Eddo ko

Irooj ej m̧ōņōņō kōn wujlepļo̧k eo am̧ n̄an jerbal ilo Kabun̄ in An. Ijin ilaļ ej juon kōmeļeļe kōn eddo ko n̄an kūr eo am̧.

Jibadbad eo an Būraimere

Būraimere ej jipan̄ ajri ro en̄jake iakwe eo an Jemeer Ilan̄; katak kōn karōk in m̧ōņōņō eo An; mour kōn gospel eo an Jisōs Kraist; im en̄jake, kile, im ļoor kareel eo an Jetōb Kwojarjar. Būraimere ej barāinwōt juon iien n̄an kōppopo n̄an, kōm̧m̧an, im kōjparok bujen ko rekwojarjar ilo an ajri ro bōk koņaer ilo jerbal in lo̧mo̧o̧r eo an Anij im mour ijo eutiej tata. (Lale Bok in Bōk Meļeļe: Jerbal ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, 12.1.)

Būreejtōn im Būreejtōnji eo

Būraimere Būreejtōnji eo ej jipan̄ ro jinen im jemān ajri ro kepooj ajri ro n̄an deļo̧n̄ im wōnm̧aanļo̧k ilo iaļan bujen in. En̄in ej juon iaan eddo ko aer eļap an aorōk. Būreejtōn eo ej jerbal āinwōt juon uwaan ward ko̧o̧njeļ eo. E im rikakpilōklōk ro an rej kweilo̧k ippān doon aolep iien im barāinwōt kōm̧m̧ani kweilo̧k ko ippān bisop eo ak rikakpilōklōk eo emōj kile. Būreejtōnji eo ej eddoik kweilo̧k ko an Būraimere, jerbal in karejar n̄an kajjojo ajri, rūkaki ro im ritōl ro, im lolorjaki aikuj ko an Būraimere. (Lale 12.3.2.)

Kūlaaj ko im Iien Al eo

Ej juon jeraam̧m̧an ekwojarjar n̄an katakin ajri ro. Ritōl ro an Būraimere rej iakwe im katakin ajri ro ilo wāween eo an Rilo̧mo̧o̧r. Kūlaaj ko an Būraimere rej ejaak kōn iiō im oran rūkaki ro rej pojak (lale 12.1.3). Iien al ej jipan̄ ajri ro en̄jake iakwe eo an Jemādwōj Ilan̄ im katak kōn karōk in m̧ōņōņō eo An (lale 12.1.4).

Kweilo̧k ko im Ko̧o̧njeļ ko

Būreejtōn eo an būraimere ej kwaļo̧k aikuj ko an ajri ro ilo iien kweilo̧k im kapilōk eo ippān ritōl ro an ward eo. Menin ekoba kweilo̧k ko rej wōnm̧aaļo̧k wōt ippān bisop eo ak rikakpilōklōk eo kar kappeik, ward ko̧o̧njeļ eo, būreejtōnji im rijeje eo, ro jinen im jemān ajri ro, im ro jet. (Lale 12.3.2.)

Rūkaki ro im Ritōl ro

Katakin ajri ro Nejin Anij ej juon jeraam̧m̧an ekwojarjar. Būraimere būreejtōnji eo ej leļo̧k rie n̄an rūkaki ro an Būraimere im ritōl ro ilo iien kūlaaj ko, nursery eo, im iien al eo (lale 12.3.5). Būraimere būreejtōnji eo ej elmakoteļo̧k n̄an bisoprik eo em̧m̧aan ro im kōrā ro n̄an jerbal ilo kūr ko an Būraimere im nursery eo.

M̧akūtkūt eo an Būraimere

Ritōl in m̧akūtkūt ko an Būraimere rej karōk m̧akūtkūt ko rej kobaiki ajri ro im rakilimomo me rej jipan̄ kōtōprak jerbal in lo̧mo̧o̧r eo an Anij im mour ijo eutiej tata. Jerbal in jipan̄ ko im m̧akūtkūt ko rej aikuj in kalōk naan in kam̧ool ko, kōkajoorļo̧k baam̧le ko, im leļo̧k iien ko rem̧m̧an n̄an kōjeraam̧m̧an ro jet. M̧akūtkūt ko an Būraimere ekkā aer kōm̧m̧an ruo alen ilo juon allōn̄ n̄an ajri ro ilo iiō ko 8–11. (Lale 12.3.6.)

Unin Tōl im Kakien ko jet

Aolep rūtto ro rej jerbal ippān ajri ro im jodikdik ro rej aikuj kadedeikļo̧k kaminene eo n̄an Kōjparok Ajri ro im Jodikdik ro (Protecting Children im Youth) ilowaan juon allōn̄ jān iien eo rekar rejtake(ProtectingChildren.ChurchofJesusChrist.org). Unin tōl ko im kakien ko ikkijien ajri ro ewōr nan̄inmej ko ilo ānbwin, men ko aikuji n̄an kōjparok, būrookraam̧ eo an Ajri ro im Jodikdik ro, im ko jet loi ilo jekjōn 12.5 an Bok in Bōk Meļeļe Eļap.