Ol Responsabiliti

Lod i tangkyu from tingting blong yu blong wantem givim seves insaed long Jos blong Hem. Andanit ia i wan sot lukluk long ol responsabiliti blong koling blong yu.

Stamba Tingting blong Rilif Sosaeti

Rilif Sosaeti i wan tabu oganaesesen we oli stanemap blong evri adalt woman insaed long Jos. Rilif Sosaeti i helpem ol pikinini blong God blong rere blong gobak stap wetem Hem, long ples blong Hem. Profet Josef Smit i bin tijim se stamba tingting blong Rilif Sosaeti hem i blong “sevem ol sol mo help long taem blong safaring.(luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 9.1).

Presiden blong Rilif Sosaeti

Presiden blong Rilif Sosaeti i lidim ol wok blong tekempat insaed long wok blong God blong fasin blong sevem man mo fasin blong kam olsem wan god. Hem i givim seves olsem wan memba blong wod kaonsel mo, anda long daereksen blong bisop, i kaonsel wetem ol adalt memba blong wod. Hem i lukluk ova long ol rekod blong Rilif Sosaeti, ol ripot mo ol faenens (luk long 9.3.2.2).

Presidensi

Presiden mo ol kaonsela blong hem i lukluk long ol givhan sista, Sandei instraksen, mo ol aktiviti. Oli tijim ol sista abaot ol kavenan responsabiliti blong olgeta, rere long ol yang woman blong tekempat long Rilif Sosaeti, mo kodinetem ol wok blong mekem ol yang adalt sista oli kam strong moa (luk long 9.4). Presidensi blong Rilif Sosaeti mo sekretari oli gat miting evri taem (luk long 9.3.2.3).

Lidasip mo Ol Kaonsel

Ol lida blong Rilif Sosaeti, oli mekem plan blong holem ol Sandei miting, ol aktiviti, ol givhan wok, seves, mo ol narafala wok we i givim long ol woman eksperiens ia long wok blong God blong fasin blong sevem man mo fasin blong kam olsem wan god. Ol memba blong Rilif Sosaeti mo kworom blong ol elda, oli joen wan blong mekem wok ia i hapen (luk long 9.2).

Rilif Sosaeti mo Kworom blong Ol Elda

Presidensi blong Rilif Sosaeti mo kworom blong ol elda oli kodinetem ol asaenmen blong wok blong givhan mo help blong lidim wok blong tempol mo famli histri wok mo traehad blong invaetem evriwan blong kasem ol blesing blong gospel. Oli gat wan ki rol blong tijim ol memba blong wod ol prinsipol blong givhan long olgeta we oli stap long nid, stap laef folem loa blong livim kakae, stap bildim wan Indipenden laef, mo stap kam antap long fasin blong stap rere blong wanwan man o woman mo famli (luk long 22.6.2).

Ol Sandei Miting

Ol Rilif Sosaeti oli mit long nambatu mo nambafo Sandei wetem stamba tingting ia blong mekem fet long Jisas Kraes i kam moa strong, bildimap yuniti, mekem ol famli mo hom i kam moa strong Ol miting i stat wetem wan prea mo i gat tu, taem blong kaonsel tugeta mo gospel instraksen mo storian raon long ol toktok blong jeneral konfrens we i jes pas (luk long 9.2.1.2).

Seves mo Ol Aktiviti

Ol Rilif Sosaeti Presidensi oli save mekem ol plan blong ol aktiviti blong mekem fet blong ol sista long Jisas Kraes i kam moa strong, mekem tingting blong hat blong olgeta i wantem blong mekem mo kipim ol kavenan, mo givim ol janis long olgeta blong oli save givim seves tugeta. Presiden blong Rilif Sosaeti i lukluk ova long ol aktiviti ia. Hem i save askem wan kaonsela, o wan nara sista blong oli tekem step blong mekem plan mo mekem ol aktiviti ia oli hapen (luk long 9.2.1.3).

Sam Moa Koling

Bisop mo presiden blong Rilif Sosaeti i toktok raon sapos i nid blong givimaot moa koling o no. Hemia i tekem tu ol tija, ol seves kodineta, ol aktiviti kodineta, ol asisten mo ol komiti memba, ol asisten sekretari, mo ol givhan sekretari. Olsem we i nid, presidensi blong Rilif Sosaeti i save givim wok long ol sista blong helpem olgeta wetem ol hadwok blong Rilif Sosaeti long ol nara wei.(luk long 9.3.4).

Ol Gaedlaen mo Ol Polisi

Sam moa long ol gaedlaen mo ol polisi oli faenem insaed long seksen 9.6 blong Jeneral Hanbuk.