Ngaahi Fatongiá

ʻOku houngaʻia ʻa e ʻEikí ʻi hoʻo loto-fiemālie ke ngāue ʻi Hono Siasí. ʻOku ʻoatu ʻi lalo ha vakai fakalūkufua ki he ngaahi fatongia ki hoʻo uiuiʻí.

Taumuʻa ʻo e Palaimelí

ʻOku tokoni ʻa e Palaimelí ke ongoʻi ʻe he fānaú ʻa e ʻofa ʻa ʻenau Tamai Hēvaní; ako fekauʻaki mo ʻEne palani ʻo e fiefiá; moʻui ʻaki e ongoongolelei ʻo Sīsū Kalaisí; pea ongoʻi, ʻiloʻi, mo ngāue ʻo fakatatau mo e ivi tākiekina ʻo e Laumālie Māʻoniʻoní. Ko e Palaimelí ko ha taimi foki ia ke teuteu, fakahoko, mo tauhi ai e ngaahi fuakava toputapú ʻi he kau ʻa e fānaú ʻi he ngāue ʻa e ʻOtuá ki he fakamoʻuí mo e hakeakiʻí. (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 12.1.)

Sekelitalí

ʻE tokoni ʻa e sekelitali ʻo e Palaimelí ki he kau palesitenisií ʻi he ngaahi fiemaʻu fakapulé. ʻE ʻai ʻe he sekelitalí ke ʻilo ʻe he kau palesitenisií ʻa e fānau foʻoú mo e kau ʻaʻahí, fānau ʻoku malava ke papitaisó, mo e ngaahi hiki fakakalasí. Te ne tokoni ʻi hono vahe ʻo e ngaahi fatongia ki he houalotu ʻa e Palaimelí ʻi he Sāpaté mo teuteu ʻa e ngaahi ʻasenitá mo kau ki he ngaahi fakatahá. ʻE toe ngāue vāofi foki ʻa e sekelitalí mo e kau faiako mo e kau taki ʻo e Palaimelí mo e nesilií ʻi he ngaahi meʻa ʻoku fekauʻaki mo e fānaú. (Vakai, 12.3.3.)

Ngaahi Kalasí mo e Taimi Hivá

Ko ha faingamālie toputapu ke akoʻi ʻa e fānaú. ʻOku ʻofa mo akoʻi ʻe he kau taki ʻo e Palaimelí ʻa e fānaú ʻi he founga ʻa e Fakamoʻuí. ʻOku fokotuʻutuʻu ʻa e ngaahi kalasi Palaimelí ʻo fakatatau ki he taʻú pea mo e tokolahi ʻo e kau faiako ʻoku maʻú (vakai, 12.1.3). ‘Oku tokoni ʻa e taimi hivá ke ongoʻi ʻe he fānaú ʻa e ʻofa ʻa e Tamai Hēvaní mo ʻilo ki Heʻene palani ʻo e fiefiá (vakai, 12.1.4).

Ngaahi ʻEkitivitī ʻa e Palaimelí

ʻE palani ʻe he kau taki ʻekitivitī ʻo e Palaimelí ha ngaahi ʻekitivitī fakafiefia mo longomoʻui ʻe tokoni ki hono fakahoko ʻa e ngāue ʻa e ʻOtuá ki he fakamoʻuí mo e hakeakiʻí. ʻOku totonu ke langaki ʻe he ngaahi ngāué mo e ngaahi ʻekitivitií ʻa e fakamoʻoní, fakamālohia ʻa e ngaahi fāmilí, mo ʻomi ha ngaahi faingamālie ke tāpuekina ai ha niʻihi kehe. ʻOku angamaheni ke fakahoko tuʻo ua ʻi he māhina ʻa e ngaahi ʻekitivitī ʻa e Palaimelí maʻá e fānau taʻu 8–11. (Vakai, 12.3.6.)

Ngaahi Fakahinohinó mo e Ngaahi Tuʻutuʻuní

Kuo pau ke fakakakato ʻe he kakai lalahi kotoa pē ʻoku ngāue mo e fānaú mo e toʻu tupú ʻa e ako ki hono Maluʻi ʻo e Fānaú mo e Toʻu Tupú ʻi loto he māhina ʻe taha hono hikinimaʻi kinautolú (ProtectingChildren.ChurchofJesusChrist.org). ʻOku maʻu ʻa e ngaahi fakahinohino mo e ngaahi tuʻutuʻuni fekauʻaki mo e fānau ʻoku ʻi ai ʻenau ngaahi fiemaʻu makehé, ngaahi fiemaʻu ki he malú, polokalama ʻa e Fānaú mo e Toʻu Tupú, mo e niʻihi kehé ʻi he vahe 12.5 ʻo e Tohi Tuʻutuʻuni Fakakātoá.