Mga Responsibilidad

Ang Ginoo mapasalamaton alang sa imong kaandam nga moserbisyo sa Iyang Simbahan. Sa ubos mao ang kinatibuk-ang pagpasabot sa mga responsibilidad sa imong calling.

Katuyoan sa Relief Society

Ang Relief Society usa ka balaang gitukod nga organisasyon alang sa tanang hamtong nga mga babaye diha sa Simbahan. Ang Relief Society motabang sa mga anak sa Dios nga mangandam aron makabalik ngadto sa Iyang presensya. Si Propeta Joseph Smith mitudlo nga ang katuyoan sa Relief Society mao ang “pagluwas sa mga kalag ug paghupay sa nag-antos”—naghatag og kahupayan sa Manluluwas (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 9.1).

Presidente sa Relief Society

Ang presidente sa Relief Society mangulo sa mga paningkamot sa pag-apil sa buhat sa Dios sa kaluwasan ug kahimayaan. Siya moserbisyo isip sakop sa konseho sa ward ug, ubos sa giya sa bishop, mopakigtambag uban sa hamtong nga mga miyembro sa ward. Siya modumala usab sa mga rekord, mga report, ug mga panalapi (tan-awa sa 9.3.2.2).

Kapangulohan

Ang presidente ug iyang mga magtatambag modumala sa tigpangalagad nga mga sister, panudlo sa Dominggo, ug mga kalihokan. Nagtudlo sila sa mga sister sa ilang mga responsibilidad sa pakigsaad, nag-andam sa batan-ong mga babaye sa pag-apil sa Relief Society, ug makigsabot og mga paningkamot sa pagpalig-on sa young adult nga mga sister (tan-awa sa 9.4). Ang kapangulohan sa Relief Society ug ang secretary magmiting kanunay (tan-awa sa 9.3.2.3).

Pagpangulo ug mga Konseho

Ang mga lider sa Relief Society magplano og mga miting sa Dominggo, mga kalihokan, pagpangalagad, pagserbisyo, ug ubang mga inter-aksiyon aron mahatagan ang mga babaye og mga kasinatian sa buhat sa Dios sa kaluwasan ug kahimayaan. Ang mga sakop sa Relief Society ug korum sa mga elder molihok nga magkahiusa (tan-awa sa 9.2).

Relief Society ug Korum sa mga Elder

Ang mga kapangulohan sa Relief Society ug korum sa mga elder makigsabot sa mga buluhaton sa pagpangalagad ug nagtabang sa paggiya sa buhat sa templo ug family history ug mga paningkamot sa pagdapit sa tanan nga makadawat sa mga panalangin sa ebanghelyo. Aduna usab silay mahinungdanong tahas sa pagtudlo sa mga miyembro sa ward sa mga baroganan sa pagpangalagad niadtong nanginahanglan, sa pagsunod sa balaod sa puasa, sa pagpalambo sa pagbarog pinaagi sa kinaugalingong paningkamot, ug sa pagdugang sa personal ug pamilya nga pagpangandam (tan-awa 22.6.2).

Mga Miting sa Dominggo

Ang mga Relief Society magmiting sa ikaduha ug ikaupat nga mga Dominggo uban ang katuyoan sa pagpalambo sa hugot nga pagtuo diha ni Jesukristo, pag-ugmad og panaghiusa, ug paglig-on og mga pamilya ug mga panimalay. Ang mga miting sugdan sa pag-ampo ug maglakip og panahon alang sa pagtinambagay ug panudlo ug panaghisgotan sa ebanghelyo base sa bag-ohay nga mga pakigpulong sa kinatibuk-ang komperensiya (tan-awa sa 9.2.1.2).

Serbisyo ug mga Kalihokan

Ang mga kapangulohan sa Relief Society mahimong magplano og mga kalihokan nga makapalig-on sa hugot nga pagtuo sa mga sister diha kang Jesukristo, magpalambo sa ilang tinguha nga mohimo ug mosunod sa mga pakigsaad, ug maghatag kanila og mga oportunidad sa pagserbisyo og dungan. Ang presidente modumala niini nga mga kalihokan ug mahimong mohangyo og magtatambag o laing sister nga maoy mangulo sa pagplano ug sa pagpahigayon niini (tan-awa sa 9.2.1.3).

Dugang nga mga Calling

Ang bishop ug ang presidente sa Relief Society maghisgot sa panginahanglan alang sa dugang nga mga calling. Kini naglakip sa mga magtutudlo, mga koordinitor sa pagserbisyo, mga koordinitor sa mga kalihokan, mga kaabag ug mga sakop sa komite, kaabag nga mga secretary, ug tigpangalagad nga mga secretary. Kon gikinahanglan, ang kapangulohan mahimong mosangon og mga sister sa pagtabang sa mga paningkamot sa Relief Society sa ubang mga paagi (tan-awa sa 9.3.4).

Mga Lagda ug mga Palisiya

Dugang nga mga lagda ug mga palisiya makit-an diha sa seksiyon 9.6 sa Kinatibuk-ang Tamdanan nga Basahon.