O Lo‘u Valaauga o se Peresitene o le Peraimeri
Tiutetauave
E faafetai le Alii mo lou naunauta’i e auauna atu i Lana Ekalesia. O loo i lalo se vaaiga aoao o tiutetauave mo lou valaauga.
Faamoemoega o le Peraimeri
E fesoasoani le Peraimeri i tamaiti ia lagonaina le alofa o lo latou Tama Faalelagi; aoao e uiga i Lana fuafuaga o le fiafia; ola i le Talalelei a Iesu Keriso; ma lagona, iloa, ma faatino e ala i le tosinaga a le Agaga Paia. O le Peraimeri o se taimi foi e saunia ai, osia, ma tausia feagaiga paia a o auai tamaiti i le galuega a le Atua o le faaolataga ma le faaeaga. (Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 12.1.)
Peresitene ma le Au Peresitene
E fesoasoani le au peresitene o le Peraimeri i matua e saunia fanau e ulu atu ma alualu i luma i luga o le ala o feagaiga. O se tasi lenei o o latou tiutetauave sili ona taua. O le peresitene e auauna atu o se sui auai o le aufono a le uarota. E fono faatasi e le aunoa o ia ma ona fesoasoani ma faia foi fonotaga ma le epikopo po o lona fesoasoani e tofia. O le au peresitene e vaavaaia fonotaga/sauniga a le Peraimeri, auauna atu i tamaiti taitoatasi, faiaoga ma taitai, ma manaoga faaletaitaiga o le Peraimeri. (Tagai i le 12.3.2.)
Vasega ma Taimi o Pesepesega
O se avanoa paia le aoao atu o tamaiti. O taitai o le Peraimeri e alolofa ma aoao atu fanau i le ala a le Faaola. O vasega o le Peraimeri ua faatulagaina i tausaga ma le numera o faiaoga e avanoa (tagai i le 12.1.3). O le taimi o pesepesega e fesoasoani i tamaiti ia lagonaina le alofa o le Tama Faalelagi ma a’oa’o ai e uiga i Lana fuafuaga o le fiafia (tagai i le 12.1.4).
Fonotaga ma Aufono
O le peresitene o le Peraimeri o le sui auai i manaoga o tamaiti a o fono ma fefautuaai ma taitai i le uarota. E aofia ai fonotaga faifai pea ma le epikopo po o le fesoasoani ua tofia, aufono a le uarota, au peresitene ma le failautusi, matua, ma isi. (Tagai i le 12.3.2.)
Faiaoga ma Taitai
O le aoaoina o fanau a le Atua o se avanoa paia. E tuuina atu e le au peresitene o le Peraimeri le lagolago i faiaoga ma taitai o le Peraimeri i le taimi o vasega, vasega pepe, ma taimi o pesepesega (tagai i le 12.3.5). O le au peresitene o le Peraimeri e fautuaina atu i le au epikopo ia alii ma tamaitai e auauna atu i le Peraimeri ma valaauga i le vasega pepe.
O Gaoioiga a le Peraimeri
E fuafua e taitai o gaoioiga a le Peraimeri ni gaoioiga malie ma punouai lea e fesoasoani e faataunuu ai le galuega o le faaolataga ma le faaeaga a le Atua. O auaunaga ma gaoioiga e tatau ona fausia ai molimau, faamalolosia ai aiga, ma maua ai avanoa e faamanuiaina ai isi. O gaoioiga a le Peraimeri e masani ona faia faalua i le masina mo tamaiti ua ta’i 8–11 tausaga. (Tagai i le 12.3.6.)
Taiala ma Aiaiga Faavae
O tagata matutua uma e galulue ma tamaiti ma le autalavou e tatau ona faamae’aina le a’oa’oga faamasani o le Puipuiga o Tamaiti ma le Autalavou i totonu o le masina e tasi talu ona lagolagoina (ProtectingChildren.ChurchofJesusChrist.org). O taiala ma aiaiga faavae e faatatau i tamaiti e i ai manaoga faapitoa, tulaga manaomia mo le saogalemu, le polokalama a Tamaiti ma le Autalavou, ma isi o loo maua i le vaega 12.5 o le Tusitaulima Aoao.