Lin b’oqb’al jo’ aj k’utunel sa’ li Tzoleb’aal reheb’ li Kok’al

Li k’a’ru teneb’anb’il

Nasaho’ xch’ool li Qaawa’ naq wan aach’ool chi k’anjelak sa’ lix Iglees a’an. Rub’el a’in wan jun xtusulal li k’a’ru teneb’anb’il sa’ laa b’oqb’al.

Li rajb’al li Tzoleb’aal reheb’ li Kok’al

Li Tzoleb’aal reheb’ li Kok’al naxtenq’aheb’ li kok’al chireek’ankil lix rahom li qaChoxahil Yuwa’; chixyu’aminkil lix evangelio li Jesukristo; ut chireek’ankil, chixk’eeb’al reetal, ut chixk’anjelankil lix hasb’ li Santil Musiq’ej. Sa’ li Tzoleb’aal reheb’ li Kok’al, eb’ li kok’al te’xkawresi rib’ choq’ reheb’ li santil sumwank, ut re te’xb’aanuheb’ ut te’xpaab’eb’ li sumwank naq neke’tz’aqon sa’ lix k’anjel li Dios re li kolb’a-ib’ ut li taqenaqil loq’al. (Chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 12.1.)

Laj k’utunel sa’ li Tzoleb’aal reheb’ li Kok’al

Li xtzolb’aleb’ li ralal xk’ajol li Dios a’an jun k’anjel jwal loq’. Eb’ laj k’utunel sa’ li Tzoleb’aal reheb’ li Kok’al neke’b’oqe’ re k’utuk ut k’anjelak chiruheb’ li kok’al li wankeb’ sa’ jun tzoleb’aal choq’ re xchihab’eb’ (chi’ilmanq 12.3.5). Neke’xtzol li evangelio ut neke’xwotz rik’ineb’ li kok’al li k’a’ru neke’xtzol. Eb’ laj k’utunel neke’xwaklesi xch’ooleb’ li kok’al ut eb’ lix junkab’al chixtzolb’al li evangelio sa’ rochocheb’. Neke’xb’oqeb’ li kok’al chixwotzb’al sa’ li iglees li k’a’ru yookeb’ chixtzolb’al sa’ rochocheb’ (chi’ilmanq 12.2.1.2).

Li tzoleb’aal re domingo

Eb’ laj k’utunel sa’ li Tzoleb’aal reheb’ li Kok’al neke’xk’ut li na’leb’ natawman sa’ Kim, Taaqehin. Neke’xtaaqe li na’leb’ wan sa’ Li K’utuk jo’ li Kolonel ut sa’ li ch’ol 17 re li Jolomil K’anjenel Hu. Naq eb’ li ninqi komon neke’xtzoleb’ li kok’al sa’ li Iglees, aajel ru naq te’wanq wiib’ li komon ninq li chaab’ileb’ xch’ool (chi’ilmanq 12.3.5).

Li b’eresink ut li chaq’rab’ink

Chixjunileb’ li komon ak ninqeb’ li neke’k’anjelak rik’ineb’ li kok’al ut li saaj tento te’xb’aanu li tzolok chirix xkolb’aleb’ rix li kok’al ut li saaj naq maji’ jun po rokikeb’ sa’ lix b’oqb’aleb’ (ProtectingChildren.ChurchofJesusChrist.org). Li b’eresink ut li chaq’rab’ink chirixeb’ li kok’al wankeb’ xmajelal sa’ tib’elej, li kolok-ix, li k’anjeleb’aal choq’ reheb’ li kok’al ut li saaj, ut xkomon chik li na’leb’ naru natawman sa’ li tasal 12.5 re li Jolomil K’anjenel Hu.