Ang Akong Calling isip usa ka Magtutudlo sa Primary

Mga Responsibilidad

Ang Ginoo mapasalamaton sa imong kaandam nga moserbisyo sa Iyang Simbahan. Sa ubos mao ang kinatibuk-ang pagpasabot sa mga reponsibilidad sa imong calling.

Katuyoan sa Primary

Ang Primary motabang sa kabataan nga mobati sa gugma sa ilang Langitnong Amahan; makakat-on mahitungod sa Iyang plano sa kalipay; mosunod sa ebanghelyo ni Jesukristo; ug mobati, moila, ug molihok sa impluwensiya sa Espiritu Santo. Ang Primary usa usab ka panahon sa pagpangandam, paghimo, ug pagtuman sa sagrado nga mga pakigsaad samtang ang kabataan moapil sa buhat sa Dios sa kaluwasan ug kahimayaan. (Tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 12.1.)

Magtutudlo sa Primary

Ang pagtudlo sa mga anak sa Dios usa ka sagrado nga pribilihiyo. Ang mga magtutudlo sa Primary gitawag sa pagtudlo ug pagpangalagad sa piho nga mga grupo nga kaedad sa mga bata (tan-awa sa 12.3.5). Sila magtuon sa ebanghelyo ug mopakigbahin ngadto sa mga bata kon unsa ang ilang nakat-onan. Ang mga magtutudlo moawhag sa mga bata ug sa ilang mga pamilya sa pagkat-on sa ebanghelyo sa panimalay. Sila modapit sa kabataan sa pagpakigbahin diha sa simbahan sa unsay ilang nakat-onan sa panimalay (tan-awa sa 12.2.1.2).

Klase sa Dominggo

Ang mga magtutudlo sa Primary motudlo gikan sa Dali, Sunod Kanako. Sila mosunod sa mga baroganan sa Pagtudlo sumala sa Pamaagi sa Manluluwas ug kapitulo 17 sa Kinatibuk-ang Tamdanan nga Basahon. Kon ang mga hamtong motudlo sa kabataan diha sa mga kahimtang sa Simbahan, dili mominos sa duha ka responsable nga mga hamtong ang kinahanglan nga anaa.( tan-awa sa 12.3.5).

Mga Lagda ug mga Palisiya

Ang tanang hamtong nga naglihok uban sa kabataan ug kabatan-onan kinahanglang mokompleto sa pagbansay sa Pagpanalipod sa Kabataan ug Kabatan-onan sulod sa usa ka bulan human mapaluyohi (ProtectingChildren.ChurchofJesusChrist.org). Ang mga lagda ug mga palisiya kabahin sa kabataan nga adunay espesyal nga mga panginahanglan, mga kinahanglanon sa kahilwasan, ang Programa sa Kabataan ug Kabatan-onan, ug uban pa makita sa seksiyon 12.5 sa Kinatibuk-ang Tamdanan nga Basahon.