Lin b’oqb’al jo’ aj tz’iib’anel sa’ li Tzoleb’aal reheb’ li Kok’al

Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

Li rajb’al li Tzoleb’aal reheb’ li Kok’al

Li Tzoleb’aal reheb’ li Kok’al naxtenq’aheb’ li kok’al chireek’ankil lix rahom li qaChoxahil Yuwa’; chixyu’aminkil lix evangelio li Jesukristo; ut chireek’ankil, chixk’eeb’al reetal, ut chixk’anjelankil lix hasb’ li Santil Musiq’ej. Sa’ li Tzoleb’aal reheb’ li Kok’al, eb’ li kok’al te’xkawresi rib’ choq’ reheb’ li santil sumwank, ut re te’xb’aanuheb’ ut te’xpaab’eb’ li sumwank naq neke’tz’aqon sa’ lix k’anjel li Dios re li kolb’a-ib’ ut li taqenaqil loq’al. (Chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 12.1.)

Laj tz’iib’anel

Laj tz’iib’anel sa’ li Tzoleb’aal reheb’ li Kok’al naxtenq’a li awa’b’ej rik’in li k’anjel teneb’anb’il sa’ xb’een li awa’b’ejil. Laj tz’iib’anel naxye re li awa’b’ejil ma wankeb’ li ak’ kok’al malaj li neke’ula’anink, ani naru taakub’eeq xha’, ut ani taaxik sa’ li tzoleb’aal jun chik. Natenq’an rik’ineb’ li ch’utam sa’ domingo re li Tzoleb’aal reheb’ li Kok’al ut naxkawresi xtusulaleb’ li ch’utam ut na’oken aran. Laj tz’iib’anel nak’anjelak ajwi’ rik’ineb’ laj k’utunel ut laj jolominel sa’ li Tzoleb’aal reheb’ li kok’al ut li na’ajej choq’ reheb’ li toj kok’eb’ chi us re xtenq’ankileb’ li kok’al. (Chi’ilmanq 12.3.3.)

Eb’ li tzoleb’aal ut li hoonal re b’ichank

Li xtzolb’aleb’ li kok’al a’an jun k’anjel jwal loq’. Eb’ laj jolominel neke’xraheb’ ut neke’xtzoleb’ li kok’al jo’ li Kolonel. K’uub’ankileb’ li tzoleb’aal sa’ li Tzoleb’aal reheb’ li Kok’al a’ yaal xchihab’eb’ li kok’al (chi’ilmanq 12.1.3). Li hoonal re b’ichank naxtenq’aheb’ li kok’al chireek’ankil lix rahom lix Choxahil Yuwa’, ut chi tzolok chirix lix k’uub’anb’il na’leb’ re sahil ch’oolejil (chi’ilmanq 12.1.4).

Eb’ li kok’ k’anjel re li Tzoleb’aal reheb’ li Kok’al

Eb’ laj jolominel neke’k’uub’ li kok’ k’anjel li sahaq xb’aanunkileb’ ut li taarajsiheb’ ru li kok’al, ut li neke’tenq’an chixb’aanunkil lix k’anjel li Dios re li kolb’a-ib’ ut li taqenaqil loq’al. Li k’anjelak chiru as iitz’inb’ej ut eb’ li kok’ k’anjel tento te’xwaklesi li xnawom ch’oolej, te’xk’e xkawilaleb’ li junkab’al, ut te’xkanab’eb’ li komon chirosob’tesinkil li ras riitz’ineb’ Neke’b’aanuman li kok’ k’anjel re li Tzoleb’aal reheb’ li Kok’al wiib’ sut rajlal po choq’ reheb’ li kok’al li 8–11 chihab’ xyu’ameb’. (Chi’ilmanq 12.3.6.)

Li b’eresink ut li chaq’rab’ink

Chixjunileb’ li komon ak ninqeb’ li neke’k’anjelak rik’ineb’ li kok’al ut li saaj tento te’xb’aanu li tzolok chirix xkolb’aleb’ rix li kok’al ut li saaj naq maji’ jun po rokikeb’ sa’ lix b’oqb’aleb’ (ProtectingChildren.ChurchofJesusChrist.org). Li b’eresink ut li chaq’rab’ink chirixeb’ li kok’al wankeb’ xmajelal sa’ tib’elej, li kolok-ix, li k’anjeleb’aal choq’ reheb’ li kok’al ut li saaj, ut xkomon chik li na’leb’ naru natawman sa’ li tasal 12.5 re li Jolomil K’anjenel Hu.