserbi kadagiti calling iti Primary ken nursery.

Dagiti Aktibidad iti Primary

Dagiti lider ti aktibidad iti Primary ti agplano kadagiti makaay-ayo ken makaawis nga aktibidad a makatulong a mangipatungpal ti aramid ti Dios iti pannakaisalakan ken pannakaitan-ok. Nasken a ti serbisio ken dagiti aktibidad ti mangpatibker kadagiti pammaneknek, mangpapigsa kadagiti pamilia, ken mangipaay kadagiti gundaway a mangbendision kadagiti dadduma. Gagangay a maangay dagiti aktibidad iti Primary iti mamindua a daras iti binulan para kadagiti ubbing nga agtawen iti 8–11. (Kitaen iti 12.3.6.)

Dagiti Pangiwanwan ken Annuroten

Amin a nataengan a makipagtrabaho kadagiti ubbing ken agtutubo ket nasken a leppasenda ti training iti Panangsaluad kadagiti Ubbing ken Agtutubo iti uneg ti makabulan a pannakakanunongda (ProtectingChildren.ChurchofJesusChrist.org). Dagiti pangiwanwan ken annuroten maipanggep kadagiti ubbing nga addaan iti pagkurangan, kasapulan iti panangtalged, ti programa dagiti Ubbing ken Agtutubo, ken dadduma pay ket masarakan iti benneg 12.5 ti Sapasap a Handbook.